“Kpãi etɛ ni alo kɛfee kpãa kome lɛ, anyɛŋ atse lɛ oya.”​—JAJELƆ 4:12.

1, 2. (a) Kɛ́ mɛi bote gbalashihilɛ mli ehee lɛ, mɛni gbɛ amɛkpaa? (b) Mɛɛ sanebimɔi ahe wɔbaasusu yɛ yitso nɛɛ mli?

FEEMƆ ayemforo ko kɛ ewu ni amɛná miishɛɛ waa yɛ amɛyookpeemɔ gbi nɔ lɛ he mfoniri okwɛ. Eŋɔɔ amɛnaa waa, ni amɛkɛ otii pii ni amɛbaasumɔ ni amɛshɛ he emamɔ amɛhiɛ. Amɛgbɛkpamɔ ji akɛ amɛgbalashihilɛ lɛ sɛɛ atsɛ ni miishɛɛ ahi mli.

2 Shi gbalashihilɛi pii yɛ ni shishijee lɛ, miishɛɛ yɛ mli, shi kɛ́ eshɛ he ko lɛ, kɛkɛ lɛ, miishɛɛ lɛ fɛɛ etã. Kɛ́ gbalashihilɛ ko sɛɛ baatsɛ ni miishɛɛ ahi mli lɛ, esa akɛ nuu lɛ kɛ yoo lɛ kɛ Nyɔŋmɔ gbɛtsɔɔmɔ atsu nii. No hewɔ lɛ, hã wɔsusu sanebimɔi ni nyiɛ sɛɛ nɛɛ ahetoi ni Biblia lɛ kɛhãa lɛ ahe wɔkwɛ: Mɛɛ sɛɛnamɔi komɛi anáa yɛ gbalashihilɛ mli? Kɛ́ obaabote gbalashihilɛ mli lɛ, te obaafee tɛŋŋ oná hefatalɔ kpakpa? Mɛni baawa bo ni ofee wu loo ŋa kpakpa? Mɛni baanyɛ ahã gbalashihilɛ ko sɛɛ atsɛ?​—Kanemɔ Abɛi 3:5, 6.

ANI ESA AKƐ MIBOTE GBALASHIHILƐ MLI?

3. Kɛ́ okwɛ lɛ, ani ja mɔ ko ebote gbalashihilɛ mli dani ebaaná miishɛɛ? Tsɔɔmɔ mli.

3 Mɛi komɛi susuɔ akɛ ja mɔ ko ebote gbalashihilɛ mli dani ebaaná miishɛɛ. Shi enɛ jeee anɔkwale. Yesu  wie oshijayeli he akɛ nikeenii. (Mateo 19:11, 12) Ni bɔfo Paulo hu wie akɛ sɛɛnamɔi yɛ oshijayeli he. (1 Korintobii 7:32-38) Bo diɛŋtsɛ obaakpɛ oyiŋ kɛji obaabote gbalashihilɛ mli loo oboteŋ mli. Esaaa akɛ oboteɔ gbalashihilɛ mli yɛ bɔ ni onanemɛi loo owekumɛi nyɛɔ onɔ, loo yɛ shihilɛ ni yɔɔ he ni oyɔɔ lɛ hewɔ.

4. Mɛɛ sɛɛnamɔi komɛi yɔɔ gbalashihilɛ kpakpa he?

4 Biblia lɛ kɛɔ akɛ, gbalashihilɛ hu ji nikeenii ni jɛ Nyɔŋmɔ ŋɔɔ, ni sɛɛnamɔi komɛi yɛ he. Yehowa wie yɛ Adam, ni ji klɛŋklɛŋ nuu lɛ he akɛ: “Ehiii akɛ gbɔmɔ lɛ kome yaa nɔ ehiɔ shi. Mafee yelikɛbualɔ mahã lɛ, akɛ hefatalɔ ni sa lɛ.” (1 Mose 2:18) Yehowa bɔ Hawa koni efee Adam ŋa, ni amɛji klɛŋklɛŋ weku ni aná yɛ shikpɔŋ lɛ nɔ. Gbalashihilɛ yeɔ ebuaa wu kɛ ŋa ni yɔɔ bii lɛ koni amɛnyɛ amɛtsɔse amɛbii lɛ jogbaŋŋ. Shi jeee bii fɔmɔ pɛ hewɔ aboteɔ gbalashihilɛ mli.​—Lala 127:3; Efesobii 6:1-4.

