Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 54

Yehowa To Etsui Shi Ehã Yona

Yehowa To Etsui Shi Ehã Yona

Be ko ni eho lɛ, maŋ ko yɛ Asiria ni atsɛɔ lɛ Ninive. Mɛi ni yɔɔ maŋ nɛɛ mli lɛ ayitseiaŋ wala. No hewɔ lɛ, Yehowa kɛɛ gbalɔ Yona akɛ eya jɛmɛ ni eyakɛɛ amɛ akɛ amɛkpa nibii gbohii ni amɛfeɔ lɛ. Shi Yona jo foi ni eyaaa. Eyakwɔ lɛlɛ agbo ko ni miiya Tarshish.

Be ni amɛyaa lɛ, ahum ko ni naa wa bɔi tswaa ni mɛi ni kudɔɔ lɛlɛ lɛ atsui fã. Amɛsɔle amɛbi amɛnyɔŋmɔi lɛ nɔ ni eba. Naagbee lɛ, Yona kɛɛ amɛ akɛ: ‘Mihewɔ ahum nɛɛ tswaa lɛ. Yehowa etsu mi, shi miijo foi. Nyɛwóa mi nyɛwoa ŋshɔ lɛ mli, ni ahum lɛ baakpa tswaa.’ Kulɛ, mɛi ni kudɔɔ lɛlɛ lɛ sumɔɔɔ ni amɛkɛ Yona woɔ ŋshɔ lɛ mli. Shi ewie aahu ni amɛwó lɛ amɛwo mli. Be ni amɛfee nakai pɛ ni ahum lɛ kpa tswaa.

Yona susu akɛ ebaagbo. Be ni eyaa nu lɛ shishi lɛ, esɔle ehã Yehowa. Kɛkɛ ni Yehowa hã loo agbo ko mi lɛ. Shi Yona gbooo. Ehɔ loo lɛ musu mli ni esɔle ekɛɛ Yehowa akɛ: ‘Miiwo bo shi akɛ, mabo bo toi be fɛɛ be.’ Yehowa bu Yona he yɛ loo lɛ musu mli gbii etɛ. Kɛkɛ ni ehã loo lɛ yashwe lɛ efɔ̃ ŋshɔ lɛ naa.

Ani Yehowa baahã Yona aya Ninive lolo? Hɛɛ. Yehowa saa ekɛɛ lɛ akɛ eya jɛmɛ. Agbɛnɛ lɛ, Yona tee. Be ni etee lɛ, ekɛɛ mɛi ni yɔɔ jɛmɛ lɛ akɛ: ‘Biɛ gbii 40 lɛ, abaakpãtã Ninive hiɛ.’  Naakpɛɛ sane ji akɛ, Ninivebii lɛ bo kɔkɔbɔɔ lɛ toi ni amɛkpa nibii gbohii ni amɛfeɔ lɛ. Ninive maŋtsɛ lɛ kɛɛ ewebii lɛ akɛ: ‘Nyɛboa nyɛtsɛa Nyɔŋmɔ, ni nyɛkpaa nibii gbohii ni nyɛfeɔ lɛ. Ekolɛ ebaana wɔ mɔbɔ.’ Be ni Yehowa na akɛ Ninivebii lɛ etsake amɛsubaŋ lɛ, ekpãtãaa maŋ lɛ hiɛ.

Yona mli fu akɛ Yehowa kpãtãaa Ninive hiɛ. Nɔ ni Yona fee lɛ ehiii. Yehowa to etsui shi ehã lɛ ni ena lɛ mɔbɔ. Shi lɛ lɛ, enaaa Ninivebii lɛ mɔbɔ. Etu ehiɛ ni eje kpo yɛ maŋ lɛ mli eyata tsene tso ko shishi. Shi tso lɛ gbo ni Yona mli fu. No hewɔ lɛ, Yehowa bi lɛ akɛ: ‘Tso nɛɛ he miihia bo fe Ninivebii lɛ lo? Mina amɛ mɔbɔ ni amɛhiɛ kpãtãaa.’ Yehowa ye ebua Yona koni ena akɛ, Ninivebii lɛ ahe miihia fe tsei.

“Yehowa [lɛ,] . . . etsui shi etoɔ ehãa nyɛ, ejaakɛ esumɔɔɔ akɛ akpãtã mɔ ko mɔ ko hiɛ, shi moŋ eesumɔ ni mɛi fɛɛ atsake amɛtsui.”​—2 Petro 3:9