Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 FÃ 7

Shihilɛ Ni Yɔɔ Miishɛɛ​—Mɛni Hewɔ Anáaa?

Shihilɛ Ni Yɔɔ Miishɛɛ​—Mɛni Hewɔ Anáaa?

MƐNI hewɔ mɛi babaoo peleɔ ni amɛnáaa shishinumɔ diɛŋtsɛ yɛ amɛshihilɛi amli lɛ? “Gbɔmɔ ni yoo fɔ lɛ yɔɔ nɛɛ, kukuoo kɛkɛ ji egbii lɛ, ni emli eyi tɔ kɛ haomɔ sɔŋŋ; ekwɛ̃ɔ tamɔ fɔfɔi, ni eŋalaa; asaŋ ejoɔ foi tamɔ hɔɔŋ, ni etsɛɛɛ.” (Hiob 14:1, 2) Nɔ ko ni fite nakai adesai agbɛkpamɔi kpakpai lɛ ba klɛŋklɛŋ adesai gbalashihilɛ mli hefatalɔi lɛ anɔ yɛ Paradeiso.

2 Bɔni afee ni adesai aweku lɛ aná miishɛɛ jogbaŋŋ lɛ, esa akɛ amɛná amɛkɛ Nyɔŋmɔ teŋ wekukpaa kpakpa​—nɔ ni baa trukaa, ni jeee nɔnyɛɛ naa. (5 Mose 30:15-20; Yoshua 24:15) Yehowa miitao toiboo kɛ jamɔ ni jɛ tsuiŋ, ní jɛ suɔmɔ mli. (5 Mose 6:5) No hewɔ lɛ Yehowa kɛ naatsĩi ko ni ha klɛŋklɛŋ gbɔmɔ lɛ ná hegbɛ ni ekɛaatsɔɔ anɔkwa ni eyeɔ kɛjɛɔ etsuiŋ lɛ tsu nii yɛ Eden trom lɛ mli. Nyɔŋmɔ kɛɛ Adam akɛ: “Trom lɛ mli tsei lɛ fɛɛ nɔ yibii lɛ ye bɔ ni osumɔɔ; shi ekpakpa kɛ efɔŋ lee tso lɛ yibii lɛ kaaye eko; ejaakɛ gbi nɔ ni oooye eko lɛ, gbo ooogbo!” (1 Mose 2:16, 17) Kaa ni yɔɔ mlɛo kwraa ji enɛ. Yehowa gu Adam koni ekaye tsei fɛɛ ni yɔɔ abɔɔ lɛ mli lɛ ateŋ ekome pɛ nɔ yibii. Nakai tso lɛ feɔ hegbɛ ni Bɔlɔ ni yɔɔ nilee fe mɛi fɛɛ lɛ yɔɔ ni ekɛaatsɔɔ nɔ ni hi kɛ nɔ ni ehiii he mfoniri. Klɛŋklɛŋ nuu lɛ kɛ famɔ ni Nyɔŋmɔ kɛha nɛɛ ha eŋa ní Yehowa kɛ lɛ ha lɛ akɛ “hefatalɔ ko ni sa [Adam]” lɛ. (1 Mose 2:18) Amɛyi enyɔ lɛ fɛɛ ná gbɛjianɔtoo​—akɛ amɛaahi Nyɔŋmɔ nɔyeli shishi​—nɛɛ he miishɛɛ, ni amɛkɛ hiɛsɔɔ ba amɛhe shi amɛha esuɔmɔnaa nifeemɔ, ni yɛ nakai feemɔ mli lɛ amɛjie suɔmɔ ni amɛyɔɔ kɛha amɛ-Bɔlɔ kɛ Wala-Halɔ lɛ kpo.

3 Kɛkɛ ni gbi ko lɛ, onufu ko kɛ Hawa wie, ni ebi akɛ: “Lɛɛlɛŋ, Nyɔŋmɔ kɛɛ akɛ: Nyɛkaye trom lɛ mli tsei ayibii lɛ fɛɛ eko lɛ?” Hawa ha hetoo akɛ agu amɛ akɛ amɛkaye “tso ni yɔɔ trom lɛ teŋ lɛ” ni ji ekpakpa  kɛ efɔŋ lee tso lɛ pɛ nɔ yibii, ‘koni amɛkagboi.’​—1 Mose 3:1-3.

