Shi kɛya he ni ato saneyitsei lɛ anaa yɛ lɛ

Yehowa Odasefoi Enyiɛ Yɔɔ Je Lɛŋ Fɛɛ?

Yehowa Odasefoi Enyiɛ Yɔɔ Je Lɛŋ Fɛɛ?

2018 Sɔɔmɔ Afi * Lɛ Amaniɛbɔɔ

Yehowa Odasefoi ayifalɛ ni yɔɔ jeŋ fɛɛ

8,579,909

Asafoi

119,954

Maji abɔ ni Yehowa Odasefoi shiɛɔ yɛ nɔ

240

Namɛi akaneɔ amɛ akɛ Odasefoi?

Mɛi ni wɔbuɔ amɛ akɛ Yehowa Odasefoi ji mɛi ni shiɛɔ Nyɔŋmɔ Maŋtsɛyeli lɛ he sanekpakpa lɛ daa nyɔɔŋ. (Mateo 24:14) Mɛi ni abaptisi amɛ ni amɛbatsɔmɔ Odasefoi kɛ mɛi ni abaptisiko amɛ ni miitsu shiɛmɔ nitsumɔ lɛ ji mɛi ni akaneɔ lɛ.

Ani esa akɛ mɔ awo shika ko dani abu lɛ akɛ Odasefonyo?

Dabi. Abiii ni mɔ ko awo shika dani abu lɛ akɛ Odasefonyo loo dani akɛ nitsumɔ pɔtɛɛ ko loo sɔɔmɔ hegbɛ ko awo edɛŋ yɛ asafo lɛ mli. (Bɔfoi 8:​18-​20) Anɔkwa, mɛi babaoo tsuɔ onia ni amɛhãaa mɔ ko ale. Odasefonyo fɛɛ Odasefonyo jɛɔ etsui mli ekɛ ebe, ehewalɛ, kɛ nibii ni eyɔɔ fĩɔ jeŋ muu fɛɛ nitsumɔ lɛ sɛɛ yɛ enyɛmɔ naa.​—2 Korintobii 9:7.

Te afeɔ tɛŋŋ aleɔ mɛi abɔ ni shiɛɔ daa nyɔɔŋ lɛ?

Daa nyɔɔŋ lɛ, Odasefoi lɛ kɛ amɛshiɛmɔyaa he amaniɛbɔɔ hãa onukpai ni yɔɔ amɛsafoi lɛ amli lɛ. Anyɛɛɛ amɛnɔ ni amɛkɛ amaniɛbɔɔ lɛ ahã.

Asafoi lɛ feɔ fɛɛ ekome ni amɛkɛ yibɔi ni amɛbaaná lɛ majeɔ nitsumɔhe nine ni yɔɔ he ni amɛyɔɔ lɛ. Nitsumɔhe niji lɛ hu kɛmajeɔ wɔnitsumɔhe yitso lɛ.

Yɛ sɔɔmɔ afi fɛɛ sɔɔmɔ afi naagbee lɛ, * anaa Odasefoi ayibɔ ni fe fɛɛ lɛ ni yɔɔ maŋ fɛɛ maŋ nɔ yɛ nakai afi lɛ mli. Abuaa yibɔi nɛɛ fɛɛ anaa, ni no hãa anaa Odasefoi abɔ ni yɔɔ jeŋ fɛɛ. Akɛ maŋ fɛɛ maŋ nɔ amaniɛbɔi lɛ woɔ wɔwɛbsaiti lɛ fã ni ji “Je Lɛŋ Hei Srɔtoi” lɛ shishi. Amaniɛbɔi nɛɛ woɔ wɔ hewalɛ tamɔ bɔ ni amaniɛbɔi ni tamɔ nakai lɛ wo klɛŋklɛŋ afi oha lɛ mli Kristofoi lɛ hewalɛ lɛ nɔŋŋ.​—Bɔfoi 2:​41; 4:4; 15:3.

