Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 FÃ 8

Gbɛ Ni Kɛ Mɔ Yaa Miishɛɛ Shihilɛ Mli Ekoŋŋ

Gbɛ Ni Kɛ Mɔ Yaa Miishɛɛ Shihilɛ Mli Ekoŋŋ

EYƐ mli akɛ adesai ebote yakayaka shihilɛ gbɛ mli ákɛ nɔ ni jɛ atua ni amɛtse amɛshi ŋwɛi nɔyeli lɛ mli kɛba moŋ, shi Nyɔŋmɔ shiii adesai akɛ mɛi ni bɛ hiɛnɔkamɔ. Biblia lɛ tsɔɔ mli akɛ: “Aŋɔ bɔɔ nii lɛ awo yakayakanii ashishi, jeee amɛ diɛŋtsɛ amɛsuɔmɔ naa, shi moŋ yɛ mɔ ni ba amɛ shi lɛ hewɔ, yɛ nɔhiɛkamɔ mli; akɛ bɔɔ nii lɛ diɛŋtsɛ hu baaye amɛhe kɛjɛ fitemɔ nyɔŋyeli lɛ mli kɛya Nyɔŋmɔ bii lɛ anunyam heyeli lɛ mli.” (Romabii 8:20, 21) Hɛɛ, Nyɔŋmɔ kɛ hiɛnɔkamɔ ha klɛŋklɛŋ adesai gbalashihilɛ mli hefatalɔi abii lɛ. No ji hiɛnɔkamɔ ni ma shi shiŋŋ ni ji akɛ abaaha adesai aye amɛhe kɛjɛ esha kɛ gbele ni amɛná akɛ gboshinii lɛ mli. Abaanyɛ aha amɛná amɛkɛ Yehowa Nyɔŋmɔ teŋ wekukpaa ni bɛŋkɛ kpaakpa mli ŋɔɔmɔ ekoŋŋ. Yɛ mɛɛ gbɛ nɔ?

Nyɔŋmɔ kɛ hiɛnɔkamɔ ha adesai koni anyɛ aha amɛye amɛhe kɛjɛ esha kɛ gbele nyɔŋyeli mli

2 Beni Adam kɛ Hawa fee esha lɛ, amɛshɔ hegbɛ ni amɛ seshibii lɛ aaaná akɛ amɛaaná shihilɛ ni yɔɔ miishɛɛ kɛya naanɔ yɛ shikpɔŋ nɔ lɛ kɛjɛ amɛdɛŋ. Amɛhɔ̃ɔ amɛ wɔsɛɛ be weku lɛ amɛwo esha kɛ gbele nyɔŋyeli shishi ni amɛkɛtsake hegbɛ ni amɛaaná akɛ amɛaakpɛ amɛyiŋ yɛ nɔ ni ja kɛ nɔ ni ejaaa he kɛha amɛhe lɛ. Akɛni amɛfɔ amɛshwiei lɛ amɛwo nakai weku lɛ mli hewɔ lɛ, abaanyɛ akɛ amɛshwiei lɛ ato nyɔ̃ji ni akɛ amɛ eyato ŋshɔkpɔ ni yɔɔ he ko shɔŋŋ ni nɔyelɔi ni waa mɔ yi yeɔ nɔ yɛ jɛmɛ akɛ maŋtsɛmɛi lɛ he. Yɛ anɔkwale mli lɛ, gbele eye adesai ni maŋtsɛ kroko eŋɔ amɛ akɛ enyɔ̃ji lɛ anɔ maŋtsɛ​—esha. (Romabii 5:14, 21) Etamɔ nɔ ni mɔ ko kwraa bɛ ni baahere amɛ. Sane lɛ ji akɛ, amɛblematsɛ lɛ ji mɔ ni hɔ̃ɔ amɛ ewo nyɔŋyeli mli! Shi nuu ko ni feɔ mɔ ejurɔ tsu ebinuu, ni ekɛ jara lɛ fɛɛ ni he hiaa koni amɛha mɛi fɛɛ ni yɔɔ nyɔŋyeli mli lɛ aná heyeli ba.​—Lala 51:7; 146:4; Romabii 8:2.

3 Yɛ mfonirifeemɔ nii nɛɛ mli lɛ, nuu lɛ ni here nyɔ̃ji lɛ ayiwala lɛ damɔ shi kɛha Yehowa Nyɔŋmɔ. Binuu ni kɛ jara lɛ ba koni akɛná heyeli lɛ ji Yesu Kristo. Ehi shi  akɛ Nyɔŋmɔ Bi koome dani ebatsɔ adesa. (Yohane 3:16) Lɛ ji Yehowa klɛŋklɛŋ bɔɔ nɔ, ni bɔɔ nii krokomɛi fɛɛ ni yɔɔ jeŋ muu lɛ ba shihilɛ mli kɛtsɔ enɔ. (Kolosebii 1:15, 16) Yehowa tsɔ naakpɛɛ gbɛ nɔ etsake mumɔŋ Bi nɛɛ wala ewo oblayoo fro ko fɔmɔ kotoku mli koni anyɛ afɔ abifao lɛ akɛ adesa ni yeɔ emuu, ni no ji jara ni he hiaa ni abaanyɛ akɛtsu ŋwɛi jalɛsaneyeli taomɔ nii ahe nii.​—Luka 1:26-31, 34, 35.

