Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 24

Amɛyeee Amɛshiwoo Lɛ Nɔ

Amɛyeee Amɛshiwoo Lɛ Nɔ

Yehowa kɛɛ Mose akɛ: ‘Kwɔɔ kɛba miŋɔɔ yɛ gɔŋ lɛ nɔ. Maŋmala mimlai lɛ mawo tɛi tɛtrɛbii anɔ ni mikɛhã bo.’ No hewɔ lɛ, Mose kwɔ kɛtee gɔŋ lɛ nɔ ni ehi jɛmɛ kɛjɛ leebi kɛyashi gbɛkɛ gbii 40 sɔŋŋ. Be ni eyɔɔ jɛmɛ lɛ, Yehowa ŋmala Kitai Nyɔŋma lɛ ewo tɛi tɛtrɛbii enyɔ anɔ, ni ekɛhã lɛ.

Israelbii lɛ yasusu akɛ Mose eshi amɛ. No hewɔ lɛ, amɛkɛɛ Aaron akɛ: ‘Wɔmiitao ni mɔ ko anyiɛ wɔhiɛ. Feemɔ nyɔŋmɔ ohã wɔ!’ Aaron kɛɛ amɛ akɛ: ‘Nyɛhãa mi shika tsuru.’ Kɛkɛ ni esere shika tsuru lɛ ni ekɛfee tsinabi amaga. Mɛi lɛ wie akɛ: ‘Tsinabi nɛɛ ji wɔ-Nyɔŋmɔ ni jie wɔ kɛjɛ Ejipt lɛ!’ Amɛbɔi shika tsinabi amaga lɛ jamɔ, ni amɛye gbi jurɔ. Nɔ ni amɛfee lɛ ehiii, ejaakɛ amɛwo Yehowa shi akɛ lɛ pɛ amɛbaajá. Amɛyeee amɛshiwoo lɛ nɔ.

Yehowa na nɔ ni Israelbii lɛ feɔ lɛ. No hewɔ lɛ, ekɛɛ Mose akɛ: ‘Kpelekemɔ shi ni oya Israelbii lɛ aŋɔɔ. Amɛgbo  minɔ toi ni amɛmiijá amale nyɔŋmɔ ko.’ Mose kpeleke shi, ni ehiɛ tɛi tɛtrɛbii lɛ yɛ edɛŋ.

Be ni eshwɛ fioo ni Mose baashɛ he ni Israelbii lɛ yɔɔ lɛ, enu ni amɛmiilá. Ena ni amɛmiijo ni amɛmiikoto tsinabi lɛ. Mose mli fu waa. Ekɛ tɛi tɛtrɛbii enyɔ lɛ tswia shi ni amɛjwara. Ekpãtã amaga lɛ hiɛ amrɔ nɔŋŋ. Kɛkɛ ni ebi Aaron akɛ: ‘Te fee tɛŋŋ ni mɛi lɛ laka bo ni ofee nɔ fɔŋ nɛɛ?’ Aaron kɛɛ lɛ akɛ: ‘Omli akafu. Ole bɔ ni mɛi nɛɛ yɔɔ. Amɛkɛɛ amɛmiitao nyɔŋmɔ, no hewɔ lɛ, mikɛ shika tsuru ni amɛhã mi lɛ wo la mli ni etsɔ tsinabi nɛɛ!’ Kulɛ, esaaa akɛ Aaron boɔ maŋbii lɛ toi. Mose ku esɛɛ etee gɔŋ lɛ nɔ ni eyakpa Yehowa fai ni ekɛ Israelbii lɛ ahe eshai lɛ ake amɛ.

Yehowa kɛ mɛi fɛɛ ni bo lɛ toi lɛ ahe eshai ke amɛ. Ani oona nɔ hewɔ ni kulɛ esa akɛ Israelbii lɛ ahã Mose aya nɔ anyiɛ amɛhiɛ lɛ?

“Be fɛɛ be ni obaawo Nyɔŋmɔ shi lɛ, kaahã esɛɛ miitsɛ ni oye nɔ, ejaakɛ enáaa kwashiai ahe miishɛɛ. Shi ni owo lɛ, ye nɔ.”​—Jajelɔ 5:4