Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Yehowa Odasefoi

Ga

Ani Yiwalaheremɔ ni Nyɛtaoɔ Hewɔ Nyɛbɔɔ Mɔdɛŋ Nyɛyaa Mɛi Ashiai Nyɛyashiɛɔ Lɛ?

Ani Yiwalaheremɔ ni Nyɛtaoɔ Hewɔ Nyɛbɔɔ Mɔdɛŋ Nyɛyaa Mɛi Ashiai Nyɛyashiɛɔ Lɛ?

Dabi. Wɔkɛ wɔhe woɔ shĩa kɛ shĩa shiɛmɔ nitsumɔ lɛ mli be fɛɛ be, shi wɔkɛɛɛ akɛ no ni wɔtsuɔ hewɔ lɛ esa akɛ ahere wɔyiwala. (Efesobii 2:8) Mɛni Hewɔ?

Bo lɛ susumɔ sane nɛɛ he okwɛ: Ŋɔɔ lɛ akɛ nuu ejurɔfeelɔ ko ekɛɛ akɛ mɔ fɛɛ mɔ ni baashɛ he ko pɔtɛɛ kɛ be pɔtɛɛ ko ni etsɔɔ lɛ, ebaake mɔ lɛ nɔ ko ni jara wa. Kɛ́ oheɔ mɔ lɛ shiwoi oyeɔ lɛɛlɛŋ lɛ, aso okɛ egbɛtsɔɔmɔi lɛ tsuŋ nii? Okɛbaatsu nii tsɔ! Ekolɛ, obaaha onanemɛi kɛ owekumɛi hu ale sane nɛɛ bɔ ni afee ni amɛ hu amɛná he sɛɛ. Fɛɛ sɛɛ po lɛ, jeee nuu lɛ gbɛtsɔɔmɔ lɛ sɛɛ ni onyiɛ hewɔ ni oná nikeenii lɛ. Onine shɛ nikeenii lɛ nɔ akɛni eesumɔ ni ekɛke bo lɛ hewɔ.

Nakai nɔŋŋ Yehowa Odasefoi heɔ Nyɔŋmɔ shiwoo akɛ ebaahere mɛi fɛɛ ni boɔ lɛ toi lɛ ayiwala lɛ amɛyeɔ. (Romabii 6:23) Wɔbɔɔ mɔdɛŋ wɔkɛ mɛi gbaa wɔhemɔkɛyeli lɛ he sane, kɛ gbɛkpamɔ akɛ amɛbaaná Nyɔŋmɔ shiwoi lɛ ahe sɛɛ. Shi jeee wɔjwɛŋmɔ ji akɛ wɔhe ni wɔkɛ woɔ shiɛmɔ nitsumɔ lɛ mli lɛ hewɔ esa akɛ ahere wɔyiwala. (Romabii 1:17; 3:28) Anɔkwa, adesa ko kwraa nyɛŋ ekɛ emɔdɛŋbɔɔ aná jɔɔmɔ ni nɔ bɛ nɛɛ kɛjɛ Nyɔŋmɔ ŋɔɔ. “Ehere wɔyiwala yɛ emɔbɔnalɛ lɛ hewɔ, ni jeee nibii kpakpa ni wɔtsu lɛ hewɔ.Tito 3:5, Contemporary English Version.