Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Afi 2014 Gwabɔɔ lɛ He Amaniɛbɔɔ

Maŋtsɛyeli lɛ Ená Afii 100!

Afi 2014 Gwabɔɔ lɛ He Amaniɛbɔɔ

Yɛ October 4, 2014 lɛ, toibolɔi aaafee 19,000 bua amɛhe naa kɛhã daa afi kpee ni Watch Tower Bible and Tract Society of Pennsylvania lɛ feɔ lɛ, nɔ ni ji 130 nɔ lɛ. Afee kpee lɛ yɛ Yehowa Odasefoi Akpee Asa ni yɔɔ Jersey City, New Jersey, yɛ U.S.A. lɛ. Asha lɛ vidio ni mɛi ni ebua amɛhenaa yɛ hei krokomɛi lɛ kwɛ yɛ nakai be kome too lɛ nɔŋŋ mli.

Mark Sanderson, ni ji Yehowa Odasefoi Agbɛtsɔɔmɔ Kuu lɛ mli nyo lɛ fee kpee lɛ sɛinɔtalɔ. Yɛ ehiɛkpamɔ wiemɔ lɛ mli lɛ, Nyɛminuu Sanderson ma nɔ mi akɛ afi nɛɛ kpee lɛ sa kadimɔ waa, ejaakɛ ekadiɔ afii 100 ni ato Mesia Maŋtsɛyeli lɛ shishi lɛ.

Nyɛminuu Sanderson wie nibii titri etɛ ni Maŋtsɛyeli lɛ etsu yɛ eklɛŋklɛŋ afii 100 nɛɛ mli lɛ ahe:

  • Jeŋ muu fɛɛ shiɛmɔ nitsumɔ lɛ. Yehowa yelikɛbuamɔ naa lɛ, ewebii lɛ egbo deŋme kɛshiɛ Maŋtsɛyeli lɛ he sane kpakpa lɛ. Yɛ afi 1914 lɛ, no mli lɛ shiɛlɔi akpei fioo pɛ yɔɔ, shi be ni afi 2014 sɔɔmɔ afi lɛ baa naagbee lɛ, shiɛlɔi lɛ eshwere kɛshɛ akpekpei kpaanyɔ kɛ sɛɛ. Wɔbaaya nɔ wɔkɛ ekãa ashiɛ kɛyashi Yehowa baakɛɛ ehi, agbe naa.

  • Maŋtsɛyeli lɛ shishi bii lɛ ahebuu akɛ kuu. Jamɔŋ kɛ maŋkwramɔŋ hiɛnyiɛlɔi ete shi amɛwo wɔ ni ehiii kwraa, ni amɛkã po akɛ amɛbaabule Yehowa Odasefoi ashishi kwraa. Kɛ̃lɛ, Yehowa ebu ejalɔi lɛ ahe akɛ kuu. Kunim babaoo ni wɔyeɔ yɛ saneyelihei srɔtoi, tamɔ Amerika Saneyelihe Wulu lɛ kɛ Yuropabii Asaneyelihe ni Yeɔ Hegbɛi ni Adesai Yɔɔ lɛ Ahe Saji yɛ lɛ, maa mɔ mi akɛ Yehowa miiya nɔ eebu wɔhe kɛbashi ŋmɛnɛ.

  • Eefee mɛi ni jɛ maji srɔtoi anɔ lɛ fɛɛ ekome. Nyɔŋmɔ Maŋtsɛyeli lɛ efee mɛi ni jɛ shihilɛi, maji, kɛ wiemɔi srɔtoi amli lɛ ekome, eye ebua amɛ ni amɛye gbɛtsiinii srɔtoi anɔ, ni efee amɛ ekome akɛ jámɔ kuu kome mli bii. Nyɛminuu Sanderson wie akɛ: “Enɛ ji naakpɛɛ nii ni Yehowa Nyɔŋmɔ pɛ baanyɛ afee.” Ema nɔ mi shii abɔ kɛtsɔɔ bɔ ni mɛi fɛɛ ni eba kpee lɛ ahiɛ sɔ hegbɛ ni amɛná akɛ amɛba daa afi gwabɔɔ ni sa kadimɔ waa nɛɛ.

