Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 21

Haomɔ Ni Ji Nyɔŋma Lɛ

Haomɔ Ni Ji Nyɔŋma Lɛ

Mose kɛɛ Farao akɛ ebaŋ ehiɛ dɔŋŋ. Shi dani ebaashi lɛ, ekɛɛ Farao akɛ: ‘Nyɔɔŋteŋ lɛ, kromɔbii fɛɛ ni yɔɔ Ejipt lɛ baagboi, kɛjɛ Farao binuu lɛ nɔ kɛyashi nyɔji lɛ abihii lɛ anɔ.’

Yehowa kɛɛ Israelbii lɛ akɛ amɛye niyenii krɛdɛɛ ko. Ekɛɛ amɛ akɛ: ‘Nyɛgbea gwantɛŋnuu loo abotianuu ni eye afi, ni nyɛkɛ elá lɛ eko akpa nyɛshinaatsei lɛ ahe. Nyɛshãa loo lɛ, ni nyɛkɛ blodo ni ashikishaŋ-sha bɛ mli aye. Nyɛwoa nyɛtadei kɛ nyɛtokotai, ni nyɛfea klalo akɛ nyɛbaashi, ejaakɛ gbɛkɛ nɛɛ, abaaŋmɛɛ nyɛhe.’ Feemɔ bɔ ni Israelbii lɛ amii baashɛ amɛhe amɛhã lɛ he mfoniri okwɛ!

Nyɔɔŋteŋ lɛ, Yehowa bɔfo lɛ tee shĩa fɛɛ shĩa ni yɔɔ Ejipt. Kromɔbii ni yɔɔ shĩai ni akɛ lá kpako amɛshinaatsei lɛ ahe lɛ fɛɛ gboi. Shi ŋwɛibɔfo lɛ ho shĩai ni akɛ lá ekpa amɛshinaatsei lɛ ahe lɛ ahe. Ejiptbii lɛ fɛɛ akromɔbii gboi, shikatsɛmɛi kɛ ohiafoi fɛɛ. Shi Israelbii lɛ ateŋ mɔ kome folo po kromɔbi gbooo.

Farao binuu lɛ hu gbo. Agbɛnɛ, Farao na akɛ esa akɛ ehã Israelbii lɛ aya. No hewɔ lɛ, etsu ni ayatsɛ Mose kɛ Aaron kɛba amrɔ nɔŋŋ, ni ekɛɛ amɛ akɛ: ‘Nyɛtea shi. Nyɛshia biɛ. Nyɛyaa nyɛyajáa nyɛ-Nyɔŋmɔ lɛ. Nyɛkɛ nyɛkooloi lɛ fɛɛ ayaa!’

 No hewɔ lɛ, Israelbii lɛ fɛɛ shi Ejipt nakai nyɔɔŋ lɛ mli nɔŋŋ, be ni nyɔɔŋtsere lɛ eye emuu. Amɛyi fa waa; hii 600,000, kɛ yei kɛ gbekɛbii pii. Ato amɛhe gbɛjianɔ awo wekui kɛ akutsei amli. Mɛi krokomɛi hu ni jeee Israelbii fata amɛhe kɛtee koni amɛ hu amɛyajá Yehowa. Israelbii lɛ eye amɛhe agbɛnɛ!

Amɛye niyenii krɛdɛɛ nɛɛ afi fɛɛ afi akɛ gbi jurɔ, koni amɛkɛkai gbɛ nɔ ni Yehowa tsɔ ekpɔ̃ amɛ lɛ. Atsɛɔ gbi jurɔ nɛɛ Hehoo lɛ.

“Nɔ tuuntu hewɔ ni mihã otee nɔ ohi shi lɛ nɛ: koni matsɔ onɔ majie mihewalɛ lɛ kpo matsɔɔ, koni ajaje migbɛ́i lɛ atsɔɔ yɛ shikpɔŋ lɛ nɔ fɛɛ.”​—Romabii 9:17