5, 6. Mɛɛ gbɛ nɔ gbalashihilɛ ko baanyɛ atamɔ “kpãi etɛ ni alo kɛfee kpãa kome”?

5 Maŋtsɛ Solomon ŋma akɛ: “Mɛi enyɔ hi fe mɔ kome ejaakɛ amɛnáa nii ni amɛtsuɔ waa lɛ he sɛɛ jogbaŋŋ. Ejaakɛ kɛ́ amɛteŋ mɔ kome gbee shi lɛ, mɔ kroko lɛ baaye ebua enaanyo lɛ ni ete shi. Shi mɛni baaba mɔ ni gbeɔ shi ni ebɛ mɔ ko ni baaye ebua lɛ ni ete shi lɛ nɔ? . . . Ni kpãi etɛ ni alo kɛfee kpãa kome lɛ, anyɛŋ atse lɛ oya.”​—Jajelɔ 4:9-12.

6 Yɛ gbalashihilɛ kpakpa mli lɛ, wu lɛ kɛ ŋa lɛ fɛɛ naa amɛhe akɛ nanemɛi ni bɛŋkɛ amɛhe kpaakpa, ni amɛwaa amɛhe. Wu lɛ shɛjeɔ eŋa lɛ mii ni ebuɔ ehe, ni ŋa lɛ hu feɔ nakai nɔŋŋ. Eyɛ mli akɛ suɔmɔ baanyɛ ahã miishɛɛ ahi gbalashihilɛ ko mli moŋ, shi kɛ́ wu lɛ kɛ ŋa lɛ  jáa Yehowa lɛ, ebaahã amɛmiishɛɛ lɛ ada waa. Enɛ hãa amɛgbalashihilɛ lɛ feɔ tamɔ “kpãi etɛ ni alo kɛfee kpãa kome.” Kpãa ni tamɔ nakai lɛ tsemɔ wa fe kpãi enyɔ ni alo kɛfee kpãa kome. Kɛ́ amɛhã Yehowa hi amɛgbãla lɛ mli lɛ, amɛbaaná miishɛɛ waa.

7, 8. Mɛɛ ŋaa Paulo wo yɛ gbalashihilɛ he?

7 Kɛ́ nuu kɛ yoo bote gbalashihilɛ mli lɛ, amɛbaanyɛ amɛná bɔlɛ. (Abɛi 5:18) Shi kɛ́ bɔlɛnamɔ pɛ hewɔ mɔ ko taoɔ ebote gbalashihilɛ mli lɛ, ebaawa akɛ ekɛ hiɛshikamɔ baahala ehefatalɔ. No hewɔ lɛ, Biblia lɛ kɛɔ akɛ, kɛ́ mɔ ko baabote gbalashihilɛ mli lɛ, efee nakai be ni “ejeee gbekɛ dɔŋŋ,” ni tsɔɔ akɛ, be ni efo mli yɛ afii ni bɔlɛnamɔ henumɔi amli wa waa lɛ. (1 Korintobii 7:36) Ehi akɛ obaaŋmɛ otsui shi kɛyashi henumɔi nɛɛ baaba shi dani obote gbalashihilɛ mli. Enɛ baaye abua bo ni osusu nii ahe jogbaŋŋ, ni ohala hefatalɔ ni sa.​—1 Korintobii 7:9; Yakobo 1:15.

8 Kɛ́ oosusu gbalashihilɛ mlibotemɔ he lɛ, esa akɛ ohã ehi ojwɛŋmɔ mli akɛ, naagbai yɛ gbalashihilɛi fɛɛ amli. Paulo wie akɛ, mɛi ni boteɔ gbalashihilɛ mli lɛ baana “amanehulu yɛ amɛheloo mli.” (1 Korintobii 7:28) Naagbai baanyɛ aba gbalashihilɛ ni miishɛɛ yɔɔ mli fe fɛɛ lɛ po mli. No hewɔ lɛ, kɛ́ ootao obote gbalashihilɛ mli lɛ, bɔɔ mɔdɛŋ ni okɛ hiɛshikamɔ ahala ohefatalɔ.

NAMƆ MIKƐBAABOTE GBALASHIHILƐ MLI?

