Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Te Onaa Biblia Lɛ Ohãa Tɛŋŋ?

Te Onaa Biblia Lɛ Ohãa Tɛŋŋ?

Ani obaakɛɛ eji . . .

  • wolo ni gbɔmɛi anilee yɔɔ mli?

  • wolo ni adesãi kɛ blema saji yɔɔ mli?

  • Nyɔŋmɔ Wiemɔ?

 NƆ NI BIBLIA LƐ KƐƆ

“Ŋmalɛ muu lɛ fɛɛ jɛ Nyɔŋmɔ mumɔ lɛŋ.”​—2 Timoteo 3:16, Jeŋ Hee Shishitsɔɔmɔ.

BƆ NI OBAANYƐ ONÁ HE SƐƐ

Hetoi ni hãa mɔ tsui nyɔɔ emli kɛhã shihilɛ mli sanebimɔi ni he hiaa waa.​—Abɛi 2:1-5.

Gbɛtsɔɔmɔ ni amuɔ afɔ̃ɔ nɔ ni kɔɔ wɔdaa gbi shihilɛ he.​—Lala 119:105.

Hiɛnɔkamɔ diɛŋtsɛ kɛhã wɔsɛɛ.​—Romabii 15:4.

 ANI WƆBAANYƐ WƆHE NƆ NI BIBLIA LƐ KƐƆ LƐ WƆYE LƐƐLƐŊ?

Hɛɛ, kɛ́ hooo lɛ yɛ yiŋtoi etɛ ahewɔ:

  • Bɔ ni ekɛ ehe kpãa gbee lɛ yɛ naakpɛɛ. Mɛi srɔtoi aaafee 40 kɛ nɔ ni fe afii 1,600 ŋma Biblia lɛ. Amɛteŋ mɛi babaoo kɛ amɛhe ekpeee. Fɛɛ sɛɛ lɛ, Biblia muu lɛ fɛɛ kɛ ehe kpãa gbee, ni ewieɔ sane oti kome he!

  • Yinɔsane ni ja. Bei pii lɛ, je lɛŋ yinɔsaneŋmalɔi tsimɔɔ amɛmaji anɔ kunim ni aye lɛ anɔ. Nɔ ni tamɔɔɔ nakai lɛ, mɛi ni ŋma Biblia lɛ jɛ anɔkwayeli mli amɛŋmala amɛ diɛŋtsɛ amɛtɔmɔi kɛ amɛmaji lɛ ashigbeemɔi amɛshwie shi.​—2 Kronika 36:15, 16; Lala 51:1-4.

  • Gbalɛ ni anyɛɔ akɛ he fɔ̃ɔ nɔ. Biblia lɛ gba blema Babilon maŋtiase lɛ hiɛkpatamɔ lɛ he sane efɔ̃ shi nɔ ni fe afii 200 dani eba mli. (Yesaia 13:17-22) Jeee gbɛ ni abaatsɔ nɔ akpãtã Babilon hiɛ lɛ pɛ etsɔɔ, shi etsɔɔ mɔ ni baakpãtã ehiɛ lɛ po gbɛ́i!​—Yesaia 45:1-3.

    Biblia mli gbalɛi krokomɛi babaoo hu ba mli fitsofitso. Shi ani jeee enɛ ji nɔ ni wɔkpaa gbɛ yɛ Nyɔŋmɔ Wiemɔ lɛ he?​—2 Petro 1:21.

 KƐHÃ HESUSUMƆ

Mɛɛ gbɛ nɔ Nyɔŋmɔ Wiemɔ lɛ baanyɛ ahã oshihilɛ ahi?

Biblia lɛ hãa nakai sanebimɔ lɛ hetoo yɛ YESAIA 48:17, 182 TIMOTEO 3:16, 17.