Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 YITSO 12

Wiemɔ Nibii “Ni Hi Ni Tswaa Mɔ Emaa Shi”

Wiemɔ Nibii “Ni Hi Ni Tswaa Mɔ Emaa Shi”

“Wiemɔ ni ehiii ko akaje nyɛnaa, shi moŋ nɔ ni hi ni tswaa mɔ emaa shi.”​—EFESOBII 4:29.

1-3. (a) Mɛni ji nikeenii kpakpai ni Yehowa ehã wɔ lɛ ateŋ ekome? Mɛni baatsɔɔ akɛ wɔkɛ nikeenii nɛɛ tsuuu nii jogbaŋŋ? (b) Te esa akɛ wɔkɛ nikeenii nɛɛ atsu nii ahã tɛŋŋ?

PAPA ko hé baisiko eke ebinuu. Ená miishɛɛ waa akɛ ehé nikeenii kpakpa ko tamɔ nakai ehã ebi lɛ. Shi kɛ́ bi lɛ ta baisiko lɛ bɔ ni esaaa, ekɛshi mɔ ko ni mɔ lɛ pila lɛ, te epapa baanu he ehã tɛŋŋ?

2 “Nikeenii kpakpai fɛɛ kɛ nikeenii ni hi kɛwula shi fɛɛ” lɛ, Yehowa ŋɔɔ ejɛɔ. (Yakobo 1:17) Nikeenii kpakpai ni ehã wɔ lɛ ateŋ ekome ji nyɛmɔ ni wɔyɔɔ ni wɔkɛwieɔ lɛ. Nikeenii nɛɛ hãa wɔnyɛɔ wɔtsɔɔ wɔsusumɔi kɛ bɔ ni wɔnuɔ he wɔhãa. Wɔnyɛɔ wɔwieɔ nibii ni yeɔ ebuaa mɛi ni hãa amɛnáa miishɛɛ. Shi wɔwiemɔi baanyɛ aye mɛi awui loo egba amɛnaa.

3 Wiemɔi yɛ hewalɛ waa, ni Yehowa tsɔɔ wɔ bɔ ni wɔbaafee wɔkɛ nikeenii nɛɛ atsu nii jogbaŋŋ. Ekɛɔ wɔ akɛ: “Wiemɔ ni ehiii ko akaje nyɛnaa, shi moŋ nɔ ni hi ni tswaa mɔ emaa shi, yɛ hiamɔ ni yɔɔ lɛ naa, koni mɛi ni nuɔ lɛ aná nɔ ko ni sɛɛnamɔ yɔɔ he.” (Efesobii 4:29) Hã wɔkwɛ bɔ ni wɔbaafee wɔkɛ nikeenii ni jɛ  Nyɔŋmɔ ŋɔɔ nɛɛ atsu nii yɛ gbɛ ni baasa ehiɛ, ni ewo mɛi krokomɛi hewalɛ lɛ nɔ.

KWƐMƆ OWIEMƆ JOGBAŊŊ

4, 5. Mɛɛ gbɛ nɔ Biblia mli abɛi komɛi hãa wɔnaa akɛ, wiemɔi yɛ hewalɛ?

4 Wiemɔi yɛ hewalɛ, no hewɔ lɛ, esa akɛ wɔkwɛ jogbaŋŋ yɛ nɔ ni wɔwieɔ kɛ bɔ ni wɔwieɔ lɛ wɔhãa lɛ he. Abɛi 15:4 lɛ kɛɔ akɛ: “Naajɔlɛ lilɛi lɛ, eji wala tso, shi lakamɔ wiemɔi lɛ, egbeɔ mɔ mumɔ.” Bɔ ni tso kpakpa hãa mɔ he jɔɔ lɛ, ni ehãa mɔ wala lɛ, nakai nɔŋŋ wiemɔ kpakpa hãa mɔ ni nuɔ lɛ he jɔɔ lɛ. Shi wiemɔi ni wa yeɔ mɛi awui ni efiteɔ amɛmiishɛɛ.​—Abɛi 18:21.