4 Beni Yesu eye aaafee afii 30 lɛ, abaptisi lɛ yɛ Yordan Faa lɛ mli. Mumɔ krɔŋkrɔŋ lɛ, aloo Nyɔŋmɔ nitsumɔ hewalɛ lɛ fɔ lɛ mu beni abaptisiɔ lɛ lɛ. No hewɔ lɛ, ebatsɔ Kristo lɛ, ní eshishitsɔɔmɔ ji “Mɔ ni Afɔ Lɛ Mu.” (Luka 3:21, 22) Yesu sɔɔmɔ nitsumɔ ni tee nɔ yɛ shikpɔŋ nɔ lɛ he afii etɛ kɛ fã. Yɛ  nakai afii lɛ amli lɛ, etsɔɔ esɛɛnyiɛlɔi lɛ “Nyɔŋmɔ maŋtsɛyeli lɛ” ni ji ŋwɛi nɔyeli ni adesai baaku sɛɛ ahi shishi ni amɛná amɛkɛ Yehowa Nyɔŋmɔ teŋ toiŋjɔlɛ wekukpaa lɛ he sane. (Luka 4:43; Mateo 4:17) Yesu le gbɛ ni adesai baatsɔ nɔ amɛná miishɛɛ shihilɛ, ni ekɛ gbɛtsɔɔmɔi diɛŋtsɛ ni kɔɔ miishɛɛnamɔ he lɛ ha esɛɛnyiɛlɔi lɛ. Mɛni hewɔ ogbeleee Mateo yitso 5 kɛyashi 7 yɛ o-Biblia lɛ mli ni okane nii ni etsɔɔ yɛ Gɔŋ nɔ Shiɛmɔ lɛ mli lɛ ekomɛi?

Ani odaŋ mɔ ni jie bo kɛjɛ nyɔŋyeli mli lɛ shi babaoo?

5 Ákɛ mɔ ni tamɔɔɔ Adam lɛ, Yesu fee toiboo eha Nyɔŋmɔ yɛ nɔ fɛɛ nɔ mli. “Efeee esha.” (1 Petro 2:22; Hebribii 7:26) Yɛ anɔkwale mli lɛ, eyɛ hegbɛ akɛ ehiɔ shi yɛ shikpɔŋ nɔ kɛyaa naanɔ, shi ‘eŋɔ ewala eŋmɛ shi’ koni ekɛwo nɔ ni Adam laaje lɛ he nyɔmɔ eha Nyɔŋmɔ. Beni Yesu yɔɔ sɛŋmɔtso lɛ nɔ lɛ, ekɛ adesa wala ni eye emuu ni eyɔɔ lɛ ha. (Yohane 10:17; 19:17, 18, 28-30; Romabii 5:19, 21; Filipibii 2:8) Nakai feemɔ ha Yesu kɛ kpɔmɔnɔ lɛ ha, aloo ewo jara ni he hiaa ni akɛbaahe adesai kɛjɛ esha kɛ gbele nyɔŋyeli mli lɛ he nyɔmɔ. (Mateo 20:28) Bo lɛ susumɔ he akɛ ootsu nii dɛŋdɛŋ yɛ he ko ni nyɔmɔwoo fioo ko pɛ onáa, ni oyɛ nyɔŋyeli mli diɛŋtsɛ. Ani odaŋ mɔ ni to gbɛjianɔ koni akpɔ̃ bo kɛjɛ nyɔŋyeli mli kɛ mɔ ni kɛ ehe ha koni ekɛ ewala ashã afɔle aha bo yɛ onɔ̃ lɛ najiaŋ lɛ shi babaoo? Agbele gbɛ ko naa aha bo kɛtsɔ kpɔmɔnɔ gbɛjianɔtoo lɛ nɔ koni oku osɛɛ kɛya Nyɔŋmɔ jeŋ muu fɛɛ weku lɛ mli ni oná shihilɛ ni miishɛɛ yɔɔ mli diɛŋtsɛ, ní oye ohe kɛjɛ esha kɛ gbele nyɔŋyeli mli.—2 Korintobii 5:14, 15.

6 Le ni aaale Yehowa mɔbɔnalɛ ni esaaa wɔ lɛ ni ohiɛ aaasɔ lɛ haa onáa yiŋtoo babaoo ni ooodamɔ nɔ okɛ nilee wiemɔi ni yɔɔ Biblia lɛ mli lɛ atsu nii yɛ bo diɛŋtsɛ oshihilɛ mli. Ŋɔɔ shishitoo mlai ni wa fe fɛɛ lɛ ateŋ ekome ni okɛaatsu nii lɛ akɛ nɔkwɛmɔnɔ—mɛi krokomɛi ni okɛ amɛhe eshai aaake amɛ kɛ́ amɛtɔ̃ onɔ. Ani okaiɔ wiemɔi ni anaa yɛ Kolosebii yitso 3, kukuji 12 kɛyashi 14 ni wɔsusu he yɛ Nikasemɔ 2 lɛ mli lɛ? Nakai ŋmalɛi kukuji lɛ wo bo hewalɛ koni okɛ mɛi krokomɛi ahe eshai ake amɛ kɛ́ ekolɛ oyɛ nɔ ni okɛaatsɔɔ akɛ osane ja po. Shishinumɔ ni yɔɔ sɛɛ lɛ tsɔɔ nɔ hewɔ, akɛ: “Taakɛ bɔ ni [Yehowa, NW] hu ŋɔfa nyɛ lɛ, nakai nyɛ hu nyɛfea.” Kɛ ohiɛ sɔ nɔ ni Yehowa kɛ Yesu Kristo efee eha adesai lɛ jogbaŋŋ nɔŋŋ pɛ lɛ, ebaatsirɛ bo koni okɛ mɛi krokomɛi ahe eshai ake amɛ yɛ nɔ fɛɛ nɔ ni ekolɛ amɛfee amɛshi bo lɛ sɛɛ, titri lɛ, kɛ́ amɛshwa amɛhe ni amɛkpa fai.