Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 3

Ani Sane Kpakpa Lɛ Jɛ Nyɔŋmɔ Ŋɔɔ Lɛɛlɛŋ?

Ani Sane Kpakpa Lɛ Jɛ Nyɔŋmɔ Ŋɔɔ Lɛɛlɛŋ?

1. Namɔ ji Biblia lɛ Ŋmalɔ?

Aŋma sane kpakpa ni ji akɛ adesai baahi shi kɛya naanɔ yɛ shikpɔŋ lɛ nɔ lɛ yɛ Biblia lɛ mli. (Lala 37:29) Woji bibii 66 yɔɔ mli. Nyɔŋmɔ kɛ hii anɔkwafoi aaafee 40 tsu nii kɛŋma. Mose ŋmala klɛŋklɛŋ woji enumɔ lɛ aaafee afii 3,500 ni eho nɛ. Bɔfo Yohane ŋma naagbee wolo lɛ nɔ ni fa fe afii 1,900 ni eho nɛ. Namɔ susumɔi Biblia ŋmalɔi lɛ ŋmala amɛshwie shi lɛ? Nyɔŋmɔ tsɔ emumɔ krɔŋkrɔŋ lɛ nɔ ekɛ Biblia ŋmalɔi lɛ wie. (2 Samuel 23:2) Amɛŋmala Nyɔŋmɔ susumɔi, shi jeee amɛ diɛŋtsɛ amɛsusumɔi. No hewɔ lɛ, Yehowa ji Biblia lɛ Ŋmalɔ.​—Kanemɔ 2 Timoteo 3:16; 2 Petro 1:20, 21.

Kwɛmɔ vidio ni ji Namɔ Ji Biblia Lɛ Ŋmalɔ?

2. Te wɔbaafee tɛŋŋ wɔná nɔmimaa akɛ Biblia lɛ ja?

Wɔle akɛ Biblia lɛ jɛ Nyɔŋmɔ ŋɔɔ, ejaakɛ Biblia lɛ gbaa nibii ni baaba wɔsɛɛ lɛ fitsofitso. Adesa ko nyɛŋ afee nakai. (Yoshua 23:14) Nyɔŋmɔ Ofe lɛ pɛ baanyɛ ana nɔ ni baaba adesai anɔ wɔsɛɛ.​—Kanemɔ Yesaia 42:9; 46:10.

Wɔkpaa gbɛ akɛ wolo ni jɛ Nyɔŋmɔ ŋɔɔ lɛ baafee srɔto, ni nakai pɛpɛɛpɛ eji. Atsɔɔ Biblia lɛ shishi kɛtee wiemɔi ohai abɔ mli ni ajara akpekpe toi akpei abɔ ahã mɛi. Eyɛ mli akɛ Biblia lɛ etsɛ waa moŋ, shi ekɛ adebɔɔ nibii ahe nilee ni ja kpãa gbee. Agbɛnɛ hu, mɛi 40 ni ŋmala lɛ eteee shi amɛwooo amɛhe. * Kɛfata he lɛ, nibii ni Biblia lɛ wieɔ yɛ suɔmɔ he lɛ maa nɔ mi akɛ ejɛ Nyɔŋmɔ ni yɔɔ suɔmɔ lɛ ŋɔɔ, ni ekã he ehãa mɛi tsakeɔ amɛtsɔmɔɔ gbɔmɛi kpakpai. Anɔkwa saji nɛɛ kɔneɔ mɛi akpekpei abɔ ayiŋ akɛ Biblia lɛ ji Nyɔŋmɔ Wiemɔ.​—Kanemɔ 1 Tesalonikabii 2:13.

Kwɛmɔ vidio ni ji Te Wɔbaafee Tɛŋŋ Wɔle Akɛ Biblia Lɛ Ja?

 3. Mɛni he Biblia lɛ wieɔ?

Biblia lɛ gbalaa jwɛŋmɔ kɛyaa sane kpakpa ni ji akɛ Nyɔŋmɔ yɛ yiŋtoo kpakpa kɛhã adesai lɛ nɔ. Ŋmalɛ lɛ tsɔɔ bɔ ni fee ni hegbɛ ni adesai ná yɛ shishijee mli akɛ amɛhi paradeiso mli yɛ shikpɔŋ lɛ nɔ lɛ ŋmɛɛ amɛ, kɛ bɔ ni yɛ naagbee lɛ abaahã shikpɔŋ lɛ atsɔ paradeiso ekoŋŋ.​—Kanemɔ Kpojiemɔ 21:4, 5.

Mlai, shishitoo mlai, kɛ ŋaawoi hu yɛ Nyɔŋmɔ Wiemɔ lɛ mli. Kɛfata he lɛ, bɔ ni Nyɔŋmɔ kɛ adesai ye ehã he amaniɛbɔi yɛ Biblia lɛ mli​—ni amaniɛbɔi nɛɛ hãa wɔnaa nɔ Nyɔŋmɔ ni eji. No hewɔ lɛ, Biblia lɛ baanyɛ aye abua bo ni ole Nyɔŋmɔ. Etsɔɔ bɔ ni obaafee otsɔ enaanyo.​—Kanemɔ Lala 19:7, 11; Yakobo 2:23; 4:8.

4. Te obaafee tɛŋŋ onu Biblia lɛ shishi?

Wolo nɛɛ baatsɔ gbɛ ni Yesu tsɔ nɔ etsɔɔ nii lɛ nɔŋŋ nɔ eye ebua bo koni onu Biblia lɛ shishi. Yesu tsɛɔ Biblia mli ŋmalɛi ayisɛɛ, ni ‘etsɔɔ nakai ŋmalɛi lɛ ashishi.’​—Kanemɔ Luka 24:27, 45.

Nibii ni hãa mɔ náa miishɛɛ waa lɛ ateŋ ekome ji sane kpakpa ni jɛ Nyɔŋmɔ ŋɔɔ lɛ. Kɛ̃lɛ, mɛi komɛi nyaaa sane kpakpa lɛ he, ni mɛi komɛi po amli fuɔ yɛ he. Kaahã no je onijiaŋ wui. Ja oná ole Nyɔŋmɔ jogbaŋŋ dani obaaná naanɔ wala.​—Kanemɔ Yohane 17:3.

 

^ par. 3 Kwɛmɔ broshuɔ ni ji Wolo Kɛha Gbɔmɛi Fɛɛ lɛ.