Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Yehowa Odasefoi

Ga

Mɛni Hewɔ Nyɛyeee Blonya Lɛ?

Mɛni Hewɔ Nyɛyeee Blonya Lɛ?

Susumɔ ni ejaaa ni mɛi hiɛ yɛ wɔhe

Afo Atã: Akɛni Yehowa Odasefoi heee Yesu nɔ amɛyeee hewɔ ni amɛyeee Blonya lɛ.

Anɔkwa Sane: Kristofoi ji wɔ. Wɔheɔ wɔyeɔ akɛ Yesu Kristo pɛ nɔ abaatsɔ aná yiwalaheremɔ.Bɔfoi lɛ Asaji 4:12.

Afo Atã: Nyɛkɛ mligbalamɔi baa wekui amli, ejaakɛ nyɛkɛɔ mɛi akɛ amɛkaye Blonya.

Anɔkwa Sane: Wekui ahilɛkɛhamɔ kã wɔtsui nɔ pam, ni wɔtsɔɔ Biblia lɛ nɔ wɔkpɛɔ wekui wɔfeɔ amɛ ekome.

Afo Atã: Nyɛhaa “Blonya mumɔ” ni ji ejurɔfeemɔ, hejɔlɛ ni abaa ahaa shikpɔŋ lɛ, kɛ gbɔmɛi ahe tsuijurɔ ni anáa lɛ ŋmɛɔ nyɛ.

Anɔkwa Sane: Wɔbɔɔ mɔdɛŋ wɔfeɔ mɛi ejurɔ, ni wɔkɛ mɛi hiɔ shi yɛ toiŋjɔlɛ mli daa gbi. (Abɛi 11:25; Romabii 12:18) Akɛ nɔkwɛmɔnɔ lɛ, gbɛ nɔ ni wɔtsɔɔ wɔfeɔ wɔkpeei lɛ kɛ bɔ ni wɔshiɛɔ lɛ kɛ Yesu fãmɔ akɛ, “Yaka nyɛná, yaka nyɛŋɔhaa!” lɛ kpãa gbee. (Mateo 10:8) Kɛfata he lɛ, wɔgbalaa mɛi ajwɛŋmɔ kɛyaa Nyɔŋmɔ Maŋtsɛyeli lɛ nɔ akɛ nɔ pɛ ni kɛ toiŋjɔlɛ diɛŋtsɛ baaba shikpɔŋ lɛ nɔ.Mateo 10:7.

Mɛni Hewɔ Yehowa Odasefoi yeee Blonya lɛ?

  • Yesu fã akɛ wɔkɛ nifeemɔ krɛdɛɛ ko akai egbele lɛ, jeee efɔmɔ lɛ.Luka 22:19, 20.

  • Yesu bɔfoi lɛ kɛ emra beaŋ kaselɔi lɛ yeee Blonya. Wolo ko (The New Catholic Encyclopedia) kɛɛ akɛ, “ato Yesu fɔmɔ gbijurɔyeli lɛ shishi yɛ afi 243 [Ŋ.B.] loo sɛɛ mli,” beni Yesu bɔfoi lɛ ateŋ naagbee mɔ kwraa lɛ egbo nɔ ni fe afii 100 sɛɛ.

  • Nɔ ko kwraa bɛ ni maa nɔ mi akɛ afɔ Yesu yɛ December 25; atsɔko be ni afɔ lɛ lɛ yɛ Biblia lɛ mli.

  • Wɔheɔ wɔyeɔ akɛ Nyɔŋmɔ ekpɛlɛɛɛ Blonyayeli nɔ, ejaakɛ eshishifã jɛ wɔŋjamɔ kusumii kɛ nifeemɔi amli.2 Korintobii 6:17.

Mɛni hewɔ nyɛyeee Blonya kɛkɛ koni akpa nyɛnaa gbamɔ?

Tsɛ, mɛi babaoo le akɛ Blonya jɛ wɔŋjamɔ mli ni Biblia lɛ fiii sɛɛ moŋ, shi amɛyeɔ kɛ̃. Nakai mɛi lɛ baabi akɛ: Mɛni hewɔ esa akɛ Kristofoi komɛi akpɛ amɛyiŋ akɛ amɛyeee Blonya? Mɛni hewɔ amɛha enɛ efee sane?

Biblia lɛ woɔ wɔ hewalɛ ni wɔjwɛŋ wɔha wɔhe, ni ‘wɔyoo nii ni ji Nyɔŋmɔ suɔmɔnaa nii ni sa ehiɛ jogbaŋŋ ni hi kɛwula shi lɛ.’ (Romans 12:1, 2) Eyeɔ ebuaa wɔ koni wɔkpɛtɛ anɔkwale lɛ he. ( Yohane 4:23, 24) No hewɔ lɛ, wɔsusuɔ bɔ ni mɛi krokomɛi naa wɔ amɛhaa lɛ he moŋ nɛ, kɛlɛ wɔhiɔ shi yɛ Biblia mli shishitoo mlai anaa, kɛ́ no haaa mɛi asumɔ wɔsane po.

Eyɛ mli akɛ wɔhala akɛ wɔyeee Blonya moŋ, kɛlɛ wɔŋmɛɔ mɛi agbɛ koni amɛdiɛŋtsɛ amɛkpɛ amɛyiŋ yɛ sane nɛɛ he. Wɔkɛ wɔhe wooo mɛi a-Blonyayeli saji amli.

 

 

 

Ekrokomɛi Hu Nɛ

SANEBIMƆI NI BIBLIA LƐ EHA HETOO

Mɛni Biblia Lɛ Kɛɔ Yɛ Blonya He?

Kɛ́ okane Blonyayeli kusumii 6 komɛi ahe sane, ni ole he ni amɛná amɛshishifã kɛjɛ lɛ, onaa baakpɛ ohe pam.