ANƆKWALE ni kɔɔ mɛni he? Anɔkwale ni kɔɔ sanebimɔi komɛi ni he hiaa waa ni adesai biɔ lɛ ahe. Ekolɛ osusu sanebimɔi ni nyiɛ sɛɛ nɛɛ ekomɛi ahe pɛŋ:

  • Ani Nyɔŋmɔ susuɔ wɔhe lɛɛlɛŋ?

  • Ani ta kɛ amanehulu sɛɛ baafo be ko?

  • Mɛni baa wɔnɔ kɛ́ wɔgboi?

  • Ani hiɛnɔkamɔ ko yɛ kɛhã mɛi ni egboi lɛ?

  • Mɛɛ gbɛ nɔ matsɔ masɔle ni Nyɔŋmɔ abo mi toi?

  • Te mafee tɛŋŋ maná miishɛɛ yɛ shihilɛ mli?

Nɛgbɛ obaaná sanebimɔi nɛɛ ahetoo yɛ? Kɛ́ otee wojiatoohei loo hei ni ahɔ̃ɔ woji yɛ lɛ, ekolɛ obaana woji babaoo ni atsɔɔ akɛ amɛhãa sanebimɔi nɛɛ ahetoo. Shi bei pii lɛ, nibii ni aŋmala yɛ wolo ko mli lɛ teɔ shi woɔ nɔ ni aŋma yɛ ekroko mli. Woji lɛ ekomɛi hu feɔ tamɔ ehi yɛ be ni aŋma lɛ mli, shi eyeee be ko ni ebe hoɔ, kɛkɛ lɛ atsake hiɛ loo akɛ ekroko eye najiaŋ.

Shi wolo ko yɛ ni abaanyɛ akɛ he afɔ̃ hetoi ni yɔɔ mli lɛ anɔ. Eji wolo ni saji ni yɔɔ mli lɛ fɛɛ ja. Yesu Kristo kɛɛ Nyɔŋmɔ yɛ sɔlemɔ mli akɛ: “Owiemɔ lɛ anɔkwale ni.” (Yohane 17:17) Ŋmɛnɛ lɛ, wɔle nakai Wiemɔ lɛ akɛ Ŋmalɛ Krɔŋkrɔŋ lɛ. Obaana sanebimɔi ni abi kɛtsɔ hiɛ lɛ ahetoi ni ja ni mli kã shi faŋŋ ni Biblia lɛ kɛhã lɛ yɛ baafai ni nyiɛ sɛɛ nɛɛ amli.

 Ani Nyɔŋmɔ Susuɔ Wɔhe Lɛɛlɛŋ?

NƆ HEWƆ NI ABIƆ SANE NƐƐ: Wɔyɛ jeŋ ko ni awuiyeli kɛ jalɛsane ni ayeee eyi mli obɔ mli. Jamɔi babaoo tsɔɔ akɛ amanehulu ni baa wɔnɔ lɛ ji Nyɔŋmɔ suɔmɔnaa nii.

NƆ NI BIBLIA LƐ TSƆƆ: Nyɔŋmɔ kɛ efɔŋ baaa mɔ ko nɔ kɔkɔɔkɔ. Hiob 34:10 lɛ kɛɔ akɛ: “Ebaŋ lɛ kɔkɔɔkɔ akɛ anɔkwa Nyɔŋmɔ lɛ baafee nɔ fɔŋ, aloo akɛ, Ofe lɛ baafee nɔ ni ejaaa!” Nyɔŋmɔ yɛ yiŋtoo ni suɔmɔ yɔɔ mli kɛhã adesai. Enɛ hewɔ ni Yesu tsɔɔ wɔ ni wɔsɔle akɛ: “Wɔ-Tsɛ ni yɔɔ ŋwɛi, . . . o-Maŋtsɛyeli lɛ aba. Afee nɔ ni osumɔɔ yɛ shikpɔŋ lɛ nɔ, tamɔ bɔ ni afeɔ yɛ ŋwɛi lɛ.” (Mateo 6:9, 10) Nyɔŋmɔ sumɔɔ wɔsane aahu akɛ, efee nɔ fɛɛ nɔ ni esa akɛ efee koni ehã eyiŋtoo lɛ aba mli.​—Yohane 3:16.

