Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 37

Yehowa Kɛ Samuel Wie

Yehowa Kɛ Samuel Wie

No mli lɛ, Osɔfonukpa Eli yɛ bihii enyɔ ni sɔmɔɔ akɛ osɔfoi yɛ sɔlemɔ buu lɛ mli. Atsɛɔ amɛ Hofni kɛ Finehas. Hofni kɛ Finehas booo Yehowa mlai lɛ atoi, ni amɛfee maŋbii lɛ nibii gbohii pii. Kɛ́ Israelbii lɛ ba ni amɛbashã afɔle amɛhã Yehowa lɛ, Hofni kɛ Finehas foɔ loo lɛ he ni hi fe fɛɛ lɛ amɛhãa amɛhe. Eli nu nibii gbohii ni ebihii lɛ feɔ lɛ, shi efeee nɔ ko nɔ ko yɛ he. Ani Yehowa baashi amɛ ni amɛya nɔ amɛfee nibii gbohii nɛɛ?

Eyɛ mli akɛ no mli lɛ Hofni kɛ Finehas ye Samuel onukpa kwraa moŋ, shi Samuel ekaseee amɛ. Yehowa ná Samuel he miishɛɛ waa. Gbɛkɛ ko be ni Samuel ewɔ lɛ, enu ni mɔ ko miitsɛ lɛ. No hewɔ lɛ, ete shi ni ejo foi kɛtee Eli ŋɔɔ ni ekɛɛ lɛ akɛ: ‘Naa mi!’ Shi Eli kɛɛ lɛ akɛ: ‘Mitsɛko bo. Yaa ni oyawɔ.’ Samuel tee eyawɔ. Kɛkɛ ni enu ni aatsɛ lɛ ekoŋŋ. Be ni Samuel nu ni aatsɛ lɛ nɔ ni ji shii etɛ nɔ lɛ, Eli na akɛ Yehowa ji mɔ ni tsɛɔ lɛ lɛ. No hewɔ lɛ, ekɛɛ Samuel akɛ, kɛ́ enu ni aatsɛ lɛ ekoŋŋ lɛ, ekɛɛ akɛ: ‘Yehowa, wiemɔ. Otsulɔ miibo toi.’

Samuel tee eyawɔ ekoŋŋ. Kɛkɛ ni enu ni mɔ ko miitsɛ lɛ: ‘Samuel! Samuel!’ Ehere nɔ akɛ: ‘Wiemɔ, ejaakɛ otsulɔ miibo  toi.’ Yehowa kɛɛ lɛ akɛ: ‘Kɛɛmɔ Eli akɛ magbala ekɛ eweku lɛ fɛɛ toi. Ele akɛ ebihii lɛ miifee nibii gbohii yɛ misɔlemɔ buu lɛ mli, shi efeee nɔ ko nɔ ko yɛ he.’ Enɔ jetsɛremɔ lɛ, Samuel gbele sɔlemɔ buu lɛ shinaa lɛ, tamɔ bɔ ni efeɔ daa nɛɛ lɛ. Enyɛɛɛ ekɛɛ osɔfonukpa Eli nɔ ni Yehowa kɛɛ ekɛɛ lɛ lɛ, ejaakɛ eeshe gbeyei. Shi Eli tsu ayatsɛ lɛ kɛba, ni ebi lɛ akɛ: ‘Mibi, mɛni Yehowa kɛɛ bo? Kɛɛmɔ mi fɛɛ.’ No hewɔ lɛ, Samuel kɛɛ Eli nibii fɛɛ ni Yehowa kɛɛ lɛ lɛ.

Be ni Samuel da lɛ, Yehowa shiii lɛ. Mɛi fɛɛ ni yɔɔ Israel shikpɔŋ lɛ nɔ lɛ na akɛ, Yehowa ehala Samuel akɛ gbalɔ kɛ kojolɔ.

“Kaimɔ o-Bɔlɔ Kpele lɛ yɛ oblahiiaŋ gbii lɛ amli.”​—Jajelɔ 12:1