Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Yehowa Odasefoi

Ga

Buu-Mɔɔ Gilead Biblia Skul​—Klass ni ji 138 nɔ lɛ Gbe Amɛnikasemɔ Naa

Buu-Mɔɔ Gilead Biblia Skul​—Klass ni ji 138 nɔ lɛ Gbe Amɛnikasemɔ Naa

Yɛ March 14, 2015 lɛ, Buu-Mɔɔ Gilead Biblia Skul, klass ni ji 138 nɔ lɛ gbe amɛnikasemɔ naa yɛ Yehowa Odasefoi anikasemɔhe ni yɔɔ Patterson, New York lɛ. Afɔ̃ mɛi ni fa fe 14,000 nine kɛhã nifeemɔ nɛɛ. Amɛteŋ mɛi komɛi ba nifeemɔ lɛ shishi yɛ he ni afee yɛ lɛ, ni mɛi komɛi hu kwɛ lɛ vidio yɛ hei srɔtoi. Akɛ Maŋtsɛyeli lalai hei ejwɛ ni afee lɛ kpa nifeemɔ lɛ hiɛ. Sɛɛ mli lɛ, alá lalai nɛɛ yɛ nifeemɔ lɛ shishi. *

Geoffrey Jackson, ni eji Yehowa Odasefoi Agbɛtsɔɔmɔ Kuu lɛ mli nyo lɛ, fee sɛinɔtalɔ kɛhã nifeemɔ lɛ. Yɛ ehiɛkpamɔ wiemɔ lɛ mli lɛ, ewo nikaselɔi lɛ hewalɛ koni amɛkɛ nilee kɛ tsɔsemɔ ni amɛná lɛ akɛto, moŋ lɛ, amɛkɛye amɛbua mɛi krokomɛi.​—2 Timoteo 2:2.

Nyɛminuu Jackson wie nɔkwɛmɔnɔ kpakpa ni Mose fee yɛ enɛ gbɛfaŋ lɛ he. Akɛ Mose diɛŋtsɛ buu lɛ tsu nii akɛ jamɔhe kɛhã Israel maŋ lɛ kɛyashi be ko. Shi be ni ama kpeebuu lɛ agbe naa lɛ, akɛ no baafee jamɔhe agbɛnɛ. Etamɔ nɔ ni Yehowa hãaa Mose hegbɛ akɛ ebote He Krɔŋkrɔŋ Fe Fɛɛ lɛ, ejaakɛ osɔfonukpa lɛ pɛ yɔɔ nakai hegbɛ lɛ. Kɛ̃lɛ, nɔ ko etsɔɔɔ akɛ Mose wie eshi tsakemɔ nɛɛ. Moŋ lɛ, ekɛ anɔkwayeli fi Aaron sɛɛ yɛ enitsumɔ akɛ osɔfonukpa lɛ mli. (2 Mose 33:​7-​11; 40:34, 35) Mɛni wɔkaseɔ yɛ mli? Nyɛminuu Jackson kɛɛ, “Ohiɛ asɔ hegbɛ fɛɛ hegbɛ ni oyɔɔ lɛ, shi kaatsĩ naa ohã ohe kɔkɔɔkɔ.”

“Ani Otsui Baafa yɛ Baa ko Gbɛɛmɔ Hewɔ?” Enɛ ji wiemɔ ni Kenneth Flodin, ni yeɔ ebuaa Gbɛtsɔɔmɔ Kuu lɛ Nitsɔɔmɔ Ajinafoi Akuu lɛ, hã lɛ saneyitso. Etsɔɔ akɛ, nikaselɔi lɛ kɛ shihilɛi komɛi baakpe ni baanyɛ awo amɛhe gbeyei, tamɔ yiwaa loo nitsumɔ ko ni etsumɔ bɛ mlɛo. Ekɛ wiemɔ ni yɔɔ 3 Mose 26:36 lɛ tsu nii kɛwo nikaselɔi lɛ hewalɛ akɛ, amɛkana shihilɛi ni tamɔ nakai lɛ akɛ anyɛŋ he nɔ ko afee, moŋ lɛ amɛbu lɛ akɛ eji baa gbiŋ ko kɛkɛ. No sɛɛ lɛ, Nyɛminuu Flodin tsɔɔ akɛ bɔfo Paulo nyɛ ekpee shihilɛi ni jaraa babaoo ni ekɛkpe lɛ anaa, akɛni ekɛ ehe fɔ Yehowa nɔ lɛ hewɔ.​—2 Korintobii 1:​8, 10.