Kwɛmɔ ŋmalɛi nɛɛ hu: 1 Mose 1:26-28; Yakobo 1:13; kɛ 1 Petro 5:6, 7.

Ani Ta Kɛ Amanehulu Sɛɛ Baafo Be Ko?

NƆ HEWƆ NI ABIƆ SANE NƐƐ: Ta kã he eekpãtã adesai babaoo ahiɛ. Amanehulu ni baa adesai anɔ lɛ saa wɔteŋ mɔ fɛɛ mɔ he.

NƆ NI BIBLIA LƐ TSƆƆ: Nyɔŋmɔ egba akɛ be ko baaba ni ebaahã toiŋjɔlɛ ahi shikpɔŋ lɛ fɛɛ nɔ. Yɛ e-Maŋtsɛyeli ni ji ŋwɛi nɔyeli lɛ shishi lɛ, mɛi ‘ekaseŋ tawuu dɔŋŋ.’ Yɛ no najiaŋ lɛ, “amɛbaatswia amɛtawuu klantei kɛfee tsina kɔii anaa dadei.” (Yesaia 2:4) Nyɔŋmɔ baahã jalɛsane ni ayeee kɛ amanehulu fɛɛ sɛɛ afo. Biblia lɛ kɛ shiwoo nɛɛ hãa akɛ: “[Nyɔŋmɔ baatsumɔ] amɛhiŋmɛiiaŋ yaafonui fɛɛ, ni gbele bɛ dɔŋŋ, ni mɔ ko yeŋ awerɛho dɔŋŋ, ni mɔ ko woŋ yara ko hu dɔŋŋ, ni mɔ ko hu piŋŋ dɔŋŋ. Tsutsu nibii lɛ [ni jalɛsane ni ayeee kɛ amanehulu ni yɔɔ ŋmɛnɛ lɛ fata he lɛ] eho etee.”​—Kpojiemɔ 21:3, 4.

Kwɛmɔ ŋmalɛi nɛɛ hu: Lala 37:10, 11; 46:9; kɛ Mika 4:1-4.

Mɛni Baa Wɔnɔ Kɛ́ Wɔgboi?

NƆ HEWƆ NI ABIƆ SANE NƐƐ: Jamɔi ni yɔɔ je lɛŋ lɛ babaoo tsɔɔ akɛ nɔ ko yɛ gbɔmɔ mli ni yaa nɔ ehiɔ shi yɛ gbɔmɔ lɛ gbele sɛɛ. Mɛi komɛi heɔ amɛyeɔ akɛ gbohii lɛ baanyɛ aye hiɛkãalɔi awui, aloo akɛ, Nyɔŋmɔ kɛ mɛi fɔji woɔ hɛl la ko mli kɛgbalaa amɛtoi, ni toigbalamɔ nɛɛ yaa nɔ kɛyaa naanɔ.

NƆ NI BIBLIA LƐ TSƆƆ: Kɛ́ adesai gboi lɛ, amɛbɛ shihilɛ mli dɔŋŋ. Jajelɔ 9:5 lɛ kɛɔ akɛ: “Mɛi ni egboi lɛ leee nɔ ko nɔ ko kwraa.” Akɛni gbohii lɛ nyɛŋ ale nɔ ko, ni amɛnyɛŋ amɛnu nii ahe hu hewɔ lɛ, amɛnyɛŋ amɛye hiɛkãalɔi awui, ni asaŋ amɛnyɛŋ amɛye amɛbua hiɛkãalɔi hu.​—Lala 146:3, 4.

Kwɛmɔ ŋmalɛi nɛɛ hu: 1 Mose 3:19 Jajelɔ 9:6, 10.

 Ani Hiɛnɔkamɔ Ko Yɛ Kɛhã Mɛi Ni Egboi Lɛ?

NƆ HEWƆ NI ABIƆ SANE NƐƐ: Wɔmiisumɔ ni wɔhi shi, ni wɔmiisumɔ ni wɔkɛ wɔsuɔlɔi aná wala mli ŋɔɔmɔ. Ejeee tɔmɔ akɛ wɔbaashwe ni wɔna wɔsuɔlɔi ni egboi lɛ ekoŋŋ.

