Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 10

Bɔ Ni Ooofee Ona Anɔkwa Jamɔ Lɛ

Bɔ Ni Ooofee Ona Anɔkwa Jamɔ Lɛ

Kɛ́ oosumɔ ni otsɔ Nyɔŋmɔ naanyo lɛ, belɛ esa akɛ otsu jamɔ ni Nyɔŋmɔ kpɛlɛɔ nɔ lɛ he nii. Yesu kɛɛ akɛ “anɔkwa jálɔi” baajá Nyɔŋmɔ yɛ “anɔkwale” lɛ kɛ gbeekpamɔ naa. (Yohane 4:23, 24) Gbɛ kome pɛ yɔɔ ni ja ni atsɔɔ nɔ ajáa Nyɔŋmɔ. (Efesobii 4:4-6) Anɔkwa jamɔ kɛ mɔ yaa naanɔ wala mli, ni apasa jamɔ kɛ mɔ yaa hiɛkpatamɔ mli.—Mateo 7:13, 14.

Obaanyɛ oyoo anɔkwa jamɔ kɛtsɔ gbɔmɛi ni kɛtsuɔ nii lɛ akwɛmɔ nɔ. Akɛni Yehowa hi hewɔ lɛ, esa akɛ mɛi ni ji enɔkwa jálɔi lɛ afee gbɔmɛi ni hi. Bɔ ni akutu tso kpakpa woɔ akutui kpakpai lɛ, nakai anɔkwa jamɔ feɔ gbɔmɛi kpakpai.—Mateo 7:15-20.

Yehowa nanemɛi lɛ yɛ bulɛ ni mli kwɔ kɛha Biblia lɛ. Amɛle akɛ Biblia lɛ jɛ Nyɔŋmɔ ŋɔɔ. Amɛŋmɛɔ gbɛ koni nɔ ni ekɛɔ lɛ akudɔ amɛshihilɛ, etsu amɛnaagbai lɛ ahe nii, ni eye ebua amɛ ni amɛkase Nyɔŋmɔ he nii. (2 Timoteo 3:16) Amɛbɔɔ mɔdɛŋ ni amɛhi shi yɛ nɔ ni amɛshiɛɔ lɛ naa.

 Yehowa nanemɛi jieɔ suɔmɔ kpo amɛtsɔɔ amɛhe. Yesu jie suɔmɔ kpo etsɔɔ gbɔmɛi kɛtsɔ Nyɔŋmɔ he nii ni etsɔɔ amɛ, kɛ kɛtsɔ mɛi ni he yeɔ lɛ ni etsa amɛ lɛ nɔ. Mɛi ni diɔ anɔkwa jamɔ sɛɛ lɛ jieɔ suɔmɔ kpo amɛtsɔɔ mɛi krokomɛi hu. Taakɛ Yesu ji lɛ, amɛgbeee ohiafoi aloo mɛi ni jɛ weku kroko mli lɛ ahe guɔ. Yesu kɛɛ akɛ gbɔmɛi baale ekaselɔi lɛ kɛtsɔ suɔmɔ ni amɛjieɔ lɛ kpo amɛtsɔɔ amɛhe lɛ nɔ.—Yohane 13:35.

Nyɔŋmɔ nanemɛi kɛ woo haa Nyɔŋmɔ gbɛi ni ji, Yehowa. Kɛji akɛ mɔ ko kpoo akɛ eeetsɛ ogbɛi lɛ, ani nakai mɔ lɛ baanyɛ afee onaanyo ni bɛŋkɛ bo kpaakpa? Dabi! Kɛ wɔyɛ naanyo lɛ, wɔkɛ egbɛi tsɛɔ lɛ, ni wɔwieɔ nakai naanyo lɛ he saji kpakpai wɔtsɔɔ mɛi krokomɛi. No hewɔ lɛ, esa akɛ mɛi ni sumɔɔ ni amɛtsɔmɔ Nyɔŋmɔ naanyo lɛ kɛ egbɛi lɛ atsu nii ni amɛwie ehe amɛtsɔɔ mɛi krokomɛi. Yehowa miisumɔ ni wɔfee nakai.—Mateo 6:9; Romabii 10:13, 14.

Taakɛ Yesu ji lɛ, Nyɔŋmɔ nanemɛi lɛ tsɔɔ gbɔmɛi lɛ Nyɔŋmɔ Maŋtsɛyeli lɛ he nibii. Nyɔŋmɔ Maŋtsɛyeli lɛ ji ŋwɛi nɔyeli ni baafee shikpɔŋ lɛ paradeiso lɛ. Nyɔŋmɔ nanemɛi lɛ gbaa Nyɔŋmɔ Maŋtsɛyeli lɛ he sanekpakpa nɛɛ amɛtsɔɔ mɛi krokomɛi.—Mateo 24:14.

Yehowa Odasefoi bɔɔ mɔdɛŋ ni amɛtsɔmɔ Nyɔŋmɔ nanemɛi. Amɛyɛ bulɛ kɛha Biblia lɛ, ni suɔmɔ yɛ amɛteŋ. Amɛkɛ Nyɔŋmɔ gbɛi lɛ hu tsuɔ nii ni amɛkɛ woo haa no, ni amɛtsɔɔ mɛi krokomɛi Nyɔŋmɔ Maŋtsɛyeli lɛ he saji. Yehowa Odasefoi kɛ anɔkwa jamɔ tsuɔ nii yɛ shikpɔŋ nɔ ŋmɛnɛ.