9, 10. Kɛ́ wɔkɛ mɔ ko ni sɔmɔɔɔ Yehowa bote gbalashihilɛ mli lɛ, mɛni baajɛ mli kɛba?

9 Naa Biblia mli shishitoo mla ko ni he hiaa waa ni baaye abua bo ni oná wu loo ŋa kpakpa: “Nyɛkɛ mɛi ni heee yeee lɛ akahia kɔɔŋtso kome shishi, ejaakɛ eŋmɛŋ  pɛpɛɛpɛ.” (2 Korintobii 6:14) Nɔkwɛmɔnɔ nɛɛ kɔɔ kooloi ni akɛtsuɔ nii yɛ ŋmɔ mli lɛ he. Okwaafoi kɛ kooloi enyɔ ni esoro amɛdaramɔ kɛ amɛhewalɛ lɛ wooo kɔɔŋtso kome shishi, ejaakɛ ebaahã kooloi enyɔ lɛ fɛɛ apiŋ, ni no baatsɔɔ akɛ amɛsusuuu kooloi lɛ ahe. Nakai nɔŋŋ kɛ́ mɔ ko ni jáa Yehowa kɛ mɔ ko ni jáaa lɛ lɛ bote gbalashihilɛ mli lɛ, ebaanyɛ ekɛ naagbai pii aba. Enɛ hewɔ lɛ, Biblia lɛ woɔ wɔ ŋaa akɛ wɔbote gbalashihilɛ mli “yɛ Nuŋtsɔ lɛ mli pɛ.”​—1 Korintobii 7:39.

10 Bei komɛi lɛ, Kristofoi komɛi nuɔ he akɛ, ehi akɛ amɛkɛ mɔ ko ni sɔmɔɔɔ Yehowa baabote gbalashihilɛ mli fe nɔ ni amɛbaahi shi oshija. Shi kɛ́ wɔkɛ Biblia mli ŋaawoo tsuuu nii lɛ, bei pii lɛ, wɔkɛ naagbai kpeɔ, ni wɔmiishɛɛ tãa. Nɔ ni he hiaa Yehowa webii fe fɛɛ ji, ni amɛbaasɔmɔ Yehowa. No hewɔ lɛ, kɛ́ onyɛɛɛ okɛ ohefatalɔ lɛ afee ekome kɛsɔmɔ Yehowa lɛ, te obaanu he ohã tɛŋŋ? Mɛi pii ekpɛ amɛyiŋ akɛ amɛbaahi shi oshija, moŋ fe nɔ ni amɛkɛ mɔ ko ni jáaa Yehowa, ni esumɔɔɔ lɛ hu lɛ baabote gbalashihilɛ mli.​—Kanemɔ Lala 32:8.

11. Te obaafee tɛŋŋ ohala gbalashihilɛ mli hefatalɔ ni sa lɛ?

11 Shi enɛ etsɔɔɔ akɛ obaanyɛ okɛ mɔ fɛɛ mɔ kɛkɛ ni sɔmɔɔ Yehowa lɛ abote gbalashihilɛ mli. Kɛ́ obaasumɔ ni obote gbalashihilɛ mli lɛ, taomɔ mɔ ko ni osumɔɔ esane waa, ni onuɔ lɛ shishi ni lɛ hu enuɔ bo shishi. Too otsui shi kɛyashi obaaná mɔ ko ni kɛ Nyɔŋmɔ sɔɔmɔ yeɔ klɛŋklɛŋ gbɛhe yɛ eshihilɛ mli, ní miisumɔ ni efee nibii ni bo hu osumɔɔ ni ofee lɛ. Hemɔ be kɛkane woji kɛ nibii ni kɔɔ gbalashihilɛ he ni nyɔŋ anɔkwafo lɛ efee lɛ, ni ojwɛŋ nɔ, koni no awa bo.​—Kanemɔ Lala 119:105.

