Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Gbɛfãa Ko ni Mihiɛ Kpaŋ Nɔ Kɔkɔɔkɔ

Gbɛfãa Ko ni Mihiɛ Kpaŋ Nɔ Kɔkɔɔkɔ

Daa afi lɛ, mɛi akpekpei komɛi yasharaa shi yɛ Yehowa Odasefoi anitsumɔhe nine ni yɔɔ Amerika lɛ, kɛ amɛnitsumɔhe yitso ni yɔɔ New York State lɛ. Atsɛɔ nitsumɔhei nɛɛ akɛ Betel, eji Hebri gbɛ́i ni shishi ji “Nyɔŋmɔ Shĩa.” Mɛi fãa gbɛ kɛjɛɔ hei ni bɛŋkɛ kɛ shɔŋŋshɔŋŋ gbɛ kɛbakwɛɔ bɔ ni afeɔ woji kɛ nibii lɛ, bɔ ni ato wɔnitsumɔ lɛ he gbɛjianɔ ahã, ni amɛbasaraa amɛnanemɛi ni sɔmɔɔ yɛ jɛmɛ lɛ hu. Mɔ ko ni shwe jɛmɛ yaa waa lɛ basara jɛmɛ nyɛsɛɛ nɛɛ.

Marcellus, ni eji Yehowa Odasefonyo ko ni yɔɔ Anchorage, yɛ Alaska, ni yɔɔ U.S.A. lɛ ji mɔ ko ni nyɛɛɛ ewie tsɔ yɛ strok ni bɔi enaagbamɔ afii komɛi nɛ lɛ hewɔ. * Etaa helatsɛmɛi ashwiili mli be fɛɛ be, ni nɔ fɛɛ nɔ ni ebaafee lɛ, ja aye abua lɛ dã. Naagbai nɛɛ fɛɛ sɛɛ lɛ, ekã etsui nɔ waa akɛ ebaayasara Betel. Nyɛsɛɛ nɛɛ lɛ, egbɛkpamɔ lɛ ba mli.

Nuu ko ni atsɛɔ lɛ Corey, ni eji Marcellus naanyo waa ni ye ebua lɛ kɛto gbɛfãa lɛ he gbɛjianɔ lɛ kɛɛ akɛ, “Ekɛfeee shwɛmɔ kwraa. Daa nɛɛ etswaa mi, ni ebiɔ mi he ni mikɛ gbɛfãa lɛ he gbɛjianɔtoo eshɛ. Akɛni ‘Hɛɛ’ kɛ ‘Dabi’ titri ji nɔ ni Marcellus nyɛɔ ekɛɔ hewɔ lɛ, kɛ́ etswa mi lɛ, mibiɔ lɛ saji kuku.” Amɛsanegbaa lɛ yaa lɛ nɔ ko tamɔ nɛkɛ:

“Ani ootao maba jɛmɛ?”

“Dabi.”

“Ani ootao matsɛ datrɛfonyo lɛ?”

“Dabi.”

“Oobi ogbɛfãa kɛmiiya Betel lɛ he sane?”

“Hɛɛ.”

“Kɛkɛ lɛ esa akɛ matsɔɔ lɛ he ni mikɛ gbɛfãa lɛ he gbɛjianɔtoo eshɛ. Be ni eshɛ nakai oti lɛ he lɛ, mimii shɛ mihe waa.”

Marcellus ye gbɛtsiinii babaoo anɔ bɔ ni afee ni enyɛ efã gbɛ lɛ. Akɛni shika ni baa edɛŋ lɛ faaa kwraa hewɔ lɛ, etsu susu afii enyɔ dani enyɛ ená shika ekɛwo egbɛfãa kɛmiiya New York ni jekɛmɔ shɛɔ kilomitai 5,400 lɛ he nyɔmɔ. Akɛni ebɛ gbɔmɔtsoŋ hewalɛ hewɔ lɛ, ehe bahia ni ená mɔ ko ni baafata ehe koni eye ebua lɛ. Agbɛnɛ hu lɛ, ehe bahia ni ebi edatrɛfonyo lɛ gbɛ kɛhã gbɛfãa lɛ, ni enine shɛ gbɛŋmɛɛ lɛ nɔ be ni eshwɛ gbii fioo ni ɛropleŋ ni ekɛbaaya lɛ baashi.

Be ni Marcellus yashɛ New York lɛ, akɛ lɛ yashara shi yɛ Yehowa Odasefoi asafo lɛ nitsumɔhei ni yɔɔ Brooklyn, Patterson, kɛ Wallkill lɛ. Ena woji akalamɔ tsɔne wujiwuji ni miikala woji kɛ Biblia. Ni atsɔɔ lɛ bɔ ni ato wɔnitsumɔ lɛ he gbɛjianɔ hu ahã. Ena mfonirii komɛi ni akɛkpɛtɛ shi koni mɛi ni baa jɛmɛ lɛ akwɛ; ekomɛi lɛ aŋma yɛ yiteŋ akɛ “Biblia lɛ kɛ Nyɔŋmɔ Gbɛ́i Lɛ,” eko hu lɛ aŋma yɛ yiteŋ akɛ “Mɛi ni Yehowa Gbɛi Kã Amɛnɔ.” Be mli ni akɛ lɛ sharaa shi lɛ, ená nanemɛi babaoo. Eji gbɛfãa ko ni ehiɛ kpaŋ nɔ kɔkɔɔkɔ lɛɛlɛŋ!

Mɛi pii yɛ ni kɛ́ abi koni amɛgba nibii ni amɛyana yɛ Betel kɛ bɔ ni amɛnu he amɛhã lɛ, amɛnáaa wiemɔi ni baanyɛ atsɔɔ bɔ ni amɛmii shɛ amɛhe waa hã lɛ mli. Shi be ni abi Marcellus akɛ, “Ani sɛɛnamɔ yɛ deŋme ni ogbo kɛyashara shi yɛ Betel lɛ he?” lɛ, akɛni enyɛɛɛ ewie babaoo hewɔ lɛ, ehã hetoo akɛ: “Hɛɛ. Hɛɛ. Hɛɛ!”

Kɛ́ okɛ oweku lɛ yashara shi yɛ Betel lɛ, ebaanyɛ ewo nyɛ hewalɛ waa, ni nyɛmii hu baashɛ nyɛhe taakɛ eba lɛ yɛ Marcellus gbɛfaŋ lɛ. Mɔ fɛɛ mɔ baanyɛ ayashara shi yɛ wɔnitsumɔhe niji ni yɔɔ je lɛŋ he fɛɛ he lɛ. Bɛ obaasumɔ ni obasara wɔ?

^ kk. 3 Marcellus gbo yɛ May 19, afi 2014 be mli ni atsuɔ sane ni okaneɔ nɛɛ he nii lɛ.

Ekrokromɛi Hu Nɛ

Mɛni Ji Betel?

Betel ji he ko ni sa jogbaŋŋ ni hiɛ ehe kwraa ni akɛtsuɔ yiŋtoo ko ni he hiaa waa he nii. Kanemɔ koni ole mɛi ni sɔmɔɔ yɛ jɛi lɛ ahe saji krokomɛi.

Mɛni Atsuɔ yɛ Yehowa Odasefoi Anitsumɔhe Nine Lɛ?

Aŋmɛɔ mɛi agbɛ ni amɛbashara shi yɛ wɔnitsumɔhe nine lɛ ateŋ eko fɛɛ eko. Wɔmiifɔ bo nine koni obashara shi!