Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 47

Yehowa Wo Elia Hewalɛ

Yehowa Wo Elia Hewalɛ

Yezebel nu nɔ ni eba Baal gbalɔi lɛ anɔ lɛ, ni emli fu waa. Etsu ni ayakɛɛ Elia akɛ: ‘Wɔ́ lɛ, bo hu obaagbo tamɔ bɔ ni Baal gbalɔi lɛ egboi lɛ.’ Elia tsui fã waa ni ejo foi kɛtee ŋa lɛ nɔ. Esɔle akɛ: ‘Yehowa, agbɛnɛ minyɛɛɛ dɔŋŋ. Hã magbo kɛkɛ.’ Bɔ ni etɔ lɛ sɔŋŋ hewɔ lɛ, ekã tso ko shishi ewɔ.

Ŋwɛibɔfo ko batsĩɛ lɛ ni ekɛɛ lɛ blɛoo akɛ: ‘Tee shi ni oye nii.’ Be ni Elia te shi lɛ, ena blodo kokroo ko ni kã tɛi ni edɔ anɔ, kɛ nu kɛ kɔɔpoo. Eye niyenii lɛ, ni enu nu lɛ. No sɛɛ lɛ ekã shi ewɔ ekoŋŋ. Ŋwɛibɔfo lɛ batsĩɛ lɛ ekoŋŋ ni ekɛɛ lɛ akɛ: ‘Tee shi ni oye nii, koni oná hewalɛ kɛfã gbɛ lɛ.’ No hewɔ lɛ, Elia te shi ni eye nii ekoŋŋ. Enɛ hã ená hewalɛ kɛfã gbɛ gbii 40 kɛyashi eyashɛ Horeb Gɔŋ lɛ nɔ. Be ni eshɛ jɛmɛ lɛ, ebote tɛkplo ko mli koni eyawɔ. Shi Yehowa bi lɛ akɛ: ‘Elia, mɛni ofeɔ yɛ biɛ?’ Elia hã hetoo akɛ: ‘Israelbii lɛ yeee shi ni amɛwo bo lɛ nɔ. Amɛkumɔ ofɔleshaa latɛi lɛ, ni amɛgbe ogbalɔi lɛ. Agbɛnɛ lɛ, amɛmiitao amɛgbe mi hu.’

Yehowa kɛɛ lɛ akɛ: ‘Yaa ni oyadamɔ gɔŋ lɛ nɔ.’ Klɛŋklɛŋ lɛ, kɔɔyɔɔ ni naa wa tswa yɛ tɛkplo lɛ he. No sɛɛ lɛ, shikpɔŋ hoso, ni la ba. Naagbee lɛ, Elia nu gbee blɛoo ko ni naa waaa. Ekɛ etade nɔhaanɔ lɛ ha ehiɛ ni eje kpo yɛ tɛkplo lɛ mli. Kɛkɛ ni Yehowa bi lɛ nɔ hewɔ ni ejo foi lɛ. Elia kɛɛ lɛ akɛ: ‘Mi pɛ eshwɛ.’ Shi Yehowa kɛɛ lɛ akɛ: ‘Jeee bo pɛ eshwɛ. Mɛi 7,000 yɛ Israel ni miijá mi lolo. Yaa ni oyakɛɛ Elisha akɛ lɛ ebaaye osɛɛ akɛ gbalɔ.’ Elia tee amrɔ nɔŋŋ ni eyafee nɔ ni Yehowa kɛɛ lɛ lɛ. Bo hu obaanyɛ oná nɔmimaa akɛ, kɛ́ ofee nɔ ni Yehowa sumɔɔ lɛ, ebaaye ebua bo. Be ni nu hɔmɔ lɛ ba lɛ, nɔ ko ni sa kadimɔ tee nɔ. Hã wɔkwɛ nɔ ni ji.

“Nyɛkayea nyɛtsui yɛ nɔ ko nɔ ko he, shi moŋ yɛ nɔ fɛɛ nɔ mli lɛ, nyɛtsɔa sɔlemɔ, kɛ fai ni akɛ hiɛdɔɔ kpaa, kɛ shidaa nɔ nyɛhãa Nyɔŋmɔ alea nyɛnibimɔi lɛ.”​—Filipibii 4:6