Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 55

Yehowa Bɔfo Lɛ Bu Hezekia He

Yehowa Bɔfo Lɛ Bu Hezekia He

Asiriabii lɛ ye Israel akutsei nyɔŋma maŋtsɛyeli lɛ nɔ kunim. No sɛɛ lɛ, Senakerib, Asiria maŋtsɛ lɛ ka akɛ ebaaye Yuda akutsei enyɔ maŋtsɛyeli lɛ hu nɔ kunim. Ebɔi Yuda maji lɛ ahiɛkpatamɔ ekomekome. Shi maŋ ni no mli lɛ etaoɔ waa ji Yerusalem. Nɔ ni Senakerib leee ji akɛ, Yehowa miibu Yerusalem he.

Yuda maŋtsɛ Hezekia loo shika pii eyahã Senakerib koni ekaba Yerusalem. Senakerib he shika lɛ, shi etsu esraafoi lɛ kɛtee koni amɛyakpãtã Yerusalem hiɛ. Be ni Asiriabii lɛ bɛŋkɛ Yerusalem lɛ, Yerusalembii lɛ atsui fã. Shi Hezekia kɛɛ amɛ akɛ: ‘Nyɛkashea gbeyei. Asiriabii lɛ ahe wa, shi Yehowa baahã wɔhe awa fe amɛ.’

Senakerib tsu Rabshake lɛ, ni ji etsuji lɛ ateŋ mɔ kome kɛtee Yerusalem koni eyaye amɛhe fɛo. Rabshake lɛ damɔ maŋ lɛ gbogbo lɛ sɛɛ ni ebo ekɛɛ: ‘Yehowa nyɛŋ aye abua nyɛ. Nyɛkahãa Hezekia lakaa nyɛ. Nyɔŋmɔ ko bɛ ni baanyɛ ajie nyɛ kɛje wɔdɛŋ.’

Hezekia bi Yehowa nɔ ni efee. Yehowa kɛɛ lɛ akɛ: ‘Kaahã nɔ ni Rabshake lɛ wie lɛ wo ohe gbeyei. Senakerib yeŋ Yerusalem nɔ kunim.’ Sɛɛ mli lɛ, Senakerib ŋmala woji komɛi eyahã Hezekia. Yɛ woji lɛ amli lɛ, ekɛɛ Hezekia akɛ: ‘Ba ohe shi ohã mi. Yehowa nyɛŋ ehere nyɛyiwala.’ Hezekia sɔle ekpa Yehowa fai akɛ: ‘Yehowa, ofainɛ, heremɔ wɔyiwala koni mɔ fɛɛ mɔ ana akɛ, bo ji anɔkwa Nyɔŋmɔ koome lɛ.’ Yehowa kɛɛ Hezekia akɛ: ‘Asiria maŋtsɛ lɛ boteŋ Yerusalem. Mabu mimaŋ lɛ he.’

Senakerib susu akɛ bɔ fɛɛ bɔ ni fee lɛ, ebaaye Yerusalem nɔ kunim. Esraafoi lɛ bua amɛhe naa yɛ Yerusalem gbogboi lɛ asɛɛ. Shi gbɛkɛ kome  be ni je tsɛreɔ lɛ, Yehowa etsu bɔfo kome ni eyagbe Asiria asraafoi 185,000 sɔŋŋ! Maŋtsɛ Senakerib asraafoi ni he wala waa lɛ fɛɛ gboi. Agbɛnɛ lɛ, nɔ ko bɛ ni ebaafee dɔŋŋ. No hewɔ lɛ, ekɛ ehiɛgbele lɛ ku esɛɛ kɛtee emaŋ. Yehowa bu Hezekia kɛ Yerusalem he, tamɔ bɔ ni ewo shi akɛ ebaafee lɛ. Eji oyɛ Yerusalem be ni nibii nɛɛ yaa nɔ lɛ kulɛ, ani okɛ ohiɛ baafɔ̃ Yehowa nɔ?

“Yehowa bɔfo lɛ bɔleɔ mɛi ni sheɔ lɛ gbeyei lɛ ahe kɛkpeɔ, ni ejieɔ amɛ.”​—Lala 34:7