Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 36

Yefta Shiwoo Lɛ

Yefta Shiwoo Lɛ

Israelbii lɛ kpa Yehowa jamɔ ekoŋŋ ni amɛyajá amale nyɔŋmɔi. No hewɔ lɛ, Amonbii lɛ batutua amɛ ni amɛkɛ amɛ wu. Shi amale nyɔŋmɔi lɛ nyɛɛɛ aye abua amɛ. Israelbii lɛ na nɔ afii babaoo. Naagbee lɛ, amɛkɛɛ Yehowa akɛ: ‘Wɔfee esha wɔshi bo. Ofainɛ heremɔ wɔ kɛjɛ wɔhenyɛlɔi lɛ adɛŋ.’ Israelbii lɛ fite amɛmagai lɛ fɛɛ, ni amɛbɔi Yehowa jamɔ ekoŋŋ. Agbɛnɛ Yehowa nyɛɛɛ ekwɛ ni amɛya nɔ amɛpiŋ dɔŋŋ.

Yehowa hala nuu ko ni yɔɔ ekãa waa ni atsɛɔ lɛ Yefta koni enyiɛ amɛhiɛ ni amɛyawu amɛshi Amonbii lɛ. Yefta kɛɛ Yehowa akɛ: ‘Miiwo bo shi akɛ, kɛ́ oye obua wɔ ni wɔye kunim lɛ, kɛ́ miku misɛɛ lɛ, mikɛ mɔ klɛŋklɛŋ ni baaje kpo kɛjɛ mishĩa lɛ ekɛ mi  abakpe lɛ baahã bo.’ Yehowa bo Yefta sɔlemɔ lɛ toi, ni eye ebua lɛ ni amɛye kunim yɛ ta lɛ mli.

Be ni Yefta ku esɛɛ eba shĩa lɛ, mɔ klɛŋklɛŋ ni je kpo ebakpee lɛ ji ebiyoo, ni ji ebi kome pɛ ni eyɔɔ lɛ. Be ni ebaa lɛ, eejo, ni eesha akasha. Mɛni Yefta baafee? Ekai nɔ ni ewo Yehowa shi akɛ ebaafee lɛ, ni ewie akɛ: ‘Ao, mibiyoo! Okumɔ mitsui. Miwo Yehowa shi. No hewɔ lɛ, esa akɛ mikɛ bo aya ni oyasɔmɔ yɛ sɔlemɔ buu lɛ yɛ Shilo.’ Ebiyoo lɛ kɛɛ lɛ akɛ: ‘Mipapa, kɛ́ owo Yehowa shi lɛ, esa akɛ oye nɔ. Nɔ pɛ ni mitaoɔ ji, ni ohã mi kɛ minanemɛi yei lɛ ayaye nyɔji enyɔ yɛ gɔji lɛ anɔ, koni no sɛɛ lɛ maya.’ Yefta biyoo lɛ kɛ anɔkwayeli sɔmɔ Yehowa yɛ sɔlemɔ buu lɛ naa ewala gbii abɔ fɛɛ. Daa afi lɛ, enanemɛi lɛ yaa Shilo amɛyasaraa lɛ.

“Mɔ fɛɛ mɔ ni sumɔɔ binuu loo biyoo fe mi lɛ esaaa mi.”​—Mateo 10:37