Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 7

Mɛni Ji Nyɔŋmɔ Maŋtsɛyeli Lɛ?

Mɛni Ji Nyɔŋmɔ Maŋtsɛyeli Lɛ?

1. Mɛni ji Nyɔŋmɔ Maŋtsɛyeli lɛ?

Mɛni hãa Yesu feɔ Maŋtsɛ ni sa jogbaŋŋ?—MARKO 1:40-42.

Nyɔŋmɔ Maŋtsɛyeli lɛ ji nɔyeli ko ni baaye nɔ kɛjɛ ŋwɛi. Ebaaye nɔyelii krokomɛi fɛɛ anajiaŋ ni ebaahã afee Nyɔŋmɔ suɔmɔnaa nii yɛ ŋwɛi kɛ shikpɔŋ lɛ nɔ. Sane ni kɔɔ Nyɔŋmɔ Maŋtsɛyeli lɛ he lɛ ji sane kpakpa. Etsɛŋ, Nyɔŋmɔ Maŋtsɛyeli lɛ baahã adesai aná nɔyeli kpakpa ni amɛtaoɔ lɛ. Ebaafee mɛi fɛɛ ni yɔɔ shikpɔŋ lɛ nɔ lɛ ekome.​—Kanemɔ Daniel 2:44; Mateo 6:9, 10; 24:14.

Maŋtsɛyeli fɛɛ maŋtsɛyeli kɛ enɔ maŋtsɛ. Yehowa hala e-Bi, Yesu Kristo akɛ E-Maŋtsɛyeli lɛ nɔ Maŋtsɛ.​—Kanemɔ Kpojiemɔ 11:15.

Kwɛmɔ vidio ni ji Mɛni Ji Nyɔŋmɔ Maŋtsɛyeli Lɛ?

2. Mɛni hewɔ Yesu ji Maŋtsɛ ni sa jogbaŋŋ lɛ?

Nyɔŋmɔ Bi lɛ ji Maŋtsɛ ni sa jogbaŋŋ ejaakɛ emli hi, ni efeɔ shiŋŋ yɛ nɔ ni ja he. (Mateo 11:28-30) Agbɛnɛ hu, eyɛ hewalɛ bɔ ni ekɛbaaye ebua mɛi, ejaakɛ ebaajɛ ŋwɛi eye shikpɔŋ lɛ nɔ. Be ni atee lɛ shi lɛ, ekwɔ kɛtee ŋwɛi ni eyata Yehowa ninejurɔ nɔ emɛ. (Hebribii 10:12, 13) Sɛɛ mli lɛ, Nyɔŋmɔ hã lɛ hegbɛ ni ebɔi nɔyeli.​—Kanemɔ Daniel 7:13, 14.

3. Namɛi baafata Yesu he kɛye nɔ?

Kuu ko ni atsɛɔ amɛ “mɛi krɔŋkrɔŋi lɛ” baafata Yesu he kɛye nɔ yɛ ŋwɛi. (Daniel 7:27) Yesu bɔfoi anɔkwafoi lɛ ji nakai mɛi krɔŋkrɔŋi lɛ ateŋ klɛŋklɛŋbii ni ahala. Yehowa etee nɔ ehala hii kɛ yei anɔkwafoi akɛ mɛi krɔŋkrɔŋi kɛbashi ŋmɛnɛ. Ateɔ amɛ shi kɛ mumɔŋ gbɔmɔtsei tamɔ bɔ ni atee Yesu shi lɛ.​—Kanemɔ Yohane 14:1-3; 1 Korintobii 15:42-44.

 Mɛi enyiɛ yaa ŋwɛi? Yesu tsɛ amɛ “tooku bibioo.” (Luka 12:32) Be ni yi aaawula shi lɛ, amɛyi baafee 144,000. Amɛbaafata Yesu he kɛye shikpɔŋ lɛ nɔ.​—Kanemɔ Kpojiemɔ 14:1.

4. Mɛni ba be ni Yesu bɔi nɔyeli lɛ?

Nyɔŋmɔ Maŋtsɛyeli lɛ bɔi nɔyeli yɛ afi 1914. * Nɔ klɛŋklɛŋ ni Yesu fee akɛ Maŋtsɛ ji, eshwie Satan kɛ edaimonioi lɛ kɛje ŋwɛi. Satan mli wo la waa, ni ebɔi nibii gbohii feemɔ yɛ shikpɔŋ lɛ nɔ fɛɛ. (Kpojiemɔ 12:7-10, 12) Kɛjɛ nakai beiaŋ kɛbaa nɛɛ, adesai anaagbai amli ewo wu naakpa. Tai, hɔmɔ, tsɛŋemɔ helai, kɛ shikpɔŋhosomɔi fata “okadi” ni tsɔɔ akɛ etsɛŋ ni Maŋtsɛyeli lɛ baaye shikpɔŋ muu lɛ fɛɛ nɔ lɛ he.​—Kanemɔ Luka 21:7, 10, 11, 31.

5. Mɛni Nyɔŋmɔ Maŋtsɛyeli lɛ tsuɔ?

Amrɔ nɛɛ po lɛ, Nyɔŋmɔ Maŋtsɛyeli lɛ miihã aashiɛ yɛ jeŋ fɛɛ, ni no miihã aafee gbɔmɛi asafo babaoo ni jɛ jeŋmaji fɛɛ amli lɛ ekome. Heshibalɔi akpekpei abɔ miitsɔmɔ Yesu nɔyeli lɛ shishi bii. Nyɔŋmɔ Maŋtsɛyeli lɛ baabu amɛhe be ni ekpãtãa jeŋ fɔŋ nɛɛ hiɛ lɛ. No hewɔ lɛ, esa akɛ mɛi fɛɛ ni miitao aná Nyɔŋmɔ Maŋtsɛyeli lɛ he sɛɛ lɛ atsɔmɔ Yesu nɔyeli lɛ shishi bii ni amɛbo lɛ toi.​—Kanemɔ Kpojiemɔ 7:9, 14, 16, 17.

Maŋtsɛyeli lɛ baatsu Nyɔŋmɔ yiŋ ni eto kɛhã adesai lɛ he nii yɛ afii 1,000 mli. Shikpɔŋ lɛ fɛɛ baatsɔ paradeiso. Naagbee lɛ, Yesu baaŋɔ Maŋtsɛyeli lɛ ehã e-Tsɛ lɛ. (1 Korintobii 15:24-26) Ani ole mɔ ko ni obaasumɔ ni ogba lɛ Nyɔŋmɔ Maŋtsɛyeli lɛ he sane?​—Kanemɔ Lala 37:10, 11, 29.

 

^ par. 6 Kɛ́ ootao ole bɔ ni Biblia lɛ gba afi 1914 lɛ efɔ̃ shi lɛ he saji babaoo lɛ, kwɛmɔ Mɛni Wɔbaanyɛ Wɔkase Kɛjɛ Biblia Lɛ Mli? wolo lɛ baafa 217-220 lɛ.