NƆ NI BIBLIA LƐ TSƆƆ: Abaatee mɛi ni egboi lɛ ateŋ mɛi babaoo shi. Yesu wo shi akɛ: “Mɛi fɛɛ ni yɔɔ gbohii abui lɛ amli lɛ baanu egbee ni amɛbaaje kpo.” (Yohane 5:28, 29) Yɛ Nyɔŋmɔ shishijee yiŋtoo lɛ kɛ gbeekpãmɔ naa lɛ, mɛi ni abaatee amɛ shi lɛ baaná hegbɛ ní amɛhi shi yɛ paradeiso mli yɛ shikpɔŋ lɛ nɔ. (Luka 23:43) Nɔ ni fata nɛkɛ shiwoo ni baaba mli wɔsɛɛ nɛɛ he ji gbɔmɔtsoŋ hewalɛnamɔ ni yeɔ emuu kɛ naanɔ wala kɛhã adesai ni boɔ Nyɔŋmɔ toi lɛ. Biblia lɛ kɛɔ akɛ: “Jalɔi lɛ, shikpɔŋ lɛ baatsɔ amɛnɔ, ni amɛbaahi nɔ kɛya naanɔ.”​—Lala 37:29.

Kwɛmɔ ŋmalɛi nɛɛ hu: Hiob 14:14, 15; Luka 7:11-17; kɛ Bɔfoi 24:15.

Mɛɛ Gbɛ Nɔ Matsɔ Masɔle Ni Nyɔŋmɔ Abo Mi Toi?

NƆ HEWƆ NI ABIƆ SANE NƐƐ: Kɛ́ hooo kwraa lɛ, jamɔi fɛɛ amli bii sɔleɔ. Kɛ̃lɛ, mɛi pii nuɔ he akɛ ahãaa amɛsɔlemɔi lɛ ahetoo.

NƆ NI BIBLIA LƐ TSƆƆ: Yesu tsɔɔ wɔ akɛ kɛ́ wɔmiisɔle lɛ, esaaa akɛ wɔwieɔ “wiemɔ kome too lɛ nɔŋŋ” shii abɔ. (Mateo 6:7) Kɛ́ wɔmiitao ni Nyɔŋmɔ abo wɔsɔlemɔi toi lɛ, belɛ esa akɛ wɔsɔle yɛ gbɛ ni ekpɛlɛɔ nɔ lɛ nɔ. Bɔ ni afee ni wɔnyɛ wɔfee nakai lɛ, ebiɔ ni wɔkase nɔ ni Nyɔŋmɔ suɔmɔnaa nii ji, ni wɔsɔle yɛ naa. Yohane Klɛŋklɛŋ Wolo 5:14 lɛ feɔ lɛ faŋŋ akɛ: “Nɔ fɛɛ nɔ ni wɔbiɔ ni kɛ esuɔmɔnaa nii kpãa gbee lɛ, eboɔ wɔ toi.”

Kwɛmɔ ŋmalɛi nɛɛ hu: Lala 65:2; Yohane 14:6, 14; kɛ 1 Yohane 3:22.

Te Mafee Tɛŋŋ Maná Miishɛɛ Yɛ Shihilɛ Mli?

NƆ HEWƆ NI ABIƆ SANE NƐƐ: Mɛi pii susuɔ akɛ shika, gbɛ́ihemɔ, loo hefɛo baahã amɛná miishɛɛ. No hewɔ lɛ, amɛtiuɔ nibii nɛɛ asɛɛ, shi amɛnine shɛɛɛ miishɛɛ ni amɛtaoɔ lɛ nɔ.

NƆ NI BIBLIA LƐ TSƆƆ: Yesu tsɔɔ nɔ diɛŋtsɛ ni kɛ miishɛɛ baa, be ni ekɛɛ akɛ: “Mɛi ni le akɛ Nyɔŋmɔ he miihia amɛ lɛ yɛ miishɛɛ” lɛ. (Mateo 5:3) Wɔbaanyɛ wɔná anɔkwa miishɛɛ kɛ́ wɔto gbɛjianɔ kɛtsu wɔhiamɔ nii ni fe fɛɛ​—ni ji shwelɛ ni wɔyɔɔ akɛ wɔle anɔkwalei ni kɔɔ Nyɔŋmɔ kɛ eyiŋtoo kɛhã wɔ lɛ he lɛ he nii. Nakai anɔkwalei lɛ yɛ Biblia lɛ mli. Kɛ́ wɔle nakai anɔkwalei lɛ, ebaaye ebuɔ wɔ ni wɔyoo nibii ni he hiaa diɛŋtsɛ kɛ nibii ni he ehiaaa lɛ hu. Kɛ́ wɔhã Biblia mli anɔkwalei kudɔ wɔ be ni wɔkpɛɔ wɔyiŋ kɛ be ni wɔfeɔ nibii krokomɛi lɛ, ehãa wɔnáa miishɛɛ yɛ shihilɛ mli.​—Luka 11:28.