Okɛ Yehowa Abɔ Naanyo Vidioi Lɛ.

Oti kroko ni awie he ji Gbekɛbii avidioi srɔtoi ni afee ahã wɔ ni wɔkwɛ nɔ ni fe afii enyɔ nɛɛ. Klɛŋklɛŋ lɛ, Nyɛminuu Sanderson kɛ vidio ko ni tsɔɔ gbekɛbii ni jɛ maji srɔtoi anɔ ni aabibii amɛ saji yɛ Okɛ Yehowa Abɔ Naanyo vidioi lɛ ahe lɛ kpa fã nɛɛ hiɛ. Bɔ ni gbekɛbii lɛ jɛ amɛtsuiaŋ amɛjie hiɛsɔɔ kpo yɛ vidioi nɛɛ ahe kɛ nɔ ni amɛkase kɛjɛ mli lɛ hã toibolɔi amii shɛ amɛhe waa.

No sɛɛ lɛ, ajie gbekɛbii avidioi nɛɛ ehee ko ni afee lɛ atsɔɔ toibolɔi lɛ. Vidio nɛɛ saneyitso ji Yehowa Baawa Bo ní Ofee Ekãa. Eheɔ minitii 12, ni ehãa Biblia amaniɛbɔɔ ni kɔɔ Israel gbekɛ yoo lɛ ní kɛ ekãa jie Yehowa yi etsɔɔ Naeman ŋa lɛ he lɛ bafeɔ tamɔ shihilɛ ko ni miiya nɔ amrɔ nɛɛ. (2 Maŋtsɛmɛi 5:1-14) Akɛ vidio nɛɛ ni yɔɔ wiemɔi ni fa fe 20 mli lɛ wo jw.org lɛ nɔ Ju, October 6, 2014.

JW Language.

Nyɛminuu Sanderson tswa adafi akɛ, afee nɔ ko hee ni ji JW Language kɛhã mobail foŋ kɛ amɛhenɔi lɛ, ni ebaaye abua Yehowa Odasefoi ni miitao amɛkase wiemɔi krokomɛi kɛlɛɛ amɛshiɛmɔ nitsumɔ lɛ mli lɛ waa. Nibii ni yɔɔ JW Language lɛ nɔ lɛ ekomɛi ji saji kɛ wiemɔi kukuji 4,000 kɛ sɛɛ ni jɛ majianɔ wiemɔi srɔtoi 18 amli. Aato gbɛjianɔ koni akɛ wiemɔi krokomɛi, shiɛmɔ wiemɔi, kɛ nibii krokomɛi hu afata he.

JW Broadcasting.

Be ni ahã toibolɔi lɛ ná amɛle akɛ, Yehowa Odasefoi efee Intanɛt TV steshɛŋ hee, ni aaka akwɛ yɛ Blɔfo pɛ mli amrɔ nɛɛ lɛ, amɛná miishɛɛ waa. Abaajɛ wɔnitsumɔhe yitso ni yɔɔ Brooklyn, New York, yɛ Amerika lɛ koni akɛ vidioi, lalai, kɛ Biblia kanemɔ ni afee lɛ drama awo nɔ. Kɛfata he lɛ, daa nyɔɔŋ nɔ lɛ abaajie nifeemɔ ko yɛ TV nɛɛ nɔ, ni Gbɛtsɔɔmɔ Kuu lɛ mli nyo ko, aloo mɛi ni yeɔ amɛbuaa amɛ lɛ ateŋ mɔ ko baatsu he nii.

Nyɛminuu Sanderson jie bɔ ni TV nɛɛ nɔ klɛŋklɛŋ nifeemɔ lɛ baaya nɔ ahã lɛ etsɔɔ toibolɔi lɛ. Stephen Lett, ni eji Gbɛtsɔɔmɔ Kuu lɛ mli nyo lɛ ji mɔ ni kwɛ klɛŋklɛŋ nifeemɔ lɛ nɔ yɛ TV lɛ nɔ; ajie gbɛjianɔ ni ato kɛ nibii ni afee kɛto TV steshɛŋ hee nɛɛ shishi lɛ atsɔɔ toibolɔi lɛ. JW TV lɛ bɔi nitsumɔ yɛ October 6, 2014 lɛ, ni abaanyɛ akwɛ yɛ tv.jw.org.