12. Kɛ́ fɔlɔi baasumɔ ni amɛhala gbalashihilɛ mli hefatalɔ amɛhã amɛbi ko lɛ, mɛɛ gbɛ nɔ Biblia lɛ baanyɛ aye abua amɛ?

 12 Yɛ maji komɛi anɔ lɛ, fɔlɔi ji mɛi ni halaa gbalashihilɛ mli hefatalɔi amɛhãa amɛbii. Mɛi ni yɔɔ maji nɛɛ anɔ lɛ nuɔ he akɛ, fɔlɔi lɛ ji mɛi ni baale mɔ ni sa kɛhã amɛbi lɛ. Mɛi ni hi shi yɛ blema lɛ hu fee nɔ ko ni tamɔ nakai. No hewɔ lɛ, kɛ́ ofɔlɔi lɛ hu miisumɔ ni amɛfee nakai lɛ, Biblia lɛ baanyɛ aye abua amɛ ni amɛna sui ni esa akɛ amɛtao yɛ mɔ lɛ he. Akɛ nɔkwɛmɔnɔ lɛ, be ni Abraham taoɔ ŋa ehã ebinuu Isak lɛ, etao mɔ ko ni sumɔɔ Yehowa, jeee mɔ ko ni yɔɔ shika loo mɔ ko ni ehe gbɛ́i.​—1 Mose 24:3, 67; kwɛmɔ Wiemɔi Komɛi Amligbalamɔ 25.

 TE MAFEE TƐŊŊ MASAA MIHE KƐHÃ GBALASHIHILƐ?

13-15. (a) Mɛni nuu ko baanyɛ afee kɛsaa ehe koni etsɔ wu kpakpa? (b) Mɛni yoo ko baanyɛ afee kɛsaa ehe koni etsɔ ŋa kpakpa?

13 Kɛ́ oosusu gbalamlibotemɔ he lɛ, bi ohe akɛ, ‘Ani mishɛ gbãla?’ Ekolɛ obaasusu akɛ oshɛ, shi hã wɔsusu nɔ ni atsɔɔ kɛji akɛɛ mɔ ko eshɛ gbãla lɛ he. Ekolɛ hetoo lɛ baahã onaa akpɛ ohe.

Hemɔ be kɛkane ŋaawoo ni yɔɔ Nyɔŋmɔ Wiemɔ lɛ mli ni kɔɔ gbalashihilɛ he lɛ, ni ojwɛŋ nɔ

14 Biblia lɛ hãa wɔleɔ akɛ, esoro nitsumɔ ni akɛwo wumɛi adɛŋ yɛ weku lɛ mli, ni esoro ŋamɛi hu anɔ. No hewɔ lɛ ekã shi faŋŋ akɛ, nɔ ni baatsɔɔ akɛ nuu ko eshɛ mɔ ni boteɔ gbalashihilɛ mli lɛ baafee srɔto yɛ yoo nɔ he. Kɛ́ nuu ko miisusu gbalamlibotemɔ he lɛ, esa akɛ ebi ehe akɛ, ‘Ani manyɛ makwɛ weku nɔ akɛ weku yitso?’ Yehowa miikpa gbɛ akɛ wu lɛ baahã eŋa kɛ ebii lɛ amɛheloŋ kɛ henumɔŋ hiamɔ nii. Nɔ ni fe fɛɛ lɛ, ehe miihia ni wu lɛ anyiɛ weku lɛ hiɛ kɛjá Nyɔŋmɔ. Biblia lɛ kɛɔ yɛ nuu ni kwɛɛɛ eweku lɛ he akɛ, “eji gbɔmɔ gbonyo fe mɔ ni bɛ hemɔkɛyeli.” (1 Timoteo 5:8) No hewɔ lɛ, kɛ́ nuu ji bo ni oosusu gbalamlibotemɔ he lɛ, susumɔ bɔ ni obaanyɛ okɛ Biblia mli shishitoo mla ni nyiɛ sɛɛ nɛɛ atsu nii ahã lɛ he: “Too onitsumɔ he gbɛjianɔ yɛ agbó naa, ni osaa nibii fɛɛ oto yɛ ŋmɔ lɛ mli; no sɛɛ lɛ, tswaa oshĩa lɛ oma shi.” Ni tsɔɔ akɛ, dani obaabote gbalashihilɛ mli lɛ, esa akɛ okwɛ kɛji obaanyɛ otsu sɔ̃i ni Yehowa kpaa gbɛ yɛ wumɛi adɛŋ lɛ ahe nii.​—Abɛi 24:27.