“Mɛni Otaoɔ?” Mark Sanderson, ni eji Gbɛtsɔɔmɔ Kuu lɛ mli nyo lɛ, hã wiemɔ ni nyiɛ sɛɛ yɛ nifeemɔ lɛ shishi lɛ. Ewie shishitoo mla ni yɔɔ Abɛi 13:12 lɛ he, jɛmɛ kɛɔ akɛ: “Hiɛnɔkamɔ ni baaa mli mra lɛ, ewoɔ mɔ tsui hela.” Dɔlɛ sane ji, mɛi babaoo hiɔ shi amɛwala bei fɛɛ ní amɛfee shwɛm, ejaakɛ amɛkɛ otii ni amɛnyɛŋ amɛshɛ he lɛ mamɔɔ amɛhiɛ, tamɔ ninámɔ aloo gbɛihemɔ nɛkɛ.

Yɛ Yesu beiaŋ lɛ, mɛi komɛi ná susumɔi ni ejaaa yɛ Yohane Baptisilɔ lɛ he. (Luka 7:​24-​28) Akɛ nɔkwɛmɔnɔ lɛ, amɛyakpa gbɛ akɛ Yohane baptisilɔ lɛ baafee woloŋlelɔ kpanaa ko ni baatsɔɔ amɛ jeŋ nibii komɛi. Kɛ́ nakai amɛkpa gbɛ lɛ, no lɛ amɛgbɛkpamɔ lɛ eyabaaa mli, ejaakɛ Yohane shiɛ anɔkwale sane pɔtɛɛ ko. Mɛi komɛi hu yakpa gba akɛ ebaafee anunyam gbɔmɔ ko ni ewula jogbaŋŋ. Shi Yohane saa ehe tamɔ ohiafo. Kɛ̃lɛ, mɛi ni miikpa gbalɔ gbɛ lɛ anine eyanyɛɛɛ shi, ejaakɛ Yohane jeee gbalɔ kɛkɛ, moŋ lɛ eji gbɛsaalɔ hu kɛhã Mesia lɛ!​—Yohane 1:​29.

Nyɛminuu Sanderson kɛ wiemɔ nɛɛ wo nikaselɔi lɛ hewalɛ koni amɛkɛ amɛjwɛŋmɔ ama nibii kpakpai anɔ. Nɔ najiaŋ ni amɛbaasumɔ ni amɛhé gbɛ́i loo amɛkpa bulɛ krɛdɛɛ ko gbɛ yɛ amɛsɔɔmɔ lɛ mli lɛ, esa akɛ amɛkɛfee oti ni ma amɛhiɛ akɛ amɛkɛ tsɔsemɔ ni amɛná lɛ baatsu nii koni mɛi krokomɛi hu aná he sɛɛ. Gbɛi anɔ ni amɛbaanyɛ amɛfee enɛ ji, ní amɛtsɔɔ mɛi nibii ni amɛyakase yɛ Gilead lɛ, amɛwaje nyɛmimɛi lɛ ahemɔkɛyeli, ni amɛsumɔ amɛ. Nyɛminuu Sanderson wo nikaselɔi lɛ hewalɛ akɛ, “Nyɛkɛ heshibaa asɔmɔa nyɛmimɛi lɛ, nyɛbɔa mɔdɛŋ nyɛfea Yehowa suɔmɔnaa nii, ni nyɛnine enyɛŋ shi kɔkɔɔkɔ.”

“Lɛɛ Mɔ ni Hɔmɔ Yeɔ Lɛ Lɛ.” Enɛ ji saneyitso ni James Cauthon, ni eji tsɔɔlɔ yɛ Nitsumɔhe ni Kwɛɔ Teokrase Skul Srɔtoi lɛ Anɔ lɛ hã. Nyɛminuu Cauthon tsɔɔ akɛ, mɔ fɛɛ mɔ sumɔɔ ni ajie suɔmɔ kpo atsɔɔ lɛ, ajie hiɛsɔɔ kpo atsɔɔ lɛ, ni ana akɛ ehe yɛ sɛɛnamɔ. Yesu po nu he nakai, ni Yehowa tsu he nii be ni ekɛ wiemɔi ni taa mɔ tsuiŋ wo Yesu hewalɛ yɛ ebaptisimɔ mli lɛ.​—Mateo 3:​16, 17.