Naajɔlɛ wiemɔ hãa mɔ he jɔɔ lɛ

5 Abɛi 12:18 lɛ kɛɔ akɛ: “Wiemɔ ni awieɔ ni asusuuu he lɛ, etamɔ nɔ ni aabamɔ klante.” Wiemɔi ni ehiii baanyɛ agba mɛi anaa ní efite mɛi ateŋ. Ekolɛ okaiɔ be ko be ni mɔ ko kɛ bo wie bɔ ni esaaa ní edɔ bo waa lɛ. Shi nakai abɛ lɛ tsaa nɔ akɛ: “Hiɛshikalɔi alilɛi tsaa mɔ.” Kɛ́ wɔsusu nii ahe jogbaŋŋ dani wɔwie lɛ, ebaanyɛ ehã mɛi ni tsuii ekumɔ lɛ aná miishɛɛ ekoŋŋ, ni ebaanyɛ esaa nanemɛi ni ekolɛ amɛyanuuu amɛhe shishi, ní no ehã amɛteŋ efite lɛ po ateŋ. (Kanemɔ Abɛi 16:24.) Kɛ́ wɔkai akɛ wɔwiemɔi baanyɛ asa mɛi krokomɛi ahe lɛ, wɔbaakwɛ wɔwiemɔ jogbaŋŋ.

6. Mɛni hewɔ ebɛ mlɛo akɛ wɔbaakudɔ wɔwiemɔi lɛ?

6 Nɔ kroko hewɔ ni esa akɛ wɔkwɛ wɔwiemɔ jogbaŋŋ ji akɛ, wɔ fɛɛ wɔyeee emuu. “Gbɔmɔ tsuiŋ susumɔ lɛ, efɔŋ ni,” ni bei pii lɛ, wɔwiemɔi hãa anaa nɔ ni yɔɔ wɔtsui mli. (1 Mose 8:21; Luka 6:45) Ebɛ mlɛo  kwraa akɛ wɔbaakudɔ wɔwiemɔi. (Kanemɔ Yakobo 3:2-4.) Shi esa akɛ wɔya nɔ wɔfee tsakemɔi yɛ bɔ ni wɔkɛ mɛi wieɔ wɔhãa lɛ mli.

7, 8. Mɛɛ gbɛ nɔ wɔwiemɔi baanyɛ asa wɔ kɛ Yehowa teŋ wekukpaa lɛ he?

7 Nɔ kroko hu hewɔ ni esa akɛ wɔkwɛ wɔwiemɔ jogbaŋŋ ji akɛ, wɔbaabu wɔhe akɔntaa wɔhã Yehowa yɛ nɔ ni wɔwieɔ kɛ bɔ ni wɔwieɔ lɛ wɔhãa lɛ he. Yakobo 1:26 lɛ wieɔ akɛ: “Kɛ́ gbɔmɔ ko susuɔ akɛ eji Nyɔŋmɔ jálɔ, shi ekudɔɔɔ elilɛi jogbaŋŋ lɛ, eelaka lɛ diɛŋtsɛ etsui, ni ejamɔ lɛ, efolo ni.” Abaanyɛ atsɔɔ Greek wiemɔ ni atsɔɔ shishi akɛ “efolo” lɛ shishi hu akɛ, “he bɛ sɛɛnamɔ.” (1 Korintobii 15:17) No hewɔ lɛ, kɛ́ wɔkwɛɛɛ wɔwiemɔ jogbaŋŋ lɛ, ebaanyɛ ehã wɔ kɛ Yehowa teŋ wekukpaa lɛ mli agbɔjɔ, loo efite po.​—Yakobo 3:8-10.

8 Ekã shi faŋŋ akɛ, wɔyɛ yiŋtoi kpakpai ahewɔ ni  esa akɛ wɔkwɛ jogbaŋŋ yɛ nɔ ni wɔwieɔ kɛ bɔ ni wɔwieɔ lɛ wɔhãa lɛ he. Bɔ ni afee ni wɔnyɛ wɔkɛ nikeenii ni Yehowa kɛhã wɔ, ni ji nyɛmɔ ni wɔyɔɔ ni wɔkɛwieɔ lɛ atsu nii bɔ ni etaoɔ lɛ, ehe miihia ni wɔle wiemɔi ni esaaa akɛ wɔwieɔ.

WIEMƆI NI KUMƆƆ MƆ

9, 10. (a) Ŋmɛnɛ lɛ, mɛɛ wiemɔi mɛi pii wieɔ? (b) Mɛni hewɔ wɔwieee yakayaka wiemɔi lɛ?

9 Ŋmɛnɛ lɛ, mɛi pii wieɔ yakayaka wiemɔi, loo wiemɔi ni he tseee. Mɛi pii susuɔ akɛ, ja amɛkɛ wiemɔi ni ehiii loo yakayaka wiemɔi etsu nii dani mɛi baanu amɛ shishi. Bei pii lɛ, mɛi ni awoɔ amɛ nyɔmɔ koni amɛwo mɛi anaa ŋmɔlɔ lɛ wieɔ yakayaka wiemɔi kɛ wiemɔi ni kɔɔ jeŋba sha he kɛwoɔ mɛi anaa ŋmɔlɔ. Shi bɔfo Paulo wie akɛ: “Esa akɛ nyɛjie nibii nɛɛ fɛɛ yɛ nyɛhe nyɛshwie: mlifu, mlila, efɔŋfeemɔ, wiemɔ fɔŋ, ni nyɛjie yakayaka wiemɔ kɛjɛ nyɛdaaŋ.” (Kolosebii 3:8) Ewie hu akɛ, “yakayaka wiemɔ ni akɛyeɔ fɛo” lɛ, “akatsĩ tã po” yɛ anɔkwa Kristofoi ateŋ.​—Efesobii 5:3, 4.

10 Yakayaka wiemɔi ahe tseee, no hewɔ lɛ, Yehowa kɛ mɛi ni sumɔɔ lɛ lɛ fɛɛ miihi. Biblia lɛ tsĩ nibii ni he tseee loo “muji nii” tã efata “heloo lɛ nitsumɔi lɛ” ahe. (Galatiabii 5:19-21) “Muji nii” baanyɛ akɔ eshai pii ahe, ni muji nii kome baanyɛ ehã mɔ kɛ ehe ayawo muji nii kroko mli. Kɛ́ mɔ ko kɛfee esu akɛ ebaawie yakayaka wiemɔi ni he tseee kwraa, ni esumɔɔɔ ni ekpaa lɛ, no lɛ, esaaa akɛ ehiɔ asafo lɛ mli.​—2 Korintobii 12:21; Efesobii 4:19; kwɛmɔ Wiemɔi Komɛi Amligbalamɔ 23.

11, 12. (a) Mɛni ji oshekuyeli? (b) Mɛni hewɔ esaaa akɛ wɔwieɔ mɔ ko he efɔŋ lɛ?

 11 Agbɛnɛ hu, esaaa akɛ wɔyeɔ mɛi ahe osheku. Wɔ fɛɛ wɔsumɔɔ ni wɔle mɛi ahe saji, ní wɔhã mɛi ale wɔnanemɛi kɛ wɔwekumɛi ahe saji. Klɛŋklɛŋ afii 100 lɛ mli Kristofoi lɛ po shwe akɛ amɛbaale nɔ ni yaa nɔ yɛ amɛnyɛmimɛi lɛ ashihilɛ mli, koni amɛna nɔ ni amɛbaanyɛ amɛfee kɛwa amɛ. (Efesobii 6:21, 22; Kolosebii 4:8, 9) Shi ewaaa akɛ mɛi ahe wiemɔ baatsɔ oshekuyeli. Kɛ́ wɔnu mɔ ko he sane ko, ni wɔ hu wɔgba mɛi krokomɛi lɛ, ekolɛ wɔbaawie nɔ ko ni bɛ mli loo wɔbaajie mɔ lɛ teemɔŋ sane ko kpo. Kɛ́ wɔkwɛɛɛ ni ahi lɛ, su gbonyo nɛɛ baahã wɔwie mɔ lɛ he efɔŋ. Farisifoi lɛ wie Yesu he efɔŋ ni amɛfolɔ enaa. (Mateo 9:32-34; 12:22-24) Kɛ́ awie mɔ ko he efɔŋ lɛ, efiteɔ mɔ lɛ gbɛ́i, edɔɔ mɔ lɛ, ekɛ naataamɔi baa, ni efiteɔ mɛi ateŋ.​—Abɛi 26:20.