15 Ehe miihia ni yoo ni miisusu gbalamlibotemɔ he lɛ abi ehe akɛ, ‘Ani manyɛ matsu sɔ̃i ni akpaa gbɛ yɛ ŋamɛi adɛŋ lɛ ahe nii? Ni kɛ́ mafɔ lɛ, ani manyɛ matsu sɔ̃ akɛ mami lɛ he nii?’ Nibii pii yɛ ni ŋa kpakpa baanyɛ afee kɛkwɛ ewu kɛ ebii, ni Biblia lɛ tsĩɔ ekomɛi atã.  (Abɛi 31:10-31) Ŋmɛnɛ lɛ, nɔ pɛ ni hii kɛ yei pii susuɔ he ji, nɔ ni amɛgbalashihilɛ mli hefatalɔi lɛ baafee ahã amɛ. Shi Yehowa miisumɔ ni wɔsusu nɔ ni wɔ wɔbaafee wɔhã wɔhefatalɔi lɛ he.

16, 17. Kɛ́ oosusu gbalamlibotemɔ he lɛ, mɛni esa akɛ ojwɛŋ nɔ?

16 Dani obaabote gbalashihilɛ mli lɛ, hemɔ be kɛjwɛŋ nɔ ni Yehowa wieɔ yɛ wumɛi kɛ ŋamɛi ahe lɛ nɔ. Kɛ́ nuu ko ji weku yitso lɛ, no etsɔɔɔ akɛ ebaanyɛ eyi eŋa kɛ ebii loo eye amɛnɔ dɛŋdɛŋ. Wekuyitso kpakpa lɛ kaseɔ Yesu. Yesu kɛ mɛi ni ekwɛɔ amɛnɔ lɛ yeɔ yɛ suɔmɔ kɛ mlihilɛ mli be fɛɛ be. (Efesobii 5:23) Esa akɛ yoo hu akwɛ kɛji ebaanyɛ ekɛ ewu afee ekome, ni efi eyiŋkpɛi asɛɛ. (Romabii 7:2) Ehe miihia ni ebi ehe akɛ, ‘Ani maná he miishɛɛ akɛ maba mihe shi mawo nuu ko ni yeee emuu lɛ shishi?’ Kɛ́ ekwɛ ni enyɛŋ efee nakai lɛ, no lɛ, ebaanyɛ ekpɛ eyiŋ akɛ eboteŋ gbalashihilɛ mli dã.

17 Ehe miihia ni wumɛi asusu nɔ ni baahã amɛŋamɛi aná miishɛɛ lɛ he klɛŋklɛŋ, dani amɛsusu nɔ ni amɛ diɛŋtsɛ amɛsumɔɔ lɛ he, ni esa akɛ ŋamɛi hu afee nakai nɔŋŋ. (Kanemɔ Filipibii 2:4.) Paulo ŋma akɛ: “Esa akɛ nyɛteŋ mɔ fɛɛ mɔ asumɔ eŋa tamɔ lɛ diɛŋtsɛ ehe; ni esa akɛ ŋa lɛ aná bulɛ ni mli kwɔ ehã ewu.” (Efesobii 5:21-33) Eyɛ mli akɛ, ehe miihia ni mɔ fɛɛ mɔ anu he akɛ asumɔɔ lɛ ni abuɔ lɛ moŋ, shi kɛ́ gbalashihilɛ ko baaye omanye lɛ, no lɛ, nuu lɛ ji mɔ titri ni esa akɛ enu he akɛ ehefatalɔ lɛ buɔ lɛ waa, ni yoo lɛ ji mɔ titri ni esa akɛ enu he akɛ ehefatalɔ lɛ sumɔɔ lɛ waa.