Yehowa ehã wɔ nyɛmɔ ko, no ji wɔwiemɔi ni wɔbaanyɛ wɔkɛwo mɛi hewalɛ ni wɔkɛtswa amɛ wɔma shi, ni eekpa gbɛ akɛ wɔkɛ nyɛmɔ nɛɛ baatsu nii. (Abɛi 3:​27) Nyɛminuu Cauthon wo amɛ hewalɛ ekɛɛ, “Nyɛtsɔsea nyɛhe akɛ nyɛbaatao nibii kpakpai pɛ yɛ mɛi ahe, ni nyɛjie amɛyi.” Kɛ́ wɔjɛ wɔtsuiŋ wɔjie nyɛmimɛi lɛ ayi lɛ, amɛbaana akɛ wɔhiɛ sɔɔ amɛmɔdɛŋbɔi lɛ waa.

“Ekɛ Ehe Hã Kɛyawula Shi.” Mark Noumair ni eji yelikɛbualɔ kɛhã Nitsɔɔmɔ Ajinafoi Akuu lɛ hã wiemɔ ni nyiɛ sɛɛ lɛ. Ekɛ bɔfo Paulo nɔkwɛmɔnɔ lɛ tsu nii kɛtsɔɔ nikaselɔi lɛ akɛ, amɛmii akashɛ fioo kɛkɛ ni akpaa gbɛ ni amɛnyɛɔ amɛtsuɔ lɛ pɛ he. Shi moŋ lɛ, taakɛ Paulo fee lɛ, amɛkɛ amɛhe ashã afɔle amɛhã mɛi krokomɛi, ni amɛbaaná anɔkwa miishɛɛ.​—Filipibii 2:​17, 18.

Yɛ shihilɛi ni jaraa amli po lɛ, Paulo nijiaŋ ejeee wui. Paulo kɛ ehe hã kɛyawula shi, ejaakɛ etee nɔ ekɛ ehewalɛ fɛɛ tsu sɔɔmɔ nitsumɔ lɛ kɛyashi egbo. Enyɛ ewie yɛ anɔkwale mli akɛ: “Foidamɔ lɛ, mida migbe naa.” (2 Timoteo 4:​6, 7) Nyɛminuu Noumair wo nikaselɔi lɛ hewalɛ koni amɛkase Paulo, kɛtsɔ anɔkwayeli ni amɛkɛbaafi Maŋtsɛyeli nitsumɔi ni atu awo amɛdɛŋ lɛ sɛɛ lɛ nɔ.

Niiashikpamɔi. Michael Burnett, ni lɛ hu eji Gilead tsɔɔlɔ lɛ kwɛ nifeemɔ ni nyiɛ sɛɛ nɔ. Yɛ enɛ mli lɛ, nikaselɔi lɛ ekomɛi gba niiashikpamɔi ni amɛná yɛ shiɛmɔ nitsumɔ lɛ mli be ni amɛyɔɔ Patterson lɛ, ni amɛfee he nɔkwɛmɔnɔ.

Yɛ nikaselɔi lɛ aniiashikpamɔi eko fɛɛ eko mli lɛ, yibiiwoo kpakpai jɛ mli kɛba, ejaakɛ amɛŋɔ hegbɛ fɛɛ hegbɛ ni amɛná lɛ kɛye mɛi odase, ni amɛbɔ mɔdɛŋ amɛshiɛ yɛ mɛi lɛ amaŋ wiemɔi amli. Akɛ nɔkwɛmɔnɔ lɛ, akɛɛ nikaselɔi ateŋ mɔ kome akɛ, shikpɔŋkuku ni etaoɔ eyashiɛ yɛ mli lɛ, mɛi pii yɛ jɛmɛ ni wieɔ Spanish. No hewɔ lɛ, gbi lɛ eko ni ebaashi kɛya shiɛmɔ lɛ, ekɛ JW Language app lɛ tsu nii kɛkase wiemɔi fioo komɛi yɛ Spanish mli. Nakai gbi lɛ nɔŋŋ lɛ, ekɛ nuu ko ni wieɔ Spanish kpe yɛ gbɛjegbɛ lɛ nɔ. Ekɛ Spanish fioo ni ekase lɛ tsu nii kɛje sanegbaa shishi, ni no hã ekɛ nuu lɛ kɛ eweku mli bii ejwɛ je Biblia mli nikasemɔ shishi.

Abibii Mɛi Saji. No sɛɛ lɛ, William Turner Jr. ni eji yelikɛbualɔ kɛhã Gbɛtsɔɔmɔ Kuu lɛ Sɔɔmɔ Ajinafoi lɛ bibii nikaselɔi lɛ ateŋ mɛi ejwɛ saji; ehã amɛgba niiashikpamɔi ni amɛná dani amɛba Gilead, kɛ niiashikpamɔi hu ni amɛná yɛ skul lɛ mli.