4 Namɔ ji onufu nɛɛ? Biblia wolo ni ji Kpojiemɔ lɛ yɔseɔ “blema onufu lɛ” akɛ mɔ “ní atsɛɔ lɛ diabolo [naafolɔlɔ loo abonsam] lɛ kɛ satan [henyɛlɔ] lɛ ní shishiuɔ jeŋ muu lɛ fɛɛ lɛ.” (Kpojiemɔ 12:9) Ani Nyɔŋmɔ ji mɔ ni bɔ Satan Abonsam? Dabi, Yehowa nitsumɔi lɛ yeɔ emuu ni ehi. (5 Mose 32:4) Nɛkɛ mumɔŋ bɔɔ nɔ nɛɛ fee ehe Abonsam ni eshishi ji “Heguɔgbelɔ” kɛ Satan ni eshishi ji “Shitee-kɛ-wolɔ.” “Lɛ diɛŋtsɛ ekɔnɔ ni gbalaa lɛ ni lakaa lɛ” lɛ ji akɔnɔ ni ená akɛ enine aaashɛ gbɛhe ni Nyɔŋmɔ yɔɔ lɛ nɔ, ni eje shishi etse atua eshi Bɔlɔ lɛ.​—Yakobo 1:14.

5 Satan Abonsam tee nɔ ekɛɛ Hawa akɛ: “Jeee gboimɔ nyɛaagboi; shi moŋ le Nyɔŋmɔ le akɛ gbi nɔ ni nyɛaaye eko lɛ, nyɛhiŋmɛii aaagbele, ni nyɛaatsɔmɔ tamɔ Nyɔŋmɔ, ni nyɛaale ekpakpa kɛ efɔŋ.” (1 Mose 3:4, 5) Satan ha ekpakpa kɛ efɔŋ lee tso lɛ nɔ yibii lɛ yeli bafee nɔ ni baa mɔ tsine. Yɛ nɛkɛ gbɛ nɔ lɛ, ekɛ naataamɔ kɛɛ akɛ: ‘Nyɔŋmɔ miitsĩ nɔ kpakpa ko ni ekɛaaha bo lɛ naa. Bo lɛ ye tso lɛ nɔ yibii lɛ eko, ni obaatsɔ tamɔ Nyɔŋmɔ, ni bo diɛŋtsɛ obaanyɛ ole nɔ ni ji ekpakpa kɛ efɔŋ.’ Ŋmɛnɛ, Satan kɛ sane hesusumɔ nɛɛ nɔŋŋ miitsu nii lolo koni ekɛjie mɛi babaoo kɛjɛ Nyɔŋmɔ sɔɔmɔ mli. Ekɛɔ akɛ: ‘Feemɔ nɔ ni bo diɛŋtsɛ osumɔɔ. Bo lɛ kuu ohiɛ oshwie nɔ ni esa akɛ ofee oha Mɔ ni ha bo wala lɛ nɔ.’​—Kpojiemɔ 4:11.

