Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 31

Yoshua Kɛ Gibeonbii Lɛ

Yoshua Kɛ Gibeonbii Lɛ

Maji krokomɛi ni yɔɔ Kanaan shikpɔŋ lɛ nɔ lɛ nu nɔ ni eba Yeriko nɔ lɛ. No hewɔ lɛ, maji nɛɛ anɔ maŋtsɛmɛi lɛ kpɛ amɛyiŋ akɛ amɛbaafee ekome kɛwu amɛshi Israelbii lɛ. Shi Gibeonbii lɛ kpɛ amɛyiŋ akɛ amɛbaafee nɔ kroko kwraa. Amɛhã amɛmaŋbii lɛ ekomɛi wo atadei ni etserɛ, ni amɛtee Yoshua ŋɔɔ amɛyakɛɛ lɛ akɛ: ‘Wɔjɛ maŋsɛɛ shɔŋŋ. Wɔnu Yehowa kɛ nibii ni efee ehã nyɛ yɛ Ejipt kɛ Moab lɛ he sane. Nyɛwoa wɔ shi akɛ nyɛyeŋ wɔ awui ko, ni wɔbaasɔmɔ nyɛ.’

Yoshua he amɛ eye, ni ekɛɛ amɛ akɛ eyeŋ amɛ awui. Shi gbii etɛ sɛɛ lɛ, ená ele akɛ jeee maŋsɛɛ shɔŋŋ amɛjɛ. Asomoaŋ Kanaan shikpɔŋ lɛ nɔ nɔŋŋ amɛjɛ. Yoshua bi amɛ akɛ: ‘Mɛni hewɔ nyɛlaka wɔ?’ Amɛhã hetoo akɛ: ‘No mli lɛ, wɔmiishe nyɛ gbeyei! Wɔle akɛ Yehowa nyɛ-Nyɔŋmɔ lɛ miiwu eehã nyɛ. Nyɛfainɛ nyɛkagbea wɔ.’ Yoshua ye ewiemɔ nɔ ni egbeee amɛ.

Etsɛɛɛ kwraa ni Kanaan maŋtsɛmɛi enumɔ kɛ amɛsraafoi batutua Gibeonbii lɛ. Yoshua kɛ esraafoi lɛ nyiɛ nyɔɔŋ muu  fɛɛ kɛtee koni amɛyahere Gibeonbii lɛ. Enɔ jetsɛremɔ leebi maŋkpa lɛ, amɛbɔi ta lɛ wuu. Kanaanbii lɛ jo ta lɛ naa foi, shi he fɛɛ he ni amɛbaatsɔ lɛ, Yehowa hã nyɔŋmɔŋtɛi wuji nɛ eshwie amɛnɔ. Kɛkɛ ni Yoshua kpa Yehowa fai ni efee nɔ ko ni kɛjɛ be ni abɔ jeŋ nɛɛ lɛ, eko bako dã. Ekpa lɛ fai ni ehã hulu lɛ awa adamɔ shi. Mɛni hewɔ Yoshua nyɛ ebi Yehowa ni efee nɔ ko nakai? Ejaakɛ ekɛ ehiɛ fɔ̃ Yehowa nɔ. Hulu lɛ enyɔɔɔ shi gbi muu fɛɛ kɛyashi Israelbii lɛ ye Kanaanbii lɛ anɔ kunim.

“Nyɛhãa nyɛwiemɔ ‘Hɛɛ’ afea hɛɛ, ‘Dabi’ afea dabi, ejaakɛ nɔ fɛɛ nɔ ni tekeɔ enɛɛmɛi lɛ, ejɛ mɔ fɔŋ lɛ mli.”​—Mateo 5:37