Ani nyɛbuɔ mɛi ni kɛ nyɛbɔɔ shi amɛyaaa shiɛmɔ lɛ nyɛfataa Odasefoi abɔ ni yɔɔ lɛ ahe?

Eyɛ mli akɛ wɔbuuu mɛi nɛɛ wɔfataaa Odasefoi ni yɔɔ jeŋ fɛɛ lɛ ahe moŋ, shi wɔŋmɛɔ amɛ gbɛ ni amɛbaa wɔkpeei lɛ ashishi. Amɛteŋ mɛi babaoo baa Kristo Gbele Lɛ Kaimɔ ni wɔfeɔ daa afi lɛ, no hewɔ lɛ, kɛ́ ajie Odasefoi lɛ ayibɔ ni yɔɔ lɛ kɛjɛ mɛi abɔ ni baa Kristo Gbele Lɛ Kaimɔ lɛ shishi lɛ mli lɛ, wɔnaa mɛi ni jeee Odasefoi lɛ ayibɔ. Yɛ afi 2018 lɛ, mɛi 20,329,317 ba Kaimɔ lɛ.

Mɛi ni nyɛɛɛ aba wɔkpeei lɛ ateŋ mɛi babaoo náa gbɛjianɔ ni ato ni akɛ mɛi kaseɔ Biblia lɛ yɛ amɛshĩai ni aheee shika lɛ ahe sɛɛ. Yɛ afi 2018 lɛ, kɛ́ aja mli lɛ, daa nyɔɔŋ lɛ, wɔfee Biblia mli nikasemɔi 10,079,709, yɛ ekomɛi amli lɛ, akɛ mɛi pii kase nii lɛ shi kome.

Mɛni hewɔ Odasefoi ayibɔ ni yɔɔ maŋ lɛ woji amli lɛ fa fe nɔ ni nyɛyɔɔ lɛ?

Kɛ́ nɔyeli lɛ miikane mɛi lɛ, bei pii lɛ, amɛbiɔ mɛi lɛ jamɔ mli ni amɛyɔɔ. Akɛ nɔkwɛmɔnɔ lɛ, Amerika nitsumɔhe ni kaneɔ mɛi (U.S. Census Bureau) lɛ tsɔɔ mli akɛ kɛ́ amɛmiikane mɛi lɛ, “amɛbiɔ saji koni amɛkɛle jamɔi amli ni mɛi lɛ baakɛɛ amɛyɔɔ,” amɛkɛfata he akɛ, enɛ hewɔ lɛ, bei pii lɛ yibɔi ni wɔnáa lɛ “damɔɔ mɛi asusumɔi anɔ shi jeee bɔ ni eji lɛ diɛŋtsɛ.” Nɔ ni tamɔɔɔ nakai lɛ, mɛi pɛ ni wɔbuɔ amɛ akɛ Yehowa Odasefoi ji, mɛi ni kɛ wɔ bɔɔ ni amɛshiɛɔ amɛhãa mɛi krokomɛi ni amɛbɔɔ amɛshiɛmɔyaa lɛ he amaniɛ, shi jeee mɛi ni kɛɔ kɛkɛ akɛ amɛ ji Odasefoi.

^ kk. 2 Sɔɔmɔ afi jeɔ shishi kɛjɛɔ September 1 ni eyagbeɔ naa yɛ August 31 yɛ afi ni nyiɛ sɛɛ lɛ mli. Akɛ nɔkwɛmɔnɔ lɛ, 2015 sɔɔmɔ afi lɛ je shishi September 1, 2014, ni eyagbe naa yɛ August 31, 2015.

^ kk. 16 Sɔɔmɔ afi jeɔ shishi kɛjɛɔ September 1 ni eyagbeɔ naa yɛ August 31 yɛ afi ni nyiɛ sɛɛ lɛ mli. Akɛ nɔkwɛmɔnɔ lɛ, 2015 sɔɔmɔ afi lɛ je shishi September 1, 2014, ni eyagbe naa yɛ August 31, 2015.