6 Amrɔ nɔŋŋ ni tso lɛ nɔ yibii bafee nɔ ko ni yɔɔ akɔnɔ waa, nɔ ko ni anyɛɛɛ atsi he kɛjɛ he! Hawa tsé aduawa lɛ, ni eye, kɛkɛ ni eha ewu lɛ eko. Eyɛ mli akɛ Adam le nɔ ni baajɛ mli aba jogbaŋŋ diɛŋtsɛ moŋ, shi ebo eŋa lɛ gbee toi ni eye aduawa lɛ. Mɛni jɛ mli ba? Yehowa kɛ wiemɔi ni nyiɛ sɛɛ nɛɛ kojo yoo lɛ akɛ: “Fá maha ohejaramɔ kɛ ohɔŋɔɔ afá; jaramɔ mli ooofɔ bii yɛ, ni owu lɛ sɛɛgbɛ oootao, ni lɛ eeeye onɔ.” Ni nuu lɛ hu? “Alomɔ shikpɔŋ sũ yɛ ohewɔ, jaramɔ mli oooye enɔ nii yɛ, owala gbii abɔ fɛɛ. Ni ŋmei kɛ aŋlɛŋlɛ eeewo ehao, ni ŋa nɔ baai oooye. Ohiɛ latsaa mli oooye nii yɛ, kɛyashi beyinɔ ni oooku osɛɛ kɛaatee shikpɔŋ sũ mli, ejaakɛ emli ajieo kɛjɛ. Ejaakɛ  sũ jio, ni sũ mli oooku osɛɛ kɛaatee!” Agbɛnɛ ashĩ Adam kɛ Hawa koni amɛyatao miishɛɛ kɛ tsui ni nyɔɔ mɔ mli yɛ amɛ diɛŋtsɛ amɛ gbɛtsɔɔmɔ naa. Ani mɔdɛŋ srɔtoi ni adesai bɔɔ koni amɛná shihilɛ ni yɔɔ miishɛɛ ni ŋwɛi yiŋtoo bɛ mli lɛ baaye omanye? Nitsumɔ dɛŋdɛŋ ni amɛaatsu waa koni amɛnyɛ amɛhi wala mli kɛkɛ, ní amɛfeee nɔ ko kwraa kɛwooo amɛ Bɔlɔ lɛ hiɛnyam lɛ baye nitsumɔ ni yɔɔ miishɛɛ ni ji Paradeiso ni tamɔ trom ni aaakwɛ nɔ ni akpã mli kɛya shikpɔŋ lɛ hei srɔtoi fɛɛ lɛ najiaŋ.​—1 Mose 3:6-19.

7 Gbi ni klɛŋklɛŋ adesai gbalashihilɛ mli hefatalɔi lɛ ye ekpakpa kɛ efɔŋ lee tso lɛ nɔ yibii lɛ, amɛgboi yɛ Nyɔŋmɔ hiɛ ni amɛbɔi gbɔjɔmɔ fiofio kɛbote amɛgbele diɛŋtsɛ mli. Mɛni ba amɛnɔ beni yɛ naagbee lɛ amɛgboi lɛ? Biblia lɛ kɛ shihilɛ mli ni gbohii lɛ yɔɔ lɛ he nilee haa. “Hiɛkalɔi le akɛ amɛbaagboi; shi gbohii lɛ, amɛleee nɔ ko nɔ ko, ni amɛbɛ nyɔmɔwoo ko dɔŋŋ; ejaakɛ hiɛ eje amɛkaimɔ nɔ.” (Jajelɔ 9:5; Lala 146:4) Nɔ ko ni ji “susuma” ko bɛ ni hiɔ shi yɛ gbele sɛɛ. Eshafeemɔ he toigbalamɔ ji gbele, shi jeee naanɔ piŋmɔ yɛ hɛl la ni tsoɔ mli. Kɛfata he lɛ, gbele kɛ mɔ eyaaa naanɔ miishɛɛ babaoo mli yɛ ŋwɛi. *

8 Taakɛ bɔ ni tsɛnsi ni akɛshãa keeki ni he eboda lɛ baanyɛ aha kadimɔ nii aba keeki ni ashãa lɛ he lɛ, nakai nɔŋŋ amrɔ nɛɛ nuu kɛ yoo ni yeee emuu lɛ baanyɛ afɔ bii pɛ ni yeee emuu. Biblia lɛ tsɔɔ bɔ ni enɛ baa lɛ ehaa akɛ: “Gbɔmɔ kome nɔ esha tsɔ kɛba je lɛŋ, ni gbele tsɔ esha nɔ kɛba, ni no ha gbele lɛ tsɛŋe gbɔmɛi fɛɛ, ejaakɛ amɛ fɛɛ amɛfee esha lɛ.” (Romabii 5:12) No hewɔ lɛ, afɔ wɔ fɛɛ yɛ esha mli, ni wɔbaje yakayaka shihilɛ mli. Wala ni yɔɔ kɛha Adam seshibii lɛ batsɔ nitsumɔ dɛŋdɛŋ ni atsuɔ ni jeɔ mɔ nijiaŋ wui. Shi ani abaanyɛ afee he nɔ ko?

^ kk. 7 Obaaná shihilɛ mli ni gbohii lɛ yɔɔ lɛ he saji babaoo ni yɔɔ miishɛɛ yɛ wolo bibioo ni ji Mɛni Baa Wɔnɔ Kɛ́ Wɔgboi, ni Watchtower Bible and Tract Society of New York, Inc. fee lɛ mli.