Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 20

Haomɔi Ekpaa Krokomɛi

Haomɔi Ekpaa Krokomɛi

Nyɔŋmɔ tsu Mose kɛ Aaron kɛtee Farao ŋɔɔ ni amɛyakɛɛ lɛ akɛ: ‘Kɛ́ ohãaa miwebii lɛ aya lɛ, mahã filikilɔi bibii ni kɔ̃ɔ mɔ abaha shikpɔŋ lɛ nɔ.’ No hewɔ lɛ, filikilɔi bibii nɛɛ ba Ejiptbii shikatsɛmɛi kɛ ohiafoi fɛɛ ashĩai amli. Amɛbaha Ejipt shikpɔŋ lɛ nɔ fɛɛ, ja Goshen, he ni Israelbii lɛ yɔɔ lɛ pɛ. Haomɔ nɛɛ kɛ haomɔi krokomɛi ni eshwɛ lɛ ba Ejiptbii lɛ pɛ anɔ. Kɛkɛ ni Farao kɛɛ Mose akɛ: ‘Kpa Yehowa fai ni ehã filikilɔi nɛɛ aya. Mahã Israelbii lɛ aya.’ Shi be ni Yehowa hã filikilɔi lɛ tee lɛ, Farao tsake ejwɛŋmɔ. Mɛni po baahã Farao abo Yehowa toi?

Yehowa wie akɛ: ‘Kɛ́ Farao hãaa miwebii lɛ aya lɛ, mahã hela amɔmɔ Ejiptbii lɛ akooloi lɛ fɛɛ, ni amɛbaagboi.’ Enɔ jetsɛremɔ lɛ, kooloi lɛ fɛɛ bɔi gboimɔ. Shi Israelbii lɛ akooloi lɛ eko eko gbooo. Fɛɛ sɛɛ lɛ, Farao tswa efai shi akɛ ehãŋ Israelbii lɛ aya.

No hewɔ lɛ, Yehowa hã Mose tee Farao ŋɔɔ ekoŋŋ, ni eyafɔ̃ lamulu ewo kɔɔyɔɔ lɛ mli yɛ ehiɛ. Lamulu lɛ tsɔ mulu yɛ kɔɔyɔɔ lɛ mli. Mulu nɛɛ bashwie Ejiptbii lɛ kɛ amɛkooloi lɛ ahe, ni ehã asanei ni waa mɔ he waa tsɛ̃rɛ amɛ fɛɛ. Shi enɛ po hãaa Farao atsake ejwɛŋmɔ ni ehã Israelbii lɛ aya.

Yehowa tsu Mose kɛtee Farao ŋɔɔ ekoŋŋ, ni eyakɛɛ lɛ akɛ: ‘Ohãaa miwebii lɛ aya lolo? Wɔ́ lɛ, mahã nyɔŋmɔŋtɛi anɛ yɛ shikpɔŋ lɛ nɔ.’ Enɔ jetsɛremɔ lɛ, Yehowa hã nyɔŋmɔŋtɛi nɛ, ŋwɛi  shimɔ, ni la ba shikpɔŋ lɛ nɔ fɛɛ. Eko bako nakai dã yɛ Ejipt. Ekpãtã tsei kɛ ŋmɔshi nibii fɛɛ ahiɛ. Goshen shikpɔŋ lɛ nɔ pɛ haomɔ nɛɛ eko baaa yɛ. Farao kɛɛ Mose akɛ: ‘Ofainɛ, kɛɛmɔ Yehowa ni ehã haomɔ nɛɛ sɛɛ afo! Maŋmɛɛ Israelbii lɛ ahe ni amɛya.’ Shi be ni nyɔŋmɔŋtɛi lɛ kɛ nugