Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 YITSO 17

Hii Nyɔŋmɔ Suɔmɔ Lɛ Mli

Hii Nyɔŋmɔ Suɔmɔ Lɛ Mli

“Nyɛtswaa nyɛhe nyɛmaa nyɛhemɔkɛyeli ni yɔɔ krɔŋkrɔŋ fe fɛɛ lɛ nɔ . . . Ni nyɛya nɔ nyɛhi Nyɔŋmɔ suɔmɔ lɛ mli.”​—YUDA 20, 21.

1, 2. Mɛni wɔbaanyɛ wɔfee koni wɔya nɔ wɔhi Nyɔŋmɔ suɔmɔ lɛ mli?

WƆTEŊ mɔ fɛɛ mɔ miisumɔ ni ená gbɔmɔtsoŋ hewalɛ kpakpa. No hewɔ lɛ, wɔbɔɔ mɔdɛŋ ni wɔye niyenii kpakpai, wɔgbɔle wɔkpɔiaŋ, ni wɔhiɛ wɔgbɔmɔtso jogbaŋŋ. Eyɛ mli akɛ enɛ biɔ mɔdɛŋbɔɔ moŋ, shi akɛni wɔnáa he sɛɛ hewɔ lɛ, wɔnijiaŋ ejeee wui. Shi esa akɛ wɔná hewalɛ yɛ shishinumɔ kroko hu naa.

2 Amrɔ nɛɛ, wɔkase Yehowa he nii kɛshɛ he ko, shi ehe miihia ni wɔhã wekukpaa ni yɔɔ wɔ kɛ lɛ teŋ lɛ mli aya nɔ awa. Be ni Yuda wo Kristofoi hewalɛ ni ‘amɛya nɔ amɛhi Nyɔŋmɔ suɔmɔ lɛ mli’ lɛ, etsɔɔ amɛ bɔ ni amɛfee lɛ amɛhã. Ekɛɛ amɛ akɛ: “Nyɛtswaa nyɛhe nyɛmaa nyɛhemɔkɛyeli ni yɔɔ krɔŋkrɔŋ fe fɛɛ lɛ nɔ.” (Yuda 20, 21) Belɛ, te wɔɔfee tɛŋŋ wɔhã wɔhemɔkɛyeli lɛ mli awa lɛ?

YAA NƆ OTSWA OHEMƆKƐYELI LƐ OMA SHI

3-5. (a) Te Satan sumɔɔ ni ona Yehowa mlai kɛ eshishitoo mlai lɛ ohã tɛŋŋ? (b) Te onaa Yehowa mlai kɛ eshishitoo mlai lɛ ohãa tɛŋŋ?

3 Ehe miihia waa ni ohã oyiŋ atsɔ akɛ, Yehowa gbɛi lɛ anɔ bɛ. Satan miisumɔ ni ona Nyɔŋmɔ mlai kɛ eshishitoo  mlai lɛ akɛ amɛnɔyeli wa tsɔ, ni akɛ, kɛ́ bo diɛŋtsɛ okpɛ oyiŋ yɛ ekpakpa kɛ efɔŋ he lɛ, obaaná miishɛɛ. Kɛjɛ Eden abɔɔ mli tɔ̃ɔ lɛ, ebɔ mɔdɛŋ akɛ ebaahã mɛi ahe enɛ amɛye. (1 Mose 3:1-6) Ni ŋmɛnɛ hu lɛ, eebɔ mɔdɛŋ waa akɛ ebaafee nakai nɔŋŋ.

4 Ani Satan sane ja? Ani Yehowa mlai kɛ eshishitoo mlai lɛ anɔyeli wa tsɔ? Dabi. Akɛ nɔkwɛmɔnɔ lɛ, ŋɔɔ lɛ akɛ, ooshara shi yɛ abɔɔ fɛfɛo ko mli. Trukaa lɛ, oyana afabaŋ ko ni kwɔ waa. Ekolɛ obaabi ohe akɛ, ‘Mɛni hewɔ kwraa afo afabaŋ nɛɛ kɛtsĩ mi gbɛ?’ Shi nɔŋŋ kɛkɛ ni onu ni jata ko miihũu yɛ afabaŋ lɛ sɛɛ. Agbɛnɛ, te obaana afabaŋ lɛ ohã tɛŋŋ? Obaaná miishɛɛ waa, ejaakɛ afabaŋ lɛ hãŋ jata lɛ akpe bo! Yehowa shishitoo mlai lɛ tamɔ nakai afabaŋ lɛ, ni Abonsam tamɔ nakai jata lɛ. Nyɔŋmɔ Wiemɔ lɛ bɔɔ wɔ kɔkɔ akɛ: “Nyɛhiɛ ahia nyɛhe nɔ be fɛɛ be, nyɛkwɛa nyɛhe nɔ jogbaŋŋ! Nyɛhenyɛlɔ, Abonsam lɛ, nyiɛ tamɔ jata ni miihũu, ni eetao mɔ ko emi.”​—1 Petro 5:8.

5 Yehowa miisumɔ ni wɔná shihilɛ ni hi fe fɛɛ. Esumɔɔɔ ni Satan lakaa wɔ. No hewɔ ni ehã wɔ mlai kɛ shishitoo mlai koni amɛbu wɔhe, ni amɛhã wɔná miishɛɛ lɛ. (Efesobii 6:11) Yakobo ŋma akɛ: “Mɔ ni maa eyi shi ekwɛɔ heyeli mla ni eye emuu lɛ mli, ni ekãa he efeɔ lɛ, . . . ebaaná miishɛɛ yɛ nɔ ni etsuɔ lɛ mli.”​—Yakobo 1:25.

6. Mɛni baahã wɔna faŋŋ akɛ, Nyɔŋmɔ gbɛi lɛ anɔ bɛ?

6 Kɛ́ wɔbo Yehowa toi lɛ, wɔshihilɛ hiɔ, ni wɔkɛ lɛ teŋ naanyobɔɔ lɛ hu mli waa fe tsutsu lɛ. Akɛ nɔkwɛmɔnɔ lɛ, ekɛɛ wɔsɔle wɔhã lɛ daa, ni kɛ́ wɔfee nakai lɛ, wɔnáa he sɛɛ. (Mateo 6:5-8; 1 Tesalonikabii 5:17) Ekɛɛ  wɔ hu akɛ, wɔkpe kutuu ni wɔjá lɛ ni wɔwowoo wɔhe hewalɛ, ní wɔkɛ wɔhe awo shiɛmɔ kɛ nitsɔɔmɔ nitsumɔ lɛ hu mli kɛmɔ shi, ni enɛ ni wɔfeɔ lɛ hãa wɔmii shɛɔ wɔhe waa. (Mateo 28:19, 20; Galatiabii 6:2; Hebribii 10:24, 25) Kɛ́ wɔsusu bɔ ni nibii nɛɛ ehã wɔhemɔkɛyeli lɛ mli ewa lɛ he lɛ, ehãa wɔnaa faŋŋ akɛ, Yehowa gbɛi lɛ anɔ bɛ.

7, 8. Mɛni baaye abua wɔ ni wɔkaye wɔtsui yɛ kai ni ekolɛ wɔkɛbaakpe wɔsɛɛ lɛ ahe?

7 Ekolɛ wɔbaaye wɔtsui akɛ, be ko baaba ni wɔkɛ wɔhemɔkɛyeli lɛ he kaa ko ni wa waa baakpe. Kɛ́ onu he nakai lɛ, kaimɔ Yehowa wiemɔi nɛɛ: “Mi Yehowa, miji o-Nyɔŋmɔ lɛ, mɔ ni tsɔɔ bo nii koni oná he sɛɛ lɛ, mɔ ni tsɔɔ bo gbɛ yɛ gbɛ ni esa akɛ onyiɛ nɔ lɛ nɔ lɛ. Miná kulɛ oboɔ mikitãi lɛ toi jogbaŋŋ! Kulɛ otoiŋjɔlɛ  lɛ baafee tamɔ faa ni ojalɛ nifeemɔ lɛ hu baafee tamɔ ŋshɔkei.”​—Yesaia 48:17, 18.

8 Kɛ́ wɔbo Yehowa toi lɛ, wɔhejɔlɛ lɛ baatamɔ faa ni mli nu etãaa, ni wɔjalɛ lɛ hu baatamɔ ŋshɔkei ni kuɔ be fɛɛ be. Ekɔɔɔ he eko shihilɛ ni wɔkɛbaakpe lɛ, wɔbaaye Yehowa anɔkwa. Biblia lɛ kɛɛ: “Shɛ ojatsu lɛ ofɔ̃ Yehowa nɔ, ni ebaaye ebua bo. Ehãŋ jalɔ agbee shi kɔkɔɔkɔ.”​—Lala 55:22.

‘YAA OHIƐ KƐSHƐ DALƐ HE’

9, 10. Kɛ́ akɛɛ Kristofonyo ko eda lɛ, te eshishi lɛ?

9 Kɛ́ otee nɔ ofee nibii ni baahã okɛ Yehowa teŋ wekukpaa lɛ mli awa lɛ, ‘obaaya ohiɛ kɛshɛ dalɛ he.’ (Hebribii 6:1) Kɛ́ akɛɛ Kristofonyo ko eda lɛ, te eshishi lɛ?

10 Jeee afii abɔ ni Kristofonyo ko eye lɛ ji nɔ ni tsɔɔ akɛ eda. Ja wɔkɛ Yehowa efee wɔ-Naanyo ni fe fɛɛ, ni wɔkwɛ nii tamɔ bɔ ni ekwɛɔ nii lɛ, dani abaanyɛ akɛɛ akɛ wɔda. (Yohane 4:23) Paulo ŋma akɛ: “Mɛi ni hiɔ shi yɛ heloo lɛ naa lɛ kɛ amɛjwɛŋmɔ maa heloo lɛ nibii anɔ, shi mɛi ni hiɔ shi yɛ mumɔ lɛ naa lɛ kɛ amɛjwɛŋmɔ maa mumɔ lɛ nibii anɔ.” (Romabii 8:5) Kristofonyo ni eda lɛ kɛ ejwɛŋmɔ emaaa ŋɔɔmɔyeli loo heloonaa nibii anɔ. Moŋ lɛ, ekɛ ejwɛŋmɔ maa Yehowa sɔɔmɔ lɛ nɔ, ni ekpɛɔ yiŋ ni ja. (Abɛi 27:11; kanemɔ Yakobo 1:2, 3.) Ehãaa mɔ ko loo nɔ ko aná enɔ hewalɛ ni efee efɔŋ. Ele nɔ ni ja, ni etswaa efai shi akɛ no ebaafee.

11, 12. (a) Mɛni Paulo wie yɛ Kristofonyo ‘jwɛŋmɔ’ he? (b) Mɛɛ gbɛ nɔ Kristofonyo ko ni miitao etsɔ mɔ ni eda lɛ tamɔ mɔ ko ni miitao etsɔ foidalɔ?

11 Kɛ́ Kristofonyo ko baafee mɔ ni eda lɛ, ja emia  ehiɛ. Bɔfo Paulo ŋma akɛ: “Mɛi ni edara lɛ anɔ ji niyenii ni tsii, amɛji mɛi ni kɛ amɛjwɛŋmɔ tsuɔ nii, ni amɛtsɔse amɛjwɛŋmɔ lɛ koni ele ekpakpa kɛ efɔŋ mlikpamɔ.” (Hebribii 5:14) Ekolɛ kɛ́ wɔnu wiemɔ ni ji ‘atsɔse’ lɛ, nɔ ni baa wɔjwɛŋmɔ mli ji foidalɔ ko ni miitsɔse ehe.

12 Kɛ́ wɔna foidalɔ ko ni he esa ni miijo foi lɛ, wɔle akɛ ekɛ be babaoo tsɔse ehe dani ebashɛ he ni eshɛ lɛ. Akɛ foidamɔ fɔɔɔ lɛ. Kɛ́ afɔ gbekɛ lɛ, enyɛɛɛ ekɛ eniji kɛ enaji atsu nii jogbaŋŋ. Shi kɛ́ be shwie mli lɛ, eleɔ bɔ ni amɔmɔɔ nibii amli, ni ekaseɔ nyiɛmɔ hu. Kɛ́ etsɔse ehe lɛ, ebaanyɛ ebatsɔ foidalɔ. Nakai nɔŋŋ ja wɔkɛ be babaoo etsɔse wɔhe dani wɔbaanyɛ wɔtsɔ Kristofonyo ni eda.

13. Mɛni baawa wɔ ni wɔsusu nii ahe tamɔ Yehowa?

13 Wɔkase bɔ ni wɔbaafee wɔsusu nii ahe tamɔ Yehowa, ní wɔkwɛ nii tamɔ ekwɛɔ nii lɛ yɛ wolo nɛɛ mli. Wɔna hu akɛ, esa akɛ wɔhiɛ asɔ Yehowa mlai kɛ eshishitoo mlai lɛ, ni wɔsumɔ amɛ hu. Kɛ́ wɔmiikpɛ yiŋ ko lɛ, wɔbiɔ wɔhe akɛ: ‘Mɛɛ mlai loo shishitoo mlai yɔɔ Biblia lɛ mli ni kɔɔ sane nɛɛ he? Te mafee tɛŋŋ mikɛtsu nii? Mɛni Yehowa baasumɔ ni mafee?’​—Kanemɔ Abɛi 3:5, 6; Yakobo 1:5.

14. Mɛni esa akɛ wɔfee koni wɔhemɔkɛyeli lɛ mli awa?

14 Esa akɛ wɔhã hemɔkɛyeli ni wɔyɔɔ yɛ Yehowa mli lɛ mli awa be fɛɛ be. Bɔ ni niyenii ni hewalɛ yɔɔ mli hãa wɔnáa gbɔmɔtsoŋ hewalɛ kpakpa lɛ, nakai nɔŋŋ kɛ́ wɔtee nɔ wɔkase Yehowa he nii lɛ, ebaahã wɔhemɔkɛyeli lɛ mli awa. Be ni wɔbɔi Biblia lɛ kasemɔ lɛ, wɔkase Yehowa kɛ egbɛi lɛ ahe anɔkwalei komɛi. Shi be ni  be shwieɔ mli lɛ, ebaabi ni wɔnu anɔkwalei ni mli kwɔlɔ lɛ ashishi. No ji nɔ ni Paulo tsɔɔ be ni ewie akɛ: “Mɛi ni edara lɛ anɔ ji niyenii ni tsii” lɛ. Kɛ́ wɔkɛ nibii ni wɔkaseɔ lɛ tsu nii lɛ, wɔhiɛ baakã shi. Biblia lɛ wie akɛ: “Hiɛshikamɔ ji nɔ ni he hiaa fe fɛɛ.”​—Abɛi 4:5-7; 1 Petro 2:2.

15. Mɛni hewɔ ehe hiaa ni wɔsumɔ Yehowa kɛ wɔnyɛmimɛi lɛ waa lɛ?

15 Mɔ ko baanyɛ ahi gbɔmɔtsoŋ hewalɛ kpakpa, shi ele akɛ, ja etee nɔ ehiɛ ehe jogbaŋŋ dani ebaakã he ehi shi nakai. Nakai nɔŋŋ Kristofonyo ni eda lɛ le akɛ, ja emia ehiɛ dani wekukpaa ni yɔɔ ekɛ Yehowa teŋ lɛ mli baaya nɔ awa. Paulo kaiɔ wɔ akɛ: “Nyɛyaa nɔ nyɛpɛia nyɛmli nyɛkwɛa akɛ nyɛyɛ hemɔkɛyeli lɛ mli lo; nyɛyaa nɔ nyɛkaa bɔ ni nyɛji diɛŋtsɛ lɛ nyɛkwɛa.” (2 Korintobii 13:5) Fɛɛ sɛɛ lɛ, jeee hemɔkɛyeli ni mli wa pɛ he hiaa wɔ. Esa akɛ suɔmɔ ni wɔyɔɔ kɛhã Yehowa kɛ wɔnyɛmimɛi lɛ hu mli aya nɔ awa. Paulo kɛɛ: “Kɛ́ miyɛ . . . nilee, ni kɛ́ miyɛ hemɔkɛyeli fɛɛ bɔ ni manyɛ gɔji mafamɔ, shi mibɛ suɔmɔ lɛ, mijeee nɔ ko.”​—1 Korintobii 13:1-3.

HÃ OJWƐŊMƆ AHI OHIƐNƆKAMƆ LƐ NƆ

16. Te Satan sumɔɔ ni wɔnu he wɔhã tɛŋŋ?

16 Satan miisumɔ ni wɔnu he akɛ wɔnyɛŋ wɔsa Yehowa hiɛ kɔkɔɔkɔ. Eesumɔ ni wɔnijiaŋ aje wui, ni wɔnu he akɛ tsabaa ko bɛ kɛhã wɔnaagbai lɛ. Esumɔɔɔ ni wɔheɔ wɔnyɛmimɛi Kristofoi lɛ wɔyeɔ, ni esumɔɔɔ ni wɔnáa miishɛɛ hu. (Efesobii 2:2) Ele akɛ kɛ́ wɔná jwɛŋmɔ ni ejaaa lɛ, ebaanyɛ eye wɔ awui, ni efite wɔ kɛ Nyɔŋmɔ teŋ wekukpaa lɛ hu. Shi Yehowa ehã wɔ nɔ ko  ni baanyɛ awa wɔ koni wɔkaná jwɛŋmɔ ni ejaaa. No ji hiɛnɔkamɔ.

17. Mɛɛ sɛɛnamɔ yɔɔ hiɛnɔkamɔ he?

17 Biblia lɛ kɛ wɔhiɛnɔkamɔ lɛ to dade fai ni buɔ asraafonyo yitso he yɛ ta mli lɛ he yɛ 1 Tesalonikabii 5:8 lɛ, ni etsɛ dade fai nɛɛ akɛ “yiwalaheremɔ he hiɛnɔkamɔ.” Hiɛnɔkamɔ ni wɔyɔɔ yɛ Yehowa shiwoi amli lɛ baanyɛ abu wɔjwɛŋmɔ he, ni ehã wɔkwa susumɔi ni ejaaa.

18, 19. Mɛɛ gbɛ nɔ hiɛnɔkamɔ waje Yesu?

18 Yesu hiɛnɔkamɔ lɛ waje lɛ waa. Gbi gbɛkɛ ni enɔ jetsɛremɔ lɛ abaagbe lɛ lɛ, ekɛ shihilɛi srɔtoi ni jaraa kpe. Enaanyo kpaakpa tsɔɔ esɛɛ gbɛ. Enaanyo kroko hu kɛɛ eleee lɛ kwraa. Amɛteŋ mɛi krokomɛi hu kwa lɛ, ni amɛjo foi amɛshi lɛ. Lɛ diɛŋtsɛ emaŋbii te shi amɛwo lɛ, ni amɛbi ni apiŋ lɛ ni agbe lɛ. Mɛni ye ebua  lɛ ni enyɛ edamɔ shihilɛi ni jaraa nɛɛ fɛɛ anaa? Biblia lɛ wie akɛ: “Miishɛɛ ni kã ehiɛ lɛ hewɔ lɛ, edamɔ piŋmɔ ni epiŋ yɛ piŋmɔ tso lɛ nɔ lɛ naa, ni ebuuu hiɛgbele, ni eyata shi yɛ Nyɔŋmɔ maŋtsɛ sɛi lɛ ninejurɔ nɔ.”​—Hebribii 12:2.

19 Yesu le akɛ kɛji eye anɔkwa lɛ, ebaawo e-Tsɛ hiɛ nyam, ni abaana Satan amalelɔ. Hiɛnɔkamɔ nɛɛ hã emii shɛ ehe waa. Ele hu akɛ, etsɛŋ ebaayafata e-Tsɛ lɛ he ekoŋŋ yɛ ŋwɛi. Hiɛnɔkamɔ nɛɛ wa lɛ ni efi shi. Wɔ hu esa akɛ wɔhã wɔjwɛŋmɔ ahi wɔhiɛnɔkamɔ lɛ nɔ. Ebaaye ebua wɔ ni wɔfi shi, ekɔɔɔ he eko nɔ ni baaba.

20. Mɛni baawa bo ni ohiɛ jwɛŋmɔ ni ja?

20 Yehowa naa hemɔkɛyeli ni oyɔɔ lɛ, kɛ bɔ ni ofiɔ shi lɛ. (Yesaia 30:18; kanemɔ Maleaki 3:10.) Ewo shi akɛ, “ebaahã bo nibii ni otsui taoɔ lɛ.” (Lala 37:4)  No hewɔ lɛ, kaajie ojwɛŋmɔ yɛ ohiɛnɔkamɔ lɛ nɔ. Satan miitao ni ohiɛnɔkamɔ atã, ni onu he akɛ Yehowa shiwoi lɛ baŋ mli kɔkɔɔkɔ. Shi esaaa akɛ onáa susumɔ ni ejaaa! Kɛ́ ona akɛ ohiɛnɔkamɔ miitã lɛ, bi Yehowa ni eye ebua bo. Kaimɔ wiemɔi ni yɔɔ Filipibii 4:6, 7 lɛ. Jɛmɛ kɛɛ: “Nyɛkayea nyɛtsui yɛ nɔ ko nɔ ko he, shi moŋ yɛ nɔ fɛɛ nɔ mli lɛ, nyɛtsɔa sɔlemɔ, kɛ fai ni akɛ hiɛdɔɔ kpaa, kɛ shidaa nɔ nyɛhãa Nyɔŋmɔ alea nyɛnibimɔi lɛ; ni Nyɔŋmɔ toiŋjɔlɛ ni fe niiashishinumɔi fɛɛ lɛ baatsɔ Kristo Yesu nɔ abu nyɛtsuii kɛ nyɛjwɛŋmɔi ahe.”

21, 22. (a) Mɛni ji Yehowa yiŋtoo kɛhã shikpɔŋ lɛ? (b) Mɛni okpɛ oyiŋ akɛ obaafee?

21 Hemɔ be daa kɛjwɛŋ nibii kpakpai ni etsɛŋ ebaaba lɛ anɔ. Etsɛŋ, mɛi fɛɛ ni yɔɔ wala mli lɛ baajá Yehowa. (Kpojiemɔ 7:9, 14) Bo lɛ susumɔ bɔ ni jeŋ hee lɛ mli shihilɛ baafee lɛ he okwɛ. Wɔnyɛŋ wɔkɛ shihilɛ ko kwraa ato he! Abaabɛɛ Satan, edaimonioi lɛ, kɛ efɔŋfeemɔ fɛɛ kɛya. Hela mɔŋ bo, ni ogboŋ hu. Moŋ lɛ, obaate shi gbi fɛɛ gbi kɛ gbɔmɔtsoŋ hewalɛ kpakpa, ni omii baashɛ ohe akɛ oyɛ wala mli. Mɛi fɛɛ baafee ekome kɛtsu nii kɛfee shikpɔŋ lɛ paradeiso. Mɔ fɛɛ mɔ baaná niyenii kpakpa eye, kɛ he ko ni yɔɔ shweshweeshwe ehi. Mɛi yeŋ awui, moŋ lɛ, amɛmli baahi ahãhãa amɛhe. Naagbee lɛ, adesai fɛɛ ni yɔɔ shikpɔŋ lɛ nɔ lɛ baaná “Nyɔŋmɔ bii lɛ anunyam heyeli lɛ.”​—Romabii 8:21.

22 Yehowa miisumɔ ni okɛ lɛ afee o-Naanyo ni fe fɛɛ. No hewɔ lɛ, bɔɔ mɔdɛŋ fɛɛ ni ooonyɛ ni obo Yehowa toi, ni otsi obɛŋkɛ lɛ gbi fɛɛ gbi. Hɛɛ, hã wɔ fɛɛ wɔya nɔ wɔhi Nyɔŋmɔ suɔmɔ lɛ mli kɛya naanɔ!​—Yuda 21.