Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 16

Hiob Sane Lɛ

Hiob Sane Lɛ

Be ko lɛ, nuu ko hi maŋ ko ni atsɛɔ lɛ Uz lɛ mli, ni egbɛ́i ji Hiob. Hiob jáa Yehowa, eyɛ shika pii, ni efɔ bii babaoo. Emli hi, ni eyeɔ ebuaa ohiafoi, yei ni amɛwumɛi egboi, kɛ gbekɛbii ni bɛ fɔlɔi. Shi mɛi ni feɔ ekpakpa tamɔ Hiob lɛ po kɛ naagbai kpeɔ, ni nakai eba lɛ yɛ Hiob sane lɛ mli.

Asomoaŋ, Satan Abonsam miikwɛ Hiob, shi Hiob leee. Yehowa kɛɛ Satan akɛ: ‘Ani okɛ ojwɛŋmɔ ema mitsulɔ Hiob nɔ? Mɔ ko mɔ ko bɛ ni tamɔ lɛ yɛ shikpɔŋ lɛ nɔ. Eboɔ mi toi ni efeɔ nɔ ni ja.’ Satan here nɔ akɛ: ‘Mi hu mina akɛ Hiob boɔ bo toi, shi efeee mi naakpɛɛ. Obu ehe ni ojɔɔ lɛ. Ohã lɛ shikpɔŋ kɛ kooloi. Kɛ́ ohe nibii nɛɛ fɛɛ yɛ edɛŋ lɛ, ebaakpa bo jamɔ.’ Shi Yehowa kɛɛ Satan akɛ: ‘Obaanyɛ oyaka Hiob. Shi kwɛmɔ ni okagbe lɛ.’ Mɛni hewɔ Yehowa hã Satan hegbɛ koni eka Hiob? Efee nakai ejaakɛ ele akɛ Hiob baaya nɔ ejá lɛ.

No hewɔ lɛ, Satan bɔi Hiob kaa. Klɛŋklɛŋ lɛ, ehã mɛi komɛi ni atsɛɔ amɛ Shebabii lɛ baju Hiob tsinai kɛ eteji lɛ, ni amɛgbe mɛi ni kwɛɔ tsinai lɛ kɛ teji lɛ. No sɛɛ lɛ, la basha Hiob toi lɛ fɛɛ, ni esha tookwɛlɔi lɛ hu. Mɛi komɛi ni atsɛɔ amɛ Kaldeabii lɛ hu baju Hiob afukpɔŋɔi lɛ, ni amɛgbe mɛi ni kwɛɔ afukpɔŋɔi lɛ. Kɛkɛ ni abagba Hiob sane ko ni yɔɔ dɔlɛ waa. Akɛɛ lɛ akɛ shĩa ni ebii lɛ yabua amɛhe naa yɛ mli koni amɛye nii ni amɛná miishɛɛ lɛ ekumɔ eshwie amɛnɔ ni amɛ fɛɛ amɛgboi. Sane nɛɛ dɔ Hiob waa diɛŋtsɛ. Fɛɛ sɛɛ lɛ, etee nɔ ejá Yehowa.

 Shi Satan kɛwaaa jɛmɛ. Efee Hiob nɔ ko ni baahã epiŋ waa. Ehã Hiob he fɛɛ fee fala, ni Hiob he fɛɛ bɔi ehe waa. Hiob leee nɔ hewɔ ni nibii gbohii nɛɛ fɛɛ baa enɔ. Kɛ̃lɛ, etee nɔ ejá Yehowa. Nyɔŋmɔ na bɔ ni Hiob yeɔ lɛ anɔkwa lɛ, ni emii shɛ ehe waa.

Kɛkɛ ni Satan tsu hii etɛ Hiob ŋɔɔ koni amɛyaka lɛ. Amɛkɛɛ lɛ akɛ: ‘Ofee esha ni okɛtee. Nyɔŋmɔ miigbala otoi.’ Hiob kɛɛ amɛ akɛ: ‘Mifeko esha ko.’ Shi efee lɛ akɛ Yehowa ji mɔ ni hãa etɔɔ lɛ lɛ, ni ewie akɛ nɔ ni Nyɔŋmɔ feɔ lɛ lɛ ehiii.

No mli lɛ, oblanyo ko efee diŋŋ eebo nɔ ni Hiob kɛ hii etɛ lɛ wieɔ lɛ toi. Ekɛɛ amɛ akɛ: ‘Nɔ ni nyɛ fɛɛ nyɛwie lɛ ejaaa. Yehowa le nii kwraa fe wɔ. Efeŋ nɔ fɔŋ kɔkɔɔkɔ. Enaa nɔ fɛɛ nɔ, ni eyeɔ ebuaa mɛi ni yɔɔ naagbai lɛ.’

Kɛkɛ ni Yehowa kɛ Hiob wie. Ekɛɛ lɛ akɛ: ‘Be ni mibɔ ŋwɛi kɛ shikpɔŋ lɛ, nɛgbɛ oyɔɔ? Mɛni hewɔ okɛɔ akɛ nɔ ni mifeɔ lɛ ehiii lɛ? Owieɔ, shi oleee nɔ hewɔ ni nibii yaa lɛ bɔ ni amɛyaa lɛ lɛ.’ Hiob naakɛ etɔ̃, ni ewie akɛ: ‘Nibii ni miwie lɛ ejaaa. Minu ohe, shi amrɔ nɛɛ, mile bo jogbaŋŋ. Onyɛɔ nii fɛɛ ofeɔ. Miikpa bo fai, miwieee ni ahi.’

Be ni Hiob kai lɛ ba naagbee lɛ, Yehowa hã Hiob ná hewalɛ ekoŋŋ, ni ehã lɛ shika kɛ nibii babaoo fe tsutsu lɛ po. Hiob ná miishɛɛ waa, ni ehi shi afii pii dani egbo. Yehowa jɔɔ Hiob ejaakɛ Hiob bo lɛ toi be ni ekɛ naagbai kpeɔ lɛ po. Ani obaakase Hiob ni oya nɔ ojá Yehowa ekɔɔɔ he eko naagbai ni okɛbaakpe?

“Nyɛnu Hiob shifimɔ lɛ he, ni nyɛna bɔ ni Yehowa hã enaagbee fee ehã.”​—Yakobo 5:11