18. Mɛni hewɔ esa akɛ nuu kɛ yoo ni miinyiɛ kɛhã gbalashihilɛ lɛ akwɛ amɛhe nɔ jogbaŋŋ lɛ?

18 Nyiɛmɔ ni tsɔɔ gbalashihilɛ hiɛ lɛ ji miishɛɛ be ní mɛi enyɔ ni miitao amɛbote gbalashihilɛ mli lɛ kɛleɔ  amɛhe jogbaŋŋ. Esaaa akɛ amɛkɛ nɔ ko teɔ amɛhe yɛ nɛkɛ be nɛɛ mli, ejaakɛ no baawa amɛ ni amɛkpɛ amɛyiŋ kɛji amɛmiisumɔ ni amɛbote gbalashihilɛ mli lɛɛlɛŋ. Kɛ́ nuu ko kɛ yoo ko miinyiɛ kɛhã gbalashihilɛ lɛ, amɛkaseɔ bɔ ni amɛkɛ amɛhe baagba sane amɛhã, ni no hãa amɛteŋ mɔ fɛɛ mɔ leɔ nɔ ni yɔɔ enaanyo tsui mli. Be ni amɛnaanyobɔɔ lɛ mli waa lɛ, ŋwanejee ko bɛ he akɛ, amɛbaasumɔ amɛhe waa. Shi esa akɛ amɛkwɛ jogbaŋŋ yɛ nibii ni amɛbaafee kɛtsɔɔ akɛ amɛsumɔɔ amɛhe lɛ ahe, koni amɛkafee nɔ ko ni mɛi ni ebote gbalashihilɛ mli pɛ feɔ. Kɛ́ amɛsumɔɔ amɛhe waa  lɛɛlɛŋ lɛ, no lɛ, amɛbaabɔ mɔdɛŋ amɛye amɛhe nɔ ní amɛkafee nɔ ko ni baafite wekukpaa ni yɔɔ amɛteŋ kɛ wekukpaa ni yɔɔ amɛ kɛ Yehowa teŋ lɛ.​—1 Tesalonikabii 4:6.

Nuu kɛ yoo ni miinyiɛ kɛhã gbalashihilɛ lɛ baanyɛ akase bɔ ni amɛkɛ amɛhe baagba sane amɛhã

TE MAFEE TƐŊŊ MAHÃ MIGBALASHIHILƐ LƐ SƐƐ ATSƐ LƐ?

19, 20. Te Kristofoi naa gbalashihilɛ amɛhãa tɛŋŋ?

19 Akɛ yookpeemɔ gbidii ni yɔɔ miishɛɛ muɔ woji kɛ sinii pii anaa. Shi yɛ anɔkwale mli lɛ, yookpeemɔ lɛ ji gbalashihilɛ lɛ shishijee kɛkɛ. Yehowa to akɛ gbalashihilɛ ahi shi daa.​—1 Mose 2:24.

20 Ŋmɛnɛ lɛ, mɛi pii enaaa gbalashihilɛ akɛ nɔ ko ni hiɔ shi daa. Amɛboteɔ gbalashihilɛ mli ni amɛtseɔ gbãla mli tamɔ anuɔ nu lɛ. Mɛi komɛi hu nuɔ he akɛ, kɛ́ amɛkɛ naagbai bɔi kpee nɔŋŋ lɛ, belɛ esa akɛ amɛshi amɛhefatalɔ lɛ, ní amɛtse gbãla lɛ. Shi kaimɔ Biblia mli nɔkwɛmɔnɔ ni kɔɔ kpãi etɛ ni alo kɛfee kpãa kome lɛ he lɛ. Ekɔɔɔ he eko nɔ ni baaba lɛ, kpãa lɛ tseŋ kɔkɔɔkɔ. Kɛ́ wɔkwɛ Yehowa gbɛ kɛhã yelikɛbuamɔ lɛ, wɔgbalashihilɛ lɛ baanyɛ ahi shi daa. Yesu wie akɛ: “Nɔ ni Nyɔŋmɔ kɛtsa lɛ, gbɔmɔ ko akagbála mli.”​—Mateo 19:6.

21. Mɛni baaye abua wu kɛ ŋa ni amɛsumɔ amɛhe?

21 Wɔ fɛɛ wɔyɛ hei ni wɔbɔɔ mɔdɛŋ yɛ kɛ hei ni wɔgbeɔ shi yɛ. Ewaaa akɛ wɔkɛ wɔjwɛŋmɔ baama mɛi krokomɛi afatɔi anɔ, titri lɛ, wɔgbalashihilɛ mli hefatalɔi. Shi kɛ́ wɔfee nakai lɛ, wɔnáŋ miishɛɛ. Nɔ najiaŋ ni wɔbaafee nakai lɛ, esa akɛ wɔkɛ wɔjwɛŋmɔ ama wɔhefatalɔ lɛ sui kpakpai lɛ anɔ, ni no baahã wɔná miishɛɛ yɛ wɔgbalashihilɛ lɛ mli. Ani wɔbaanyɛ wɔkɛ wɔjwɛŋmɔ ama wɔhefatalɔ ni yeee emuu lɛ sui kpakpai  lɛ anɔ? Hɛɛ wɔbaanyɛ! Yehowa le akɛ wɔyeee emuu, kɛ̃lɛ, ekɛ ejwɛŋmɔ maa wɔsui kpakpai lɛ anɔ. Eji efeee nakai kulɛ, te wɔshihilɛ baafee tɛŋŋ? Lalatsɛ lɛ wie akɛ: “Ao Yah, eji okwɛɔ tɔmɔi kulɛ, Ao Yehowa, namɔ baanyɛ shi adamɔ?” (Lala 130:3) Esa akɛ wumɛi kɛ ŋamɛi akase Yehowa ni amɛ hu amɛkɛ amɛjwɛŋmɔ ama amɛhefatalɔi lɛ asui kpakpai lɛ anɔ, ni agbɛnɛ hu, amɛkɛ eshai ake oya.​—Kanemɔ Kolosebii 3:13.