12 Yehowa miisumɔ ni wɔkɛ wɔwiemɔi awa mɛi ni wɔkɛwo amɛ hewalɛ, shi jeee ni wɔkɛfite nanemɛi ateŋ. Yehowa nyɛɔ mɛi ni “woɔ nyɛmimɛi ateŋ béi.” (Abɛi 6:16-19) Mɔ klɛŋklɛŋ ni wie mɔ ko he efɔŋ ji Satan Abonsam; ewie Nyɔŋmɔ he efɔŋ. (Kpojiemɔ 12:9, 10) Ŋmɛnɛ lɛ, mɛi maleɔ mɛi ahe waa. Shi esaaa akɛ afeɔ nakai yɛ Kristofoi asafo lɛ mli. (Galatiabii 5:19-21) No hewɔ lɛ, esa akɛ wɔkwɛ wɔwiemɔ jogbaŋŋ, ní be fɛɛ be kɛ́ wɔbaawie nɔ ko lɛ, wɔjwɛŋ he dani wɔwie. Kɛ́ onu mɔ ko he sane lɛ, dani obaakɛɛ mɔ kroko lɛ, bi ohe akɛ: ‘Ani nɔ ni miyawie lɛ, anɔkwale ni? Ani ehi akɛ mawie? Ani ehe yɛ sɛɛnamɔ? Kɛ́ mɔ ni miyawie ehe lɛ nu sane lɛ, ani ebaagba minaa? Kɛ́ mɔ  ko wie nakai yɛ mihe lɛ, te manu he mahã tɛŋŋ?’​—Kanemɔ 1 Tesalonikabii 4:11.

13, 14. (a) Kɛ́ wɔwie wiemɔ fɔŋ lɛ, mɛɛ gbɛ nɔ ebaanyɛ ená mɛi anɔ hewalɛ? (b) Kɛ́ akɛɛ mɔ ko jɛɔ mɔ lɛ, te atsɔɔ tɛŋŋ? Mɛni hewɔ esaaa akɛ Kristofonyo jɛɔ mɔ lɛ?

13 Wɔ fɛɛ lɛ, bei komɛi lɛ, wɔwieɔ nɔ ko, kɛkɛ lɛ sɛɛ mli lɛ wɔshwa wɔhe. Shi wɔsumɔŋ ni ale wɔ akɛ mɛi ni wieɔ mɛi ahiɛ loo mɛi ni kɛɔ mɛi nibii ni baadɔ amɛ. Esaaa akɛ wɔwieɔ wiemɔ fɔŋ ko kwraa. Paulo wie akɛ: “Nyɛjiea mlijoomɔ, kɛ mlila, kɛ mlifu, kɛ bolɔmɔ, kɛ wiemɔ fɔŋ fɛɛ . . . yɛ nyɛhe nyɛshɛrɛa nyɛshwiea.” (Efesobii 4:31) Bibliai krokomɛi tsɔɔ “wiemɔ fɔŋ” shishi akɛ, “wiemɔ ni yeɔ mɔ awui,” loo “jɛmɔ wiemɔ.” Wiemɔ fɔŋ hãa bulɛ ni ayɔɔ kɛhã mɛi lɛ tãa, ni ehãa amɛnuɔ he akɛ amɛbɛ nɔ ko mli. Esa akɛ wɔkwɛ jogbaŋŋ, titri lɛ, kɛ́ wɔkɛ gbekɛbii miiwie, ní wɔkawie nɔ ko ni baadɔ amɛ, ejaakɛ sane dɔɔ amɛ waa.​—Kolosebii 3:21.

