Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 41

David Kɛ Saul

David Kɛ Saul

Be ni David gbe Goliat lɛ, Maŋtsɛ Saul wó lɛ esraafoi lɛ ahiɛnyiɛlɔ. David kɛ maji pii yanɔ ni eye amɛnɔ kunim. Enɛ hã mɛi bale lɛ waa. Be fɛɛ be ni ekɛ mɛi komɛi baayanɔ eba lɛ, yei lɛ kɛ joo bakpeɔ lɛ, ni amɛláa akɛ: ‘Saul egbe mɛi akpei abɔ, shi David egbe mɛi akpei nyɔŋmai abɔ!’ Saul mli fu David yɛ enɛ hewɔ, ni ekpɛ eyiŋ akɛ ebaagbe lɛ.

David le saŋku tswaa waa. Gbi ko be ni etswaa saŋku ehãa Maŋtsɛ Saul lɛ, Saul fɔ̃ akpɔlɔ koni ekɛtsu lɛ. Shi David he fee oya ni eje mli ehã lɛ, ni akpɔlɔ lɛ yatsu gbogbo lɛ. Saul ka shii abɔ akɛ ebaagbe David. No hewɔ lɛ, David jo foi eyatee yɛ he ko ni kɛ maŋ lɛ teŋ jekɛ waa ni shia sɔŋŋ yɔɔ jɛmɛ.

Saul kɛ hii 3,000 tee koni amɛyatao David. Be ni amɛtee lɛ, eyana tɛkplo ko  ni ebote mli. Asomoaŋ, David kɛ ehii lɛ yɛ tɛkplo nɛɛ nɔŋŋ mli. David hii lɛ wo etoiŋ akɛ: ‘Hegbɛ ni oná ni okɛbaagbe Saul nɛ.’ David dɛkɛ shi kɛtee he ni Saul yɔɔ lɛ, ni efo maŋtsɛ atade ni Saul wo lɛ naabu. Shi Saul enaaa lɛ. Sɛɛ mli lɛ, David na akɛ nɔ ni efee lɛ tsɔɔ akɛ ebuuu maŋtsɛ ni Yehowa ehala lɛ, ni edɔ lɛ waa. Ehãaa ehii lɛ afee Saul efɔŋ ko. Be ni Saul je kpo yɛ tɛkplo lɛ mli lɛ, David tsɛ lɛ ni ekɛɛ lɛ akɛ ená hegbɛ ni ebaagbe lɛ, shi egbeee lɛ. Ani enɛ baahã Saul atsake ejwɛŋmɔ yɛ David he?

Dabi. Saul tee nɔ etao David koni egbe lɛ. Gbɛkɛ ko lɛ, David kɛ enyɛmi nuu bi ko ni atsɛɔ lɛ Abishai lɛ dɛkɛ shi kɛtee he ni Saul kɛ ewebii lɛ yɔɔ lɛ. Be ni amɛtee lɛ, amɛna akɛ Abner, ni ji mɔ ni buɔ Saul he lɛ po ewɔ. Abishai wie akɛ: ‘Hegbɛ ni wɔná lɛ nɛ! Hã magbe lɛ.’ Shi David kɛɛ lɛ akɛ: ‘Yehowa ji mɔ ni kɛ Saul baaye. Hã wɔkɔlɔ ekpɔlɔ kɛ enu tɔ lɛ ni wɔya.’

David kwɔ kɛtee gɔŋ ko ni bɛŋkɛ jɛmɛ lɛ nɔ, ni ebolɔ ekɛɛ: ‘Abner, mɛni hewɔ obuuu maŋtsɛ lɛ he? Nɛgbɛ Saul akpɔlɔ kɛ enu tɔ lɛ yɔɔ?’ Saul yoo David gbee ni ekɛɛ lɛ akɛ: ‘Kulɛ obaanyɛ ogbe mi, shi ogbeee mi. Mile akɛ bo obaaye misɛɛ akɛ Israel nɔ maŋtsɛ.’ Saul ku esɛɛ kɛtee shĩa. Ani ole akɛ no mli lɛ, Saul weku lɛ mli bii lɛ ekomɛi sumɔɔ David sane? Hã wɔkwɛ.

“Kɛ́ ebaahi lɛ, nyɛgbɛfaŋ lɛ, nyɛfea bɔ fɛɛ bɔ ni nyɛaanyɛ koni toiŋjɔlɛ ahi nyɛ kɛ mɛi fɛɛ ateŋ. Mɛi ni asumɔɔ, nyɛkatɔa nyɛ diɛŋtsɛ nyɛhe owele, shi moŋ nyɛshia nyɛhãa mlifu lɛ.”​—Romabii 12:18, 19