Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 23

Amɛwo Yehowa Shi

Amɛwo Yehowa Shi

Be ni Israelbii lɛ shi Ejipt lɛ sɛɛ nyɔji enyɔ lɛ, amɛyashɛ Sinai Gɔŋ lɛ he, ni amɛjɔɔ amɛhe yɛ jɛmɛ. Yehowa tsɛ Mose kɛba gɔŋ lɛ nɔ, ni ekɛɛ lɛ akɛ: ‘Mi mikpɔ̃ Israelbii lɛ. No hewɔ lɛ, kɛ́ amɛbo mi toi ni amɛye mimlai lɛ anɔ lɛ, amɛbaatsɔ mimaŋ ni mihala.’ Mose ku esɛɛ kɛtee Israelbii lɛ aŋɔɔ, ni eyakɛɛ amɛ nɔ ni Yehowa kɛɛ lɛ. Ani ole hetoo ni amɛhã lɛ? Amɛhã lɛ hetoo akɛ: ‘Nɔ fɛɛ nɔ ni Yehowa baakɛɛ wɔ akɛ wɔfee lɛ, wɔbaafee.’

Mose saa etee gɔŋ lɛ nɔ ekoŋŋ. Kɛkɛ ni Yehowa kɛɛ lɛ akɛ: ‘Biɛ gbii etɛ lɛ, mi kɛ bo baawie. Bɔɔ Israelbii lɛ kɔkɔ akɛ amɛkwɛ jogbaŋŋ ni amɛkakwɔ Sinai Gɔŋ lɛ.’ Mose kpeleke shi kɛtee Israelbii lɛ aŋɔɔ, ni eyakɛɛ amɛ akɛ amɛsaa amɛhe amɛto gbi ni ji etɛ lɛ, ejaakɛ Yehowa kɛ amɛ baawie.

Yɛ gbi ni ji etɛ lɛ nɔ lɛ, Israelbii lɛ na ni sarawa miigbala, ni atatu kpii ebaha gɔŋ lɛ nɔ. Amɛnu ni ŋwɛi miishi waa, ni amɛnu tɛtɛrɛmantɛrɛ gbɛɛmɔi hu. Kɛkɛ ni Yehowa kpeleke shi kɛba gɔŋ lɛ nɔ yɛ la mli. Israelbii lɛ she gbeyei waa ni amɛkpokpo. Gɔŋ muu lɛ fɛɛ hoso waa, ni enɔ fɛɛ yi kɛ lasu. Tɛtɛrɛmantɛrɛ lɛ gbɛɛmɔ tee nɔ emli wa. Kɛkɛ ni Nyɔŋmɔ kɛɛ amɛ akɛ: ‘Miji Yehowa. Nyɛkajáa nyɔŋmɔi krokomɛi.’

Mose ku esɛɛ etee gɔŋ lɛ nɔ, ni Yehowa hã lɛ mlai ni ekɛbahã Israelbii lɛ. Mlai nɛɛ hã amɛna bɔ ni esa akɛ amɛjá Yehowa amɛhã kɛ bɔ ni esa akɛ amɛba amɛjeŋ amɛhã. Mose ŋmala mlai nɛɛ eshwie shi, ni ekane etsɔɔ Israelbii lɛ. Kɛkɛ ni amɛwo Yehowa shi akɛ: ‘Nɔ fɛɛ nɔ ni Yehowa kɛɛ wɔfee lɛ, wɔbaafee.’ Shi ani amɛye shiwoo nɛɛ nɔ?

“Suɔmɔ Yehowa, o-Nyɔŋmɔ lɛ, kɛ otsui muu fɛɛ kɛ osusuma muu fɛɛ kɛ ojwɛŋmɔ muu fɛɛ.”​—Mateo 22:37