14 Biblia lɛ bɔɔ wɔ kɔkɔ yɛ wiemɔ fɔŋ henɔ ko ni yɔɔ hiɛdɔɔ waa lɛ he, no ji mɔjɛmɔ. Kɛ́ akɛɛ mɔ ko jɛɔ mɔ lɛ, etsɔɔ akɛ be fɛɛ be lɛ, ewieɔ wiemɔi gbohii eshiɔ mɛi koni edɔ amɛ. Kɛ́ mɔ ko jɛɔ ehefatalɔ loo ebii lɛ, ehiii kwraa! Anɔkwa, kɛ́ mɔ ko jɛɔ mɛi ni ekpaaa lɛ, enyɛŋ eya nɔ ehi asafo lɛ mli. (1 Korintobii 5:11-13; 6:9, 10) Wɔna akɛ, kɛ́ wɔwie yakayaka wiemɔi, wiemɔi ni bɛ mli, loo wiemɔi ni ehiii lɛ, wɔbaafite wekukpaa ni yɔɔ wɔ kɛ Yehowa kɛ mɛi krokomɛi ateŋ lɛ.

WIEMƆI NI TSWAA MƆ EMAA SHI

15. Mɛɛ wiemɔi nɛkɛ hãa naanyobɔɔ ni yɔɔ mɛi ateŋ lɛ mli waa?

15 Te wɔɔfee tɛŋŋ wɔkɛ nikeenii ni ji wiemɔ lɛ atsu nii bɔ ni Yehowa kpaa gbɛ lɛ? Eyɛ mli akɛ Biblia lɛ  etsɔɔɔ wɔ nɔ tuuntu ni esa akɛ wɔwie kɛ nɔ ni esaaa akɛ wɔwieɔ moŋ, shi ekɛɔ wɔ akɛ, wɔwie wiemɔi “ni hi ni tswaa mɔ emaa shi.” (Efesobii 4:29) Wiemɔi ni tswaa mɔ emaa shi lɛ he tse, ehi, ni eji anɔkwale. Yehowa miisumɔ ni wɔkɛ wɔwiemɔi awo mɛi hewalɛ ni wɔkɛye wɔbua amɛ. Ekolɛ wɔnáŋ enɛ feemɔ mlɛo. Ewaaa akɛ wɔbaawie nibii gbohii loo wiemɔi ni wɔsusuuu he, shi kɛ́ wɔbaawie nibii kpakpai lɛ, ja wɔmia wɔhiɛ. (Tito 2:8) Hã wɔkwɛ gbɛi komɛi ni wɔbaanyɛ wɔtsɔ nɔ wɔkɛ wɔwiemɔi atswa mɛi ama shi.

16, 17. (a) Mɛni hewɔ esa akɛ wɔjie mɛi ayi lɛ? (b) Namɛi ayi wɔbaanyɛ wɔjie?

16 Yehowa kɛ Yesu fɛɛ jieɔ mɛi ayi waa. Esa akɛ wɔkase amɛ. (Mateo 3:17; 25:19-23; Yohane 1:47) Kɛ́ wɔsusuɔ mɛi ahe, ni wɔsumɔɔ amɛsane lɛ, wɔbaanyɛ wɔjie amɛyi bɔ ni baawo amɛ hewalɛ waa. Abɛi 15:23 lɛ kɛɔ akɛ: “Wiemɔ ni awieɔ yɛ be ni sa mli lɛ​—ehi waa diɛŋtsɛ!” Kɛ́ mɔ ko jɛ etsuiŋ ejie wɔyi yɛ nɔ ko ni wɔtsu he, loo ewie nɔ ko ni tsɔɔ akɛ ehiɛ esɔ nɔ ko ni wɔfee lɛ, ewoɔ wɔ hewalɛ.​—Kanemɔ Mateo 7:12; kwɛmɔ Wiemɔi Komɛi Amligbalamɔ 27.