22, 23. Mɛɛ nɔkwɛmɔnɔ kpakpa Abraham kɛ Sara fee amɛhã gbalashihilɛ mli hefatalɔi?

 22 Be ni afii lɛ hoɔ kɛyaa lɛ, suɔmɔ ni yɔɔ gbalashihilɛ mli bii ateŋ lɛ mli baanyɛ awa waa. Abraham kɛ Sara hi shi afii pii, ni amɛná miishɛɛ yɛ amɛgbalashihilɛ lɛ mli. Be ni Yehowa kɛɛ Abraham ní eshi amɛshĩa ni yɔɔ Ur maŋ lɛ mli lɛ, no mli lɛ eeenyɛ efee akɛ, Sara eye fe afii 60. Ŋwanejee ko bɛ he akɛ, enáaa lɛ mlɛo kwraa akɛ ebaashi amɛshĩa kpakpa lɛ mli ni eyahi mama tsũi amli. Shi Sara ji hefatalɔ kɛ naanyo kpakpa kɛhã Abraham, ni ebuɔ lɛ waa diɛŋtsɛ. No hewɔ lɛ, efi yiŋ srɔtoi ni Abraham kpɛ lɛ asɛɛ, ni eye ebua Abraham koni eyiŋkpɛi lɛ aye omanye.​—1 Mose 18:12; 1 Petro 3:6.

23 Shi enɛ etsɔɔɔ akɛ be fɛɛ be lɛ, gbalashihilɛ mli bii ni sumɔɔ amɛhe waa lɛ kɛ amɛhe baakpã gbee yɛ nɔ fɛɛ nɔ he. Be ko lɛ, Abraham kɛ Sara eyakpãaa gbee yɛ sane ko he, shi Yehowa kɛɛ Abraham akɛ: “Bo lɛ toi.” Abraham fee nakai, ni ewo yibii kpakpai. (1 Mose 21:9-13) Kɛ́ okɛ ohefatalɔ lɛ kpãaa gbee yɛ sane ko he lɛ, kaahã onijiaŋ je wui. Nɔ ni he hiaa ji, ni nyɛbaajie suɔmɔ kɛ bulɛ kpo nyɛtsɔɔ nyɛhe, kɛ́ nyɛkɛ nyɛhe kpãaa gbee po.

Nyɛhãa Nyɔŋmɔ Wiemɔ lɛ atsɔa nyɛ gbɛ yɛ nyɛgbalashihilɛ lɛ mli, kɛjɛ yookpeemɔ gbi lɛ nɔ

24. Mɛɛ gbɛ nɔ wɔgbalashihilɛ lɛ baanyɛ awo Yehowa hiɛ nyam?

24 Gbalashihilɛ mli bii akpei abɔ yɛ Kristofoi asafo lɛ mli ni yɛ miishɛɛ. Kɛ́ obaasumɔ ni obote gbalashihilɛ mli lɛ, kaimɔ akɛ, yiŋ srɔtoi ni he hiaa waa ni obaakpɛ yɛ shihilɛ mli lɛ ateŋ ekome ji, ni obaahala hefatalɔ. Yiŋkpɛɛ nɛɛ baasa oshihilɛ he owala gbii abɔ ni eshwɛ lɛ fɛɛ, no hewɔ lɛ, hã Yehowa aye abua bo. No baahã onyɛ okɛ hiɛshikamɔ ahala ohefatalɔ lɛ, osaa ohe jogbaŋŋ kɛhã gbalashihilɛ lɛ, ni ofee nibii ni baahã suɔmɔ ahi ogbalashihilɛ lɛ mli kɛwo Yehowa hiɛ nyam.