“Maŋtsɛyeli lɛ Ená Afii 100, ni Ekã He Eeye Nɔ.”

Samuel Herd, ni eji Gbɛtsɔɔmɔ Kuu lɛ mli nyo lɛ, jie vidio ko kɛtsɔɔ bɔ ni Nyɔŋmɔ Maŋtsɛyeli lɛ etee nɔ eye ebua wɔ fiofio ni wɔtee wɔhiɛ yɛ wɔshiɛmɔ nitsumɔ lɛ mli lɛ. Yɛ vidio nɛɛ mli lɛ, toibolɔi lɛ na asafo lɛ yinɔsaji, shihilɛi komɛi ni ba ahe nɔkwɛmɔ nii, niiashikpamɔi ni Odasefoi ni kɛ afii pii esɔmɔ lɛ gba, kɛ bɔ ni akɛ nibii tamɔ “Photo-Drama of Creation”; gramafon, odaseyeli kaad, tafãa kɛhã woji ajaramɔ, kɛ lɔle ni spika ma nɔ tsu nii kɛshiɛ sane kpakpa lɛ. Skul srɔtoi ni ato he gbɛjianɔ koni akɛtsɔse wɔ kɛhã shiɛmɔ nitsumɔ lɛ hu fata he.

Kɛ́ wɔsusu nibii ni Maŋtsɛyeli lɛ enyɛ etsu yɛ eklɛŋklɛŋ afii 100 ní ekɛye nɔ lɛ he lɛ, mɛɛ gbɛ nɔ wɔnáa he sɛɛ? Kɛ́ wɔfee nakai lɛ, ehãa wɔnuɔ he akɛ Maŋtsɛyeli lɛ ji nɔ ko ni yɔɔ diɛŋtsɛ, ni wɔgbɛkpamɔ kɛhã nibii ni ebaafee wɔsɛɛ lɛ mli bawaa.

Lalai Kɛhã Jámɔ.

David Splane, ni eji Gbɛtsɔɔmɔ Kuu lɛ mli nyo lɛ, hã mɛi ni eba kpee lɛ fɛɛ ná miishɛɛ be ni etswa adafi akɛ, aato gbɛjianɔ koni afee tsakemɔi yɛ wɔlala wolo ni ji Lá Ohã Yehowa lɛ mli lɛ. Abaafee lɛ tamɔ bɔ ni Jeŋ Hee Shishitsɔɔmɔ Blɔfo nɔ hee lɛ sɛɛ kɛ enaabui lɛ yɔɔ lɛ pɛpɛɛpɛ. Nibii kpakpai ni akɛbaafee lalawolo hee nɛɛ hãa wɔnaa bɔ ni lala he hiaa waa hã yɛ wɔjamɔ mli.

Nyɛminuu Splane kɛfata he akɛ, akɛ lalai hei fioo baafata he. Shi ehe ehiaaa ni wɔmɛɔ koni akala lalawolo hee lɛ dani wɔbɔi lalai hei lɛ lamɔ. Kɛ́ afee lala hei lɛ, akɛbaawo jw.org lɛ nɔ.

Alá lala hei nɛɛ etɛ ni Bethel weku lɛ etsɔ hiɛ amɛkase yɛ otsi ni tsɔ hiɛ lɛ mli lɛ yɛ kpee nɛɛ shishi. Nyɛminuu Splane nyiɛ lalɔi akuu ko hiɛ kɛlá lala hee ni yitso ji “Kristo Miiye Maŋtsɛ—E-Maŋtsɛyeli lɛ Aba!” Aje gbɛ afo lala nɛɛ koni akɛye afi 100 ni Maŋtsɛyeli lɛ ená kɛjɛ be ni ato shishi lɛ he gbi jurɔ. Be ni lalɔi akuu lɛ lá amɛgbe naa lɛ, toibolɔi lɛ kɛ amɛfee ekome kɛlá agbɛnɛ. Sɛɛ mli be ni kpee lɛ yaa nɔ lɛ, lalɔi akuu lɛ kɛ toibolɔi lɛ fɛɛ lá lala hee kroko ni yitso ji “Hã Wɔná Ekãa.”