17 Kɛ́ okɛfee osu akɛ obaatao sui kpakpai ni mɛi yɔɔ lɛ, ewaŋ akɛ obaajɛ otsuiŋ ojie amɛyi. Akɛ nɔkwɛmɔnɔ lɛ, ekolɛ okpa shi ona akɛ, mɔ ko yɛ nyɛsafo lɛ mli ni kɛ́ eyɛ nifeemɔ lɛ, esaa ehe jogbaŋŋ, loo ebɔɔ mɔdɛŋ ni ehã saji ahetoo yɛ asafoŋ kpeei ashishi. Ekolɛ ole gbekɛ ko hu ni feɔ nɔ ni Nyɔŋmɔ sumɔɔ kɛ́ etee skul, loo mɔ ko ni hiɛ efã ni yaa shiɛmɔ be fɛɛ be. Kɛ́ ojie amɛyi lɛ, ebaanyɛ ewo amɛ hewalɛ waa. Agbɛnɛ hu, ehe miihia waa ni wumɛi akɛɛ amɛŋamɛi akɛ amɛsumɔɔ amɛ, ni amɛhiɛ sɔɔ amɛ. (Abɛi 31:10, 28)  Bɔ ni hulu la kɛ nu he hiaa tso lɛ, nakai nɔŋŋ yijiemɔ he hiaa mɛi, titri lɛ, gbekɛbii. Taomɔ hegbɛi ni obaanyɛ okɛjie amɛyi yɛ amɛsui kpakpai kɛ nibii ni amɛfeɔ lɛ ahewɔ. Kɛ́ wɔjie amɛyi lɛ, ebaanyɛ ewo amɛ hewalɛ, ní ehã amɛná ekãa kɛfee nɔ ni ja be fɛɛ be.

Nɔ ni wɔwieɔ kɛ bɔ ni wɔwieɔ lɛ wɔhãa lɛ baanyɛ awo mɛi hewalɛ, ni eshɛje amɛmii

18, 19. Mɛni hewɔ esa akɛ wɔbɔ mɔdɛŋ fɛɛ ni wɔbaanyɛ ni wɔwo mɛi hewalɛ ni wɔshɛje amɛmii lɛ? Te wɔbaafee lɛ tɛŋŋ?

18 Kɛ́ wɔwo mɛi hewalɛ, ni wɔshɛje amɛmii lɛ, belɛ wɔmiikase Yehowa. Esusuɔ mɛi ni bɛ yelikɛbualɔ kɛ “mɛi ni tsui ekumɔ lɛ” ahe waa. (Yesaia 57:15) Yehowa miisumɔ ni ‘wɔya nɔ wɔwowoo wɔhe hewalɛ’ ni ‘wɔshɛje mɛi ni ehao lɛ amii.’ (1 Tesalonikabii 5: 11, 14) Kɛ́ wɔbɔ mɔdɛŋ akɛ wɔbaafee nakai lɛ, enaa, ni ehiɛ sɔɔ.

19 Ekolɛ oyɔse akɛ asafo lɛ mli nyo ko nijiaŋ eje wui loo ehao. Mɛni obaanyɛ owie kɛwo lɛ hewalɛ? Ekolɛ onyɛŋ otsu naagba lɛ he nii, shi obaanyɛ ohã mɔ lɛ ana akɛ osusuɔ ehe. Akɛ nɔkwɛmɔnɔ lɛ, obaanyɛ oyasara lɛ loo okɛ lɛ aje kpo. Obaanyɛ okane ŋmalɛ ko ni woɔ mɔ hewalɛ waa ohã lɛ loo okɛ lɛ asɔle po. (Lala 34:18; Mateo 10:29-31) Hã ena akɛ nyɛmimɛi ni yɔɔ asafo lɛ mli lɛ sumɔɔ lɛ. (1 Korintobii 12:12-26; Yakobo 5:14, 15) Ni hã ena yɛ owiemɔ mli akɛ, jeee nɔ ko kɛkɛ okɛɔ lɛ lɛ, shi moŋ, otsuiŋ tɔ̃ɔ ojɛɔ owieɔ lɛ.​—Kanemɔ Abɛi 12:25.