Kwɛmɔ ŋmalɛi nɛɛ hu: Abɛi 3:5, 6, 13-18 1 Timoteo 6:9, 10.

 Saji ni wɔsusu he kuku kɛtsɔ hiɛ nɛɛ ji sanebimɔi ekpaa ni Biblia lɛ ehã hetoo. Ani oosumɔ ni ole babaoo ofata he? Kɛ́ ofata “mɛi ni le akɛ Nyɔŋmɔ he miihia amɛ lɛ” ahe lɛ, ekã shi faŋŋ akɛ obaasumɔ. Ekolɛ osusuɔ sanebimɔi tamɔ nɔ ni nyiɛ sɛɛ nɛɛ ahe: ‘Kɛ́ Nyɔŋmɔ susuɔ wɔhe lɛ, mɛni hewɔ eŋmɛ efɔŋfeemɔ kɛ nɔnaa babaoo gbɛ yɛ yinɔsane mli fɛɛ lɛ? Te mafee tɛŋŋ mahã miweku lɛ shihilɛ afee nɔ ni hi jogbaŋŋ?’ Biblia lɛ kɛ sanebimɔi nɛɛ kɛ sanebimɔi krokomɛi babaoo ahetoo ni mɔɔ shi, ni hãa mɔ tsui nyɔɔ emli hãa.

Shi ŋmɛnɛ lɛ, mɛi babaoo shashaoɔ shi akɛ amɛbaakwɛ Biblia lɛ mli. Amɛnaa Biblia lɛ akɛ eji wolo ko ni emli nibii fa babaoo, ní bei komɛi lɛ eshishinumɔ wa. Ani obaasumɔ ni aye abua bo ni ona hetoi lɛ yɛ Biblia lɛ mli? Yehowa Odasefoi yɛ dɛŋdadei enyɔ ni baanyɛ aye abua bo.

Klɛŋklɛŋ lɛ, ato wolo ni ji Mɛni Wɔbaanyɛ Wɔkase Kɛjɛ Biblia Lɛ Mli? lɛ he gbɛjianɔ ní akɛye abua mɛi ni bɛ dekã lɛ ní amɛná hetoi ni yɔɔ faŋŋ ni Biblia lɛ kɛhãa yɛ sanebimɔi ni he hiaa lɛ ahe.Nɔ ni ji enyɔ lɛ ji, shĩa Biblia mli nikasemɔ ni akɛ mɛi feɔ ní aheee nɔ ko. Odasefonyo ko ni yɔɔ okutso lɛ mli ni baanyɛ atsɔɔ Biblia lɛ mli jogbaŋŋ lɛ baanyɛ aba oshĩa loo he kroko ni baahi ahã bo koni daa otsi lɛ ekɛ bo abasusu Biblia lɛ he be fioo. Mɛi akpekpei abɔ ená enɛ he sɛɛ yɛ jeŋ fɛɛ. Amɛteŋ mɛi babaoo kɛ miishɛɛ ewie akɛ: “Mina anɔkwale lɛ!”

Jwetri ko bɛ ni jara wa fe enɛ. Biblia mli anɔkwalei lɛ hãa wɔyeɔ wɔhe kɛjeɔ amale hemɔkɛyelii, yiŋfutumɔ, kɛ gbeyeishemɔ ni esaaa lɛ he. Ehãa wɔnáa hiɛnɔkamɔ kɛ miishɛɛ, ni wɔleɔ nɔ hewɔ ni wɔyɔɔ shihilɛ mli. Yesu kɛɛ akɛ: “Nyɛbaale anɔkwale lɛ, ni anɔkwale lɛ baahã nyɛye nyɛhe.”​—Yohane 8:32.