Abibii Mɛi Komɛi Saji.

Yɛ vidio ko ni ajie lɛ mli lɛ, Gerrit Lösch, ni eji Gbɛtsɔɔmɔ Kuu lɛ mli nyo lɛ, bibii gbalashihilɛ mli hefatalɔi etɛ ni amɛkɛ afii nyɔŋmai komɛi esɔmɔ yɛ Betel lɛ saji. Amɛgba tsakemɔi babaoo ni amɛna yɛ afii ni eho lɛ amli ni tsɔɔ akɛ Nyɔŋmɔ webii lɛ miiya amɛhiɛ. Nyɛminuu Lösch tsɔɔ mli akɛ, Biblia lɛ gba fɔ̃ shi akɛ tsakemɔi baaba, ni ewo mɛi fɛɛ hewalɛ koni amɛya nɔ amɛkɛ Yehowa gbɛjianɔtoo ni miiya ehiɛ lɛ anyiɛ.Yesaia 60:17.

“Saji kɛ Nɔ He Mfonirii ni Amɛfeɔ.”

Nyɛminuu Splane hã wiemɔ nɛɛ kɛtsɔɔ nɔ hewɔ ni sɛɛkpee nɛɛ, wɔwoji lɛ efɔɔɔ saji kɛ nɔ he mfonirii ni amɛfeɔ lɛ ahe wiemɔ tsɔ tamɔ be ko ni eho lɛ.

Be ko ni eho lɛ, wɔsusu akɛ hii kɛ yei anɔkwafoi babaoo komɛi ni Biblia lɛ wie amɛhe lɛ feɔ wɔbeiaŋ nɛɛ Kristofoi anɔkwafoi akui komɛi ahe mfoniri. Nakai nɔŋŋ wɔsusu Biblia mli amaniɛbɔi komɛi ahe akɛ amɛ ji gbalɛ ni kɔɔ Nyɔŋmɔ tsuji ni yɔɔ ŋmɛnɛ lɛ ahe. Anɔkwa, nibii tamɔ nɛkɛ akasemɔ baanyɛ afee miishɛɛ waa. Kɛ́ nakai lɛ, mɛni hewɔ wɔwoji ni baa sɛɛkpee nɛɛ efɔɔɔ nibii nɛɛ ahe wiemɔ lɛ?

Ŋmalɛi lɛ hãa wɔnaa akɛ, mɛi komɛi kɛ nifeemɔi komɛi ni Biblia tsĩ amɛ tã lɛ feɔ mɔ ko loo nɔ kroko kwraa he mfoniri. Yɛ hei ni Biblia lɛ feɔ shishinumɔ ni yɔɔ sane lɛ kɛ nɔ ni he mfoniri ni efeɔ lɛ faŋŋ lɛ, wɔkɛ tsuijurɔ kpɛlɛɔ nɔ. Nyɛminuu Splane wie akɛ: “Shi kɛ́ Biblia lɛ ewieee nɔ ko yɛ he lɛ, esa akɛ wɔfee dioo yɛ he.” Esa akɛ wɔkwa nakai saji lɛ amli kolimɔ. Kɛfata he lɛ, kɛ́ wɔfiteɔ bei babaoo kɛtaoɔ saji nɛɛ kɛ nibii ahe mfonirii ni amɛfeɔ, kɛ amɛmlibai amli lɛ, ebaajie wɔjwɛŋmɔ kɛje nibii ni he hiaa ní esa akɛ wɔkase kɛjɛ Biblia mli amaniɛbɔi nɛɛ amli lɛ anɔ—ekɔɔɔ he eko kɛ́ wɔhiɛnɔkamɔ ji wɔbaaya ŋwɛi loo wɔbaahi shikpɔŋ lɛ nɔ.Romabii 15:4. *

“Ani ‘Obaaya nɔ Obu’?”

Wiemɔ nɛɛ ni Nyɛminuu Lett hã lɛ jaje shishinumɔ ni wɔhiɛ yɛ Yesu abɛbua ni kɔɔ oblayei froi nyɔŋma lɛ ahe lɛ he. (Mateo 25:1-13) Bianɛ lɛ, wɔnu abɛbua nɛɛ shishi yɛ nɛkɛ gbɛ nɔ: Ayemforo wu lɛ ji Yesu, ni oblayei froi lɛ ji Yesu sɛɛnyiɛlɔi ni afɔ amɛ mu lɛ. (Luka 5:34, 35; 2 Korintobii 11:2) Abɛbua lɛ kɔɔ naagbee gbii lɛ, ní baaba naagbee yɛ amanehulu kpeteŋkpele lɛ mli he. Be ni Yesu wieɔ oblayei froi kwashiai enumɔ lɛ ahe lɛ, ekɛɛɛ akɛ esɛɛnyiɛlɔi ni afɔ amɛ mu lɛ ateŋ babaoo baafee mɛi ni yeee anɔkwa ní baabi ni atsake amɛ. Moŋ lɛ, no beiaŋ lɛ ekɛ kɔkɔbɔɔ ko ni yɔɔ hiɛdɔɔ miihã. Taakɛ oblayei froi enumɔ ji hiɛshikalɔi ni enumɔ hu kwashiai ni lɛ, hegbɛ yɛ kɛhã mɛi ni afɔ amɛ mu lɛ ateŋ mɔ fɛɛ mɔ akɛ ehala akɛ ebaafee mɔ ni hiɛ kã shi ni saa ehe etoɔ aloo mɔ ni yeee anɔkwa

Yɛ ŋaa ni awo wɔ akɛ wɔkakoli nibii amli fe nine lɛ naa lɛ, nilee bɛ mli akɛ wɔbaakoli abɛbua nɛɛ mli fitsofitso kɛ yiŋtoo akɛ, wɔmiitao wɔle nɔ ni nibii ni atsĩ tã yɛ mli lɛ eko fɛɛ eko tsɔɔ. Yɛ no najiaŋ lɛ, esa akɛ wɔbɔ mɔdɛŋ wɔtao nikasemɔi ni yɔɔ abɛbua lɛ mli. Kɛ́ wɔfata mɛi ni afɔ amɛ mu lɛ ahe jio, “gwantɛŋi krokomɛi” lɛ ahe jio lɛ, eji sɔ̃ ni kã wɔteŋ mɔ fɛɛ mɔ nɔ akɛ wɔhã wɔla lɛ akpɛ waa ní “wɔya nɔ wɔbu.” (Yohane 10:16; Marko 13:37; Mateo 5:16) Mɔ ko nyɛŋ aye Nyɔŋmɔ anɔkwa ahã bo. Esa akɛ wɔteŋ mɔ fɛɛ mɔ ‘akɔ wala,’ ni wɔbaanyɛ wɔfee enɛ kɛ́ wɔhã wɔhiɛ hi wɔhe nɔ yɛ mumɔŋ ni wɔkɛ ekãa tsu shiɛmɔ nitsumɔ lɛ.5 Mose 30:19.

“Talɛntai lɛ Ahe Abɛbua Lɛ.”

Anthony Morris, ni eji Gbɛtsɔɔmɔ Kuu lɛ mli nyo lɛ hu bawie, eye ebua toibolɔi lɛ koni amɛnu tsakemɔ ni afee yɛ abɛbua ni kɔɔ talɛntai lɛ ahe lɛ shishi. (Mateo 25:14-30) Amrɔ nɛɛ wɔnu shishi akɛ nuŋtsɔ lɛ (Yesu), ni yɔɔ abɛbua lɛ mli lɛ baajuro tsuji (esɛɛnyiɛlɔi anɔkwafoi ni afɔ amɛ mu ni yɔɔ shikpɔŋ lɛ nɔ) lɛ wɔsɛɛ kɛ́ eba ni ebaŋɔ amɛ kɛtee ŋwɛi lɛ. Be ni Yesu wieɔ nɔ ni baaba “nyɔŋ fɔŋ kɛ anihaolɔ” lɛ nɔ lɛ, ekɛ no etsɔɔɔ akɛ esɛɛnyiɛlɔi ni afɔ amɛ mu lɛ ateŋ babaoo baafee mɛi ni yeee anɔkwa. Moŋ lɛ, no mli lɛ eebɔ mɛi ni afɔ amɛ mu lɛ kɔkɔ koni amɛkɛ hiɛdɔɔ atsu nii ní amɛkwa nyɔŋ fɔŋ lɛ sui kɛ nifeemɔi.

Mɛni wɔbaanyɛ wɔkase yɛ abɛbua nɛɛ mli? Nuŋtsɔ ni awie ehe yɛ abɛbua lɛ mli lɛ tuu nɔ ko ni jara wa, loo ehe hiaa waa ewo etsuji lɛ adɛŋ. Nakai nɔŋŋ Yesu hu etuu nɔ ko ni enaa akɛ ehe hiaa waa ewo sɛɛnyiɛlɔi lɛ adɛŋ—efã amɛ akɛ amɛshiɛ ní amɛfee mɛi kaselɔi. Eekpa gbɛ akɛ wɔ fɛɛ wɔkɛ wɔhe baawo nitsumɔ nɛɛ mli kɛ ekãa bɔ ni wɔshihilɛ baaŋmɛ gbɛ. Nyɛminuu Morris jie mɛi ni eba kpee lɛ ayi yɛ ekãa ni amɛkɛfiɔ Maŋtsɛyeli nitsumɔi asɛɛ lɛ hewɔ.

“Namɔ Etsɛŋ Ebaatutua Nyɔŋmɔ Webii Lɛ?”

 

Enɛ ji naagbee wiemɔ lɛ, Nyɛminuu Geoffrey Jackson ni eji Gbɛtsɔɔmɔ Kuu lɛ mli nyo lɛ hã, ni eji saneyitso ni sa kadimɔ waa. Nyɛminuu Jackson wie tutuamɔ ni Gog ni jɛ Magog lɛ kɛbaaba Nyɔŋmɔ webii lɛ anɔ wɔsɛɛ lɛ he.Ezekiel 38:14-23.

Be ko ni eho lɛ, wɔnu shishi akɛ Gog ji gbɛ́i kroko ni akɛhã Satan Abonsam be ni ashwie lɛ kɛje ŋwɛi lɛ. Kɛ̃lɛ, Nyɛminuu Jackson kɛ toibolɔi lɛ susu sanebimɔi ni he hiaa waa ni shishinumɔ nɛɛ teɔ amɛshi lɛ ahe. Ákɛ nɔkwɛmɔnɔ lɛ, Yehowa gba akɛ, kɛ́ akpãta Gog hiɛ lɛ, ‘abaaŋɔ lɛ ahã loofɔji looyelɔi srɔtoi fɛɛ kɛ ŋã nɔ kooloi ní amɛye lɛ.’ (Ezekiel 39:4) Yehowa gba hu akɛ abaafu “Gog kɛ esafo yuu lɛ fɛɛ” yɛ shikpɔŋ lɛ nɔ. (Ezekiel 39:11) Shi te aaafee tɛŋŋ ni nibii nɛɛ ateŋ eko aba mumɔŋ bɔɔnɔ ko nɔ lɛ? Akɛ Satan baawo bu kwɔŋkwɔŋ ko mli afii 1,000, jeee ni aye lɛ aloo afũ lɛ. (Kpojiemɔ 20:1, 2) Kɛfata he lɛ, kɛ́ afii 1,000 lɛ ba naagbee lɛ, abaajie Satan kɛjɛ etsuŋwoo lɛ mli “ni ebaaje kpo ní eyalaka nakai jeŋmaji ni yɔɔ shikpɔŋ lɛ koji ejwɛ lɛ, Gog kɛ Magog.” (Kpojiemɔ 20:7, 8) Eyɛ faŋŋ akɛ, kɛ́ Satan nɔŋŋ ji Gog lɛ, enyɛŋ elaka lɛ diɛŋtsɛ ehe.

Nyɛminuu Jackson tsɔɔ mli akɛ Gog ni jɛ Magog ni yɔɔ Ezekiel gbalɛ lɛ mli lɛ damɔ shi kɛhã maji ni baafee ekome kɛte shi awo Nyɔŋmɔ webii yɛ wɔsɛɛ be ni kã wɔhiɛ lɛ mli, shi jeee Satan. No hewɔ lɛ etamɔ nɔ ni tutuamɔ ni “kooyigbɛ maŋtsɛ lɛ” kɛ “shikpɔŋ lɛ nɔ maŋtsɛmɛi lɛ” kɛbaaba lɛ nɔŋŋ ji Gog tutuamɔ lɛ.Daniel 11:40, 44, 45; Kpojiemɔ 17:12-14; 19:19.

Namɔ “kooyigbɛ maŋtsɛ lɛ” damɔ shi kɛhã? Be baatsɔɔ. Fɛɛ sɛɛ lɛ, kɛ́ wɔkwɛ bɔ ni ayaa nɔ afeɔ nibii ni baaba wɔsɛɛ, ni amɛmlibaa bɛŋkɛɔ nɛɛ ashishinumɔ faŋŋ ahãa wɔ lɛ, ewajeɔ wɔhemɔkɛyeli lɛ waa. Wɔsheee tutuamɔ ni abaatutua Nyɔŋmɔ webii lɛ gbeyei, ejaakɛ wɔle akɛ kɛ́ Gog ni jɛ Magog lɛ ba wɔ tutuamɔ lɛ, abaaye enɔ kunim kwraa, ni abaakpãtã ehiɛ butuu—ni Nyɔŋmɔ webii lɛ baahi shi kɛya naanɔ. *

Naamuu.

Nyɛminuu Sanderson tswa adafi akɛ afee Jeŋ Hee Shishitsɔɔmɔ Blɔfo nɔ bibioo. Kɛfata he lɛ, aato gbɛjianɔ koni arikɔdi Biblia hee lɛ koni anyɛ atswa abo toi; ni abaahã aŋkroaŋkroi akane Biblia mli mɛi srɔtoi lɛ awiemɔi koni arikɔdi. Akɛ Biblia ni atswaa aboɔ toi nɛɛ baawo jw.org lɛ nɔ fiofio, akɛ Mateo wolo lɛ baaje shishi.

Nyɛminuu Sanderson tswa adafi akɛ, ŋmalɛ kɛhã afi 2015 lɛ ji Lala 106:1: “Nyɛdaa Yehowa shi, ejaakɛ ehi.” Ewo toibolɔi lɛ fɛɛ hewalɛ koni gbi fɛɛ gbi lɛ, amɛtao nibii ni amɛbaanyɛ amɛfee kɛda Yehowa shi.

Akɛ lala ni ji etɛ nɔ yɛ lala hee lɛ mli ni yitso ji “Ogbɛ́i Ji Yehowa” lɛ kpa kpee lɛ. Gbɛtsɔɔmɔ Kuu lɛ mli bii kpawo lɛ fɛɛ yafata lalɔi akuu lɛ he yɛ wiemɔ kpoku lɛ nɔ, ni toibolɔi lɛ fɛɛ fee ekome kɛlá lala hee ni ŋɔɔ nɛɛ—enɛ kɛ kpee ni sa kadimɔ waa nɛɛ ba naagbee!

^ kk. 22 Wiemɔ nɛɛ kɛ wiemɔi enyɔ ni ahã kɛnyiɛ sɛɛ lɛ damɔ sane ni baaje kpo yɛ March 15, 2015, Buu Mɔɔ ni ji nikasemɔ nɔ lɛ nɔ.

^ kk. 31 Wiemɔ nɛɛ damɔ sane ni baaje kpo yɛ May 15, 2015, Buu Mɔɔ ni ji nikasemɔ nɔ lɛ nɔ.

Ekrokromɛi Hu Nɛ

Sini ko ní Wajeɔ Hemɔkɛyeli Waa lɛ Eye Afii 100

Afi nɛɛ ji afii 100 ni ajie “Photo-Drama of Creation” lɛ klɛŋklɛŋ kwraa, ni eji sini ko ni ato he gbɛjianɔ koni akɛwaje hemɔkɛyeli ni mɛi yɔɔ yɛ Biblia lɛ mli akɛ eji Nyɔŋmɔ Wiemɔ lɛ.