Nikaselɔi lɛ gba tsɔsemɔ ni akɛhã amɛ lɛ mli nibii ni ewo amɛ hewalɛ lɛ ekomɛi. Akɛ nɔkwɛmɔnɔ lɛ, nikaselɔ lɛ eko gba nɔ ni ekase kɛjɛ Biblia amaniɛbɔɔ ni yɔɔ Luka yitso 10 lɛ mli. Yesu kaselɔi 70 ni etsu amɛ lɛ amii shɛ amɛhe waa akɛ amɛshiɛmɔ nitsumɔ lɛ ye omanye. Yesu hu ná miishɛɛ, shi ehã ekaselɔi lɛ le akɛ amɛkahã amɛmiishɛɛ lɛ damɔ yibii ni ejɛ amɛshiɛmɔ lɛ mli kɛba lɛ pɛ nɔ, moŋ lɛ nɔ titri ni esa akɛ ehã amɛmii ashɛ amɛhe ji, le ni amɛbaná amɛle akɛ Yehowa hiɛ sɔɔ amɛmɔdɛŋbɔi lɛ. Enɛ hãa wɔnaa akɛ, Yehowa hiɛ ni wɔsaa lɛ ji nɔ titri ni hãa wɔnáa miishɛɛ, jeee wɔshihilɛ.

Nyɛminuu Turner kane sane ni yɔɔ Filipibii 1:6 lɛ, ni ekɛwo nikaselɔi lɛ hewalɛ akɛ Yehowa ‘eje nitsumɔ kpakpa shishi’ yɛ amɛmli, ni Yehowa baaya nɔ ekɛ amɛ ahi shi.

“Nyɛkwɛa Yehowa.” Samuel Herd, ni eji Gbɛtsɔɔmɔ Kuu lɛ mli nyo lɛ hã nifeemɔ lɛ shishi wiemɔ titri lɛ. Etsɔɔ mli akɛ, wɔnyɛŋ wɔkɛ wɔhiŋmɛi nɛɛ ana Yehowa. Belɛ, te wɔbaafee tɛŋŋ ni wɔkwɛ lɛ mɔ?

Gbɛ kome ni wɔbaanyɛ wɔtsɔ nɔ wɔna Yehowa ji ní wɔjwɛŋ nibii ni ebɔ anɔ, ejaakɛ nomɛi hãa wɔleɔ ehe nii. Agbɛnɛ hu lɛ, Yehowa ‘ehã wɔtsui hiŋmɛii anɔ etse.’ (Efesobii 1:​18) Kɛ́ wɔtee nɔ wɔkane Biblia lɛ daa lɛ, wɔbaale Yehowa he nii babaoo. Ni kɛ́ wɔkaseɔ Yehowa he nii lɛ daa lɛ, wɔnuɔ he akɛ wɔbɛŋkɛ lɛ kpaakpa.

Esa akɛ wɔhé be kɛkane Sanekpakpai lɛ jogbaŋŋ ni wɔjwɛŋ nɔ, ejaakɛ Yesu wiemɔi kɛ enifeemɔi ni yɔɔ mli lɛ hãa wɔnaa mɔ tuuntu ni Yehowa ji. Yesu jie Yehowa sui lɛ akpo jogbaŋŋ aahu akɛ, enyɛ ewie akɛ: “Mɔ fɛɛ mɔ ni ena mi lɛ ena Tsɛ lɛ hu.”​— Yohane 14:9.

Nyɛminuu Herd wo toibolɔi lɛ hewalɛ akɛ, amɛkwɛ Yesu kɛle Yehowa, shi no pɛ kɛkɛ faaa, esa akɛ amɛkase nibii ni amɛna akɛ Yesu fee lɛ hu. Akɛ nɔkwɛmɔnɔ lɛ, taakɛ Yesu bɔ mɔdɛŋ elɛ mɛi kɛ niyenii lɛ, nakai nɔŋŋ esa akɛ wɔ hu wɔbɔ mɔdɛŋ wɔkɛ hiɛdɔɔ atsɔɔ mɛi Yehowa he nibii ni wɔkase lɛ.

