Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 14

Mɛni Hewɔ Nyɔŋmɔ Yɔɔ Asafo Lɛ?

Mɛni Hewɔ Nyɔŋmɔ Yɔɔ Asafo Lɛ?

1. Mɛni hewɔ Nyɔŋmɔ to blema Israelbii lɛ ahe gbɛjianɔ akɛ asafo lɛ?

Nyɔŋmɔ to Abraham seshibii lɛ ahe gbɛjianɔ efee amɛ maŋ, ni ehã amɛ mlai. Etsɛ maŋ nɛɛ “Israel.” Israel maŋ lɛ pɛ já Nyɔŋmɔ yɛ gbɛ ni sa ehiɛ lɛ nɔ, ni Nyɔŋmɔ kɛ e-Wiemɔ lɛ hã amɛ koni amɛfã he, amɛbu he, ni amɛbaa yi. (Lala 147:19, 20) No hewɔ lɛ, kulɛ maji srɔtoi fɛɛ anɔ bii baaná jɔɔmɔi kɛtsɔ Israel maŋ lɛ nɔ.​—Kanemɔ 1 Mose 22:18.

Nyɔŋmɔ hala Israelbii lɛ koni amɛtsɔmɔ edasefoi. Bɔ ni amɛhi shi amɛhã yɛ blema lɛ hãa wɔnaa akɛ, kɛ́ wɔye Nyɔŋmɔ mlai anɔ lɛ, wɔbaaná he sɛɛ. (5 Mose 4:6) No hewɔ lɛ, kɛtsɔ Israelbii lɛ anɔ lɛ, mɛi krokomɛi baanyɛ abale anɔkwa Nyɔŋmɔ lɛ.​—Kanemɔ Yesaia 43:10, 12.

2. Mɛni hewɔ ato anɔkwa Kristofoi ahe gbɛjianɔ akɛ asafo lɛ?

Sɛɛ mli lɛ, Yehowa kpoo Israel maŋ lɛ, ni ekɛ Kristofoi asafo lɛ ye najiaŋ. (Mateo 21:43; 23:37, 38) Amrɔ nɛɛ, anɔkwa Kristofoi ji mɛi ni sɔmɔɔ akɛ odasefoi amɛhãa Yehowa, shi jeee Israelbii lɛ.​—Kanemɔ Bɔfoi 15:14, 17.

Yesu to esɛɛnyiɛlɔi lɛ ahe gbɛjianɔ koni amɛshiɛ ni amɛfee kaselɔi yɛ jeŋmaji fɛɛ amli. (Mateo 10:7, 11; 24:14; 28:19, 20) Amrɔ nɛɛ, je lɛ yɛ enaagbee be lɛ mli, ni nitsumɔ nɛɛ miihe aba naagbee. Yehowa ebua mɛi akpekpei abɔ ni jɛ maji fɛɛ amli lɛ anaa efee amɛ ekome yɛ anɔkwa jamɔ mli, ni nɔ ko ni tamɔ nɛkɛ bako pɛŋ yɛ yinɔsane mli. (Kpojiemɔ 7:9, 10) Ato anɔkwa Kristofoi ahe gbɛjianɔ akɛ asafo koni amɛwowoo amɛhe hewalɛ ni amɛye amɛbua amɛhe. Yɛ jeŋ fɛɛ lɛ, akɛ Biblia mli tsɔsemɔ kome too lɛ nɔŋŋ hãa amɛ yɛ amɛkpeei ashishi.​—Kanemɔ Hebribii 10:24, 25.

 3. Te fee tɛŋŋ Yehowa Odasefoi je shishi yɛ ŋmɛnɛŋmɛnɛ beiaŋ?

Aaafee afi 1870 mli lɛ, Biblia kaselɔi akuu fioo ko bɔi Biblia mli anɔkwalei ni atsĩmɔ nɔ be kakadaŋŋ lɛ ashishinumɔ ekoŋŋ. Amɛle akɛ Yesu to Kristofoi asafo lɛ he gbɛjianɔ koni amɛshiɛ, no hewɔ lɛ amɛbɔi Maŋtsɛyeli lɛ shiɛmɔ yɛ jeŋ fɛɛ. Yɛ afi 1931 lɛ, Biblia Kaselɔi lɛ hã abɔi amɛ tsɛmɔ akɛ Yehowa Odasefoi.​—Kanemɔ Bɔfoi 1:8; 2:1, 4; 5:42.

4. Te ato Yehowa Odasefoi lɛ ahe gbɛjianɔ ahã tɛŋŋ?

Yɛ klɛŋklɛŋ afii 100 lɛ mli lɛ, gbɛtsɔɔmɔ kuu ko ní kpɛlɛɔ Yesu nɔ akɛ asafo lɛ Yitso lɛ ji mɛi ni kwɛ Kristofoi asafoi ni yɔɔ shikpɔji babaoo anɔ lɛ anɔ. (Bɔfoi 16:4, 5) Nakai nɔŋŋ ŋmɛnɛ lɛ, Kristofoi asafoŋ onukpai komɛi ni kɛ afii pii esɔmɔ ni atsɛɔ amɛ akɛ Gbɛtsɔɔmɔ Kuu lɛ ji mɛi ni kwɛɔ Yehowa Odasefoi ni yɔɔ jeŋ fɛɛ lɛ anɔ. Gbɛtsɔɔmɔ Kuu lɛ kwɛɔ Yehowa Odasefoi anitsumɔhe niji ni tsɔɔ Biblia kasemɔ woji ashishi, amɛprintiɔ, ní amɛjaraa yɛ wiemɔi ni fa fe 750 mli lɛ anɔ. Enɛ hãa Gbɛtsɔɔmɔ Kuu lɛ nyɛɔ ekɛ Ŋmalɛ naa hewalɛwoo kɛ gbɛtsɔɔmɔ hãa asafoi ni fa fe 120,000 ni yɔɔ jeŋ fɛɛ lɛ. Hii ni shɛɔ Ŋmalɛ naa taomɔ nii ahe sɔmɔɔ akɛ asafoŋ onukpai, loo nɔkwɛlɔi yɛ asafo fɛɛ asafo mli. Hii nɛɛ jɛɔ suɔmɔ mli amɛkwɛɔ Nyɔŋmɔ tooku lɛ nɔ.​—Kanemɔ 1 Petro 5:2, 3.

Ato Yehowa Odasefoi lɛ ahe gbɛjianɔ koni amɛshiɛ sane kpakpa lɛ ni amɛfee kaselɔi. Wɔshiɛɔ yɛ shĩa fɛɛ shĩa tamɔ bɔ ni bɔfoi lɛ fee lɛ. (Bɔfoi 20:20) Agbɛnɛ hu, wɔkɛ mɛi ni sumɔɔ anɔkwale lɛ lɛɛlɛŋ lɛ kaseɔ Biblia lɛ. Shi Yehowa Odasefoi jeee asafo ko kɛkɛ ni ato amɛhe gbɛjianɔ. Wɔji weku, ni wɔyɛ Tsɛ ni sumɔɔ wɔ. Nyɛmimɛi hii kɛ yei ji wɔ, ni wɔsumɔɔ wɔhe. (2 Tesalonikabii 1:3) Akɛni ato Yehowa webii lɛ ahe gbɛjianɔ koni amɛfee Nyɔŋmɔ suɔmɔnaa nii, ni amɛye amɛbua mɛi krokomɛi hewɔ lɛ, amɛji weku ni yɔɔ miishɛɛ fe fɛɛ yɛ shikpɔŋ lɛ nɔ.​—Kanemɔ Lala 33:12; Bɔfoi 20:35.