20, 21. Mɛni hãa efeɔ mlɛo kɛhãa mɛi akɛ amɛbaakpɛlɛ ŋaawoo nɔ ni amɛkɛtsu nii?

 20 Kɛ́ wɔwo mɛi ŋaa kpakpa lɛ, no hu baanyɛ atswa amɛ ema shi. Akɛni wɔyeee emuu hewɔ lɛ, ŋaawoo he hiaa wɔ fɛɛ yɛ be kɛ beiaŋ. Abɛi 19:20 lɛ kɛɔ akɛ: “Bo ŋaawoo toi, ni okpɛlɛ tsɔsemɔ, koni wɔsɛɛ lɛ ohiɛ akã shi.” Jeee asafoŋ onukpai pɛ baanyɛ awo mɛi ŋaa. Ehe miihia ni fɔlɔi kɛ gbɛtsɔɔmɔi ahã amɛbii. (Efesobii 6:4) Ni nyɛmimɛi yei hu baanyɛ awo nyɛmimɛi yei krokomɛi ŋaa kpakpa. (Tito 2:3-5) Akɛni wɔsumɔɔ wɔnyɛmimɛi lɛ hewɔ lɛ, kɛ́ wɔbaawo amɛ ŋaa lɛ, esaaa akɛ wɔfeɔ nakai yɛ gbɛ ni baahã amɛnu he akɛ amɛbɔɔɔ mɔdɛŋ kwraa lɛ nɔ. Mɛni baanyɛ aye abua wɔ?

21 Ekolɛ okaiɔ be ko ni mɔ ko wo bo ŋaa kpakpa yɛ gbɛ ni hã efee mlɛo kɛhã bo akɛ obaakpɛlɛ nɔ ni okɛtsu nii lɛ nɔ. Mɛni hã okpɛlɛ ŋaawoo lɛ nɔ lɛ? Ekolɛ onu he akɛ mɔ lɛ susuɔ ohe waa. Aloo ekolɛ mɔ lɛ jɛ mlihilɛ kɛ suɔmɔ mli ekɛ bo wie. (Kolosebii 4:6) Ekolɛ mɔ lɛ jɛ Biblia lɛ mli ewo bo ŋaa lɛ. (2 Timoteo 3:16) Kɛ́ wɔmiiwo mɔ ko ŋaa, ni wɔtsɛ ŋmalɛ ko yisɛɛ tɛ̃ɛ loo wɔfeee nakai po lɛ, esa akɛ ŋaawoo lɛ adamɔ Biblia lɛ nɔ. Esaaa akɛ mɔ ko kɛ esusumɔi fiɔ mɛi anɔ, loo etsakeɔ ŋmalɛi ahiɛ koni ekɛfi esusumɔi asɛɛ. Kɛ́ okai gbɛ ni atsɔ nɔ awo bo ŋaa lɛ, ebaanyɛ ewa bo kɛ́ bo hu oowo mɛi ŋaa.

22. Te obaasumɔ ni okɛ nikeenii ni ji wiemɔ lɛ atsu nii ohã tɛŋŋ?

22 Wiemɔ ji nikeenii ni jɛ Nyɔŋmɔ ŋɔɔ. Akɛni wɔsumɔɔ Nyɔŋmɔ hewɔ lɛ, esa akɛ wɔkɛ nikeenii nɛɛ atsu nii jogbaŋŋ. Kaimɔ akɛ, wɔwiemɔi baanyɛ akumɔ mɛi loo etswa amɛ ema shi. No hewɔ lɛ, nyɛhãa wɔfea bɔ fɛɛ bɔ ni wɔbaanyɛ ni wɔkɛ wɔwiemɔi atswa mɛi ama shi, ni wɔkɛwo amɛ hewalɛ hu.