Kɛ́ wɔkwɛ Yehowa loo wɔkɛ wɔhiŋmɛi ma enɔ lɛ, mɛni jɛɔ mli kɛbaa? Wɔbaanyɛ wɔná hiɛkɛnɔfɔɔ ni lalatsɛ lɛ ná lɛ eko; eŋma akɛ: “Mikɛ Yehowa toɔ mihiɛ daa: ní eyɔɔ mininejurɔ nɔ nɛɛ, mididãŋ.​—Lala 16:8.

Naamuu. Be ni nikaselɔi lɛ anine eshɛ amɛyijiemɔ woji lɛ anɔ etã lɛ, amɛteŋ mɔ kome kane wolo ko ni klasbii lɛ fee ekome kɛŋma lɛ kɛjie amɛhiɛsɔɔ kpo. No sɛɛ lɛ, Nyɛminuu Jackson kɛɛ nikaselɔi ni gbe skul lɛ naa akɛ, esaaa akɛ amɛnuɔ he akɛ esa akɛ nɔ fɛɛ nɔ ni amɛbaatsɔɔ mɛi lɛ afee nɔ ko hee loo nɔ ko srɔto. Nɔ ni esa akɛ amɛfɔ feemɔ ji, ní amɛtsɛ nyɛmimɛi lɛ atoi sɛɛ loo amɛkai amɛ yɛ nibii ni amɛle momo lɛ ahe. Nyɛminuu Jackson ma nɔ mi ehã amɛ akɛ, esa akɛ amɛba amɛhe shi be fɛɛ be. Ekɛfata he ehã amɛ akɛ, nɔ najiaŋ ni amɛbaagbala mɛi ajwɛŋmɔ kɛba amɛnɔ loo Gilead tsɔsemɔ ni amɛná lɛ nɔ lɛ, esa akɛ amɛgbala mɛi ajwɛŋmɔ kɛya Biblia lɛ kɛ wɔ-Biblia kasemɔ woji kɛ nibii krokromɛi lɛ anɔ. No ji, nɔ najiaŋ ni amɛbaaje mɛi ni nako hegbɛ loo amɛnáŋ hegbɛ amɛya Gilead skul lɛ eko lɛ anijiaŋ wui lɛ, esa akɛ amɛye amɛbua nyɛmimɛi Kristofoi nɛɛ koni amɛná asafo lɛ woji kɛ nibii ni afee ni amɛyɔɔ eko lɛ he sɛɛ kɛmɔ shi. Mɛi fɛɛ ni ba nifeemɔ lɛ shishi lɛ nu he akɛ awaje amɛ jogbaŋŋ, ni amɛtswa amɛfai shi akɛ amɛbaasɔmɔ amɛnyɛmimɛi lɛ.

Freeman kɛ Miriam Abbey

Joel Acebes

Arsen kɛ Alyona Airiiantc

Aynura Allahverdiyeva

Haja kɛ Lalatiana kɛriakaja

Dale kɛ Sonia Clarke

Michael kɛ Katrina Davies

Trent Edson

Aleksandr Fomin

Josué François

Juan Giovannelli

Mark kɛ Jill Hollis

Daniel Jovanović

Hugues kɛ Rachel Kabitshwa

Dong-in Kim

Yura Kucherenko

Robert kɛ Samantha Li

Gilles kɛ Christiane Mba

Kyaw kɛ Hka Tawm Naing

Victor kɛ Ami Namba

Ebenezer kɛ Sonnie Neal

David Nwagu

Meray Razzouk

Sóstenes kɛ Ely Rodrigues

Davy Sehoulia

Eki Soba

Simão Sona

Anja Van Looveren

Gwen Williams

K. Abdiel kɛ Armande Worou

^ kk. 2 Otsi lɛ shishijee mli lɛ, ato lala hee lɛ he gbɛjianɔ ahã mɛi fɛɛ ni baaba nifeemɔ lɛ.

^ kk. 32 Jeee maji lɛ fɛɛ atsɔɔ yɛ map lɛ nɔ lɛ.

^ kk. 34 Jeee klasbii lɛ fɛɛ agbɛ́i aŋma lɛ.

Ekrokomɛi Hu Nɛ

NAMƐI FEƆ YEHOWA SUƆMƆNAA NII ŊMƐNƐ?

Mɛɛ Srɔtoi Skul Ato he Gbɛjianɔ Ahã Gbɛgbalɔi?

Mɛɛ tsɔsemɔ krɛdɛɛ ato he gbɛjianɔ ahã mɛi ni kɛ amɛbe fɛɛ shiɛɔ maŋtsɛyeli lɛ he sane lɛ?