Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 17

Mose Kpɛ Eyiŋ Akɛ Ebaajá Yehowa

Mose Kpɛ Eyiŋ Akɛ Ebaajá Yehowa

Be ni Yakob kɛ eweku lɛ tee Ejipt lɛ, abɔi amɛ tsɛmɔ akɛ Israelbii. Yɛ Yakob kɛ Yosef gbele sɛɛ lɛ, aná Farao hee yɛ Ejipt. Farao nɛɛ she gbeyei akɛ Israelbii lɛ ahe baawa fe Ejiptbii lɛ. No hewɔ lɛ, ehã Israelbii lɛ batsɔmɔ nyɔji. Enyɛ amɛnɔ ni amɛfolɔ brikii ni amɛtsu nii waa yɛ Ejiptbii lɛ aŋmɔji amli. Shi loloolo lɛ, Israelbii lɛ tee nɔ amɛshwere, ni amɛyi fa fe tsutsu lɛ po. Sane lɛ eyaŋɔɔɔ Farao naa. No hewɔ lɛ ewie akɛ, kɛ́ Israelnyo ko fɔ binuu lɛ, agbe gbekɛ lɛ. Israelbii lɛ atsui fã waa!

Nɛkɛ be nɛɛ mli ni Israel yoo ko ni atsɛɔ lɛ Yokebed lɛ fɔ binuu fɛfɛo ko. Yokebed sumɔɔɔ ni agbeɔ ebinuu lɛ. No hewɔ lɛ, ekɛ lɛ wo kɛntɛŋ mli ni ekɛ lɛ yatee yɛ jwɛi ko ni yɔɔ Nilo Faa lɛ naa lɛ ateŋ. Gbekɛ lɛ nyɛmi yoo ni atsɛɔ lɛ Miriam lɛ yadamɔ he ko koni ekwɛ nɔ ni baaba, shi eyaaa shɔŋŋ.

Farao biyoo lɛ ba koni ebaju ehe yɛ faa lɛ mli ni ena kɛntɛŋ lɛ. Be ni eyaakwɛ mli lɛ, naa  abifao ko kã mli ni eefo. Enii fee lɛ mɔbɔ. Miriam bi lɛ akɛ: ‘Ani miyatsɛ yoo ko ni baanyɛ akwɛ gbekɛ lɛ ni ehã lɛ fufɔ mihã bo?’ Farao biyoo lɛ kpɛlɛ nɔ. No hewɔ lɛ, Miriam yatsɛ lɛ diɛŋtsɛ emami Yokebed kɛba. Farao biyoo lɛ kɛɛ Yokebed akɛ: ‘Okɛ gbekɛ nɛɛ aya, ni oyahã lɛ fufɔ ohã mi, ni mawo bo nyɔmɔ.’

Gbekɛ lɛ bada, ni Yokebed kɛ lɛ yahã Farao biyoo lɛ. Farao biyoo lɛ wo gbekɛ lɛ Mose, ni ekwɛ lɛ tamɔ lɛ diɛŋtsɛ ebi. Mose batsɔ odehe, ni nɔ fɛɛ nɔ ni etaoɔ lɛ, ewaaa akɛ ebaaná. Shi ehiɛ kpaaa Yehowa nɔ. Ehã ehi ejwɛŋmɔŋ akɛ, Israelnyo ji lɛ, shi jeee Ejiptnyo. Ekpɛ eyiŋ akɛ ebaasɔmɔ Yehowa.

Be ni Mose ye afii 40 lɛ, ekpɛ eyiŋ akɛ ebaaye ebua emaŋbii lɛ. Gbi ko lɛ, Mose yana ni Ejiptnyo ko miiyi Israelnyo ko. Mose kɛ nɔ ko tswa Ejiptnyo lɛ ni egbe lɛ. Mose kɛ shia tsĩ gbonyo lɛ nɔ. Be ni ayakɛɛ Farao nɔ ni Mose efee lɛ, ekpɛ eyiŋ akɛ ebaahã agbe lɛ. Enɛ hewɔ lɛ, Mose jo foi ni eyahi Midian shikpɔŋ lɛ nɔ. Yehowa kwɛ Mose yɛ jɛmɛ.

“Hemɔkɛyeli naa be ni Mose da lɛ, ekpoo akɛ ebaahã atsɛ lɛ Farao biyoo lɛ bi, ni ehala akɛ afee lɛ kɛ Nyɔŋmɔ maŋ lɛ niseniianii.”​—Hebribii 11:24, 25