Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 44

Yehowa Sɔlemɔ Shĩa Lɛ

Yehowa Sɔlemɔ Shĩa Lɛ

Be ni Solomon batsɔ Israelbii lɛ amaŋtsɛ lɛ, Yehowa bi lɛ akɛ: ‘Mɛni oosumɔ ni mahã bo?’ Solomon kɛɛ lɛ akɛ: ‘Midako, ni mileee nɔ ni mafee. Ofainɛ, hã mihiɛ akã shi koni manyɛ makwɛ owebii lɛ anɔ.’ Yehowa kɛɛ lɛ akɛ: ‘Akɛni obi hiɛshikamɔ hewɔ lɛ, mahã ohiɛ akã shi fe mɛi fɛɛ ni yɔɔ shikpɔŋ lɛ nɔ. Kɛfata he lɛ, mahã oná shika waa, ni kɛ́ obo mi toi lɛ, mahã otsɛ yɛ jeŋ.’

Solomon bɔi sɔlemɔ shĩa lɛ maa. Ekɛ shika tsuru kɛ jwiɛtɛi krɔŋŋ, tsei ni hi jogbaŋŋ, kɛ tɛi ni jara wa ma tsũ lɛ. Hii kɛ yei akpei abɔ ni he esa ye amɛbua kɛma tsũ lɛ. Ehe afii kpawo dani ama sɔlemɔ shĩa lɛ agbe naa. No sɛɛ lɛ, Solomon jɔɔ nɔ ehã Yehowa. Akɛ afɔlei srɔtoi shwie afɔleshaa latɛ ni yɔɔ sɔlemɔ shĩa lɛ mli lɛ nɔ. Kɛkɛ ni Solomon kula shi yɛ afɔleshaa latɛ lɛ hiɛ ni esɔle ekɛɛ: ‘Ao Yehowa, oda ni ohiɛ yɛ nyam kwraa fe sɔlemɔ shĩa nɛɛ. Shi ofainɛ, kɛ́ wɔbajá bo yɛ biɛ lɛ, kpɛlɛmɔ nɔ, ni kɛ́ wɔsɔle lɛ, bo wɔ toi.’ Ani Yehowa hiɛ sɔ sɔlemɔ shĩa lɛ? Ani ebo Solomon sɔlemɔ lɛ toi? Hɛɛ. Be ni Solomon sɔle egbe naa nɔŋŋ ni la jɛ ŋwɛi ebashã afɔlei ni yɔɔ afɔleshaa latɛ lɛ nɔ lɛ. Enɛ hã Israelbii lɛ na akɛ, Yehowa hiɛ esɔ sɔlemɔ shĩa lɛ, ni amɛmii shɛ amɛhe waa.

Mɛi fɛɛ ni yɔɔ Israel lɛ na akɛ Solomon hiɛ kã shi waa. Mɛi komɛi ni bɛ Israel lɛ po ná amɛle akɛ ehiɛ kã shi waa. Mɛi bagba Solomon amɛnaagbai koni eye ebua amɛ. Sheba maŋnyɛ lɛ po ba Solomon ŋɔɔ. Ebi lɛ saji komɛi ni hetoo hãmɔ wa waa koni ekɛka lɛ. Be ni Solomon hã esanebimɔi lɛ fɛɛ hetoo lɛ, ewie akɛ: ‘Be ni mɛi gba mi ohe sane lɛ, miheee amɛ miyeee. Shi bianɛ lɛ, mina akɛ ohiɛ kã shi fe bɔ ni abagba mi lɛ po. Yehowa o-Nyɔŋmɔ lɛ ejɔɔ bo.’ Israelbii lɛ amii shɛ amɛhe ni amɛhi shi jogbaŋŋ. Shi naagba ko ba.

“Naa! mɔ ko ni fe Solomon yɛ biɛ.”​—Mateo 12:42