Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 5

Nyɔŋmɔ Nanemɛi Baahi Shi Yɛ Paradeiso

Nyɔŋmɔ Nanemɛi Baahi Shi Yɛ Paradeiso

Paradeiso efeŋ tamɔ jeŋ ni wɔyɔɔ mli amrɔ nɛɛ. Kɛjɛ jeeŋmɔ beebe lɛ Nyɔŋmɔ sumɔɔɔ ni shikpɔŋ nɔ ayi obɔ kɛ naagba kɛ awerɛho, piŋmɔ kɛ amanehulu. Nyɔŋmɔ baafee shikpɔŋ lɛ paradeiso yɛ wɔsɛɛ be mli. Te Paradeiso baatamɔ aha tɛŋŋ? Nyɛhaa wɔkwɛa nɔ ni Biblia lɛ kɛɔ:

Gbɔmɛi kpakpai. Paradeiso baafee Nyɔŋmɔ nanemɛi lɛ ashia. Amɛbaafee nibii kpakpai amɛha amɛhe. Amɛbaahi shi yɛ Nyɔŋmɔ jalɛ gbɛ̀i lɛ kɛ gbeekpamɔ naa.—Abɛi 2:21.

Niyenii babaoo. Hɔmɔ yeŋ mɔ ko dɔŋŋ yɛ Paradeiso. Biblia lɛ kɛɔ akɛ: “Shikpɔŋ lɛ nɔ aaaba abele [aloo, niyenii] babaoo.”—Lala 72:16.

Shiai fɛfɛji kɛ nitsumɔ ni ŋɔɔ. Weku fɛɛ weku baaná lɛ diɛŋtsɛ eshia yɛ Paradeiso shikpɔŋ lɛ nɔ. Mɔ fɛɛ mɔ baatsu nitsumɔ ni kɛ miishɛɛ diɛŋtsɛ baa.—Yesaia 65:21-23.

 Jeŋ fɛɛ toiŋjɔlɛ. Gbɔmɛi wuŋ ta dɔŋŋ ni amɛgboiŋ yɛ tawuu mli. Nyɔŋmɔ Wiemɔ lɛ kɛɔ akɛ: “[Nyɔŋmɔ] haa tai asɛɛ foɔ kɛyaa shikpɔŋ lɛ naagbeehei lɛ.”—Lala 46:9, 10.

Gbɔmɔtsoŋ hewalɛ kpakpa. Biblia lɛ woɔ shi akɛ: “Maŋbii [ni yɔɔ Paradeiso] lɛ ateŋ mɔ ko ekɛɛŋ akɛ: Migbɔjɔ!” (Yesaia 33:24) Agbɛnɛ hu, obubuafo loo shwilafo loo toimulɔ loo mumui ko ehiŋ jɛmɛ.—Yesaia 35:5, 6.

Piŋmɔ, awerɛho, kɛ gbele naagbee. Nyɔŋmɔ Wiemɔ lɛ kɛɔ akɛ: “Gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:4.

Gbɔmɛi fɔji ehiŋ shi dɔŋŋ. Yehowa woɔ shi akɛ: “Aaafolɔ mɛi fɔji lɛ kɛaajɛ shikpɔŋ lɛ nɔ, ni aaafamɔ kutumpɔfoi lɛ kɛaajɛ nɔ.”—Abɛi 2:22.

Gbɔmɛi baasumɔ amɛhe ni amɛkɛ bulɛ baaha amɛhe. Jalɛ sane ni ayeee, nɔnyɛɛ, hiɛjoomɔ, kɛ hetsɛ̃ sɛɛ baafo. Gbɔmɛi baafee ekome ni amɛbaahi shi yɛ Nyɔŋmɔ jalɛ gbɛ̀i lɛ kɛ gbeekpamɔ naa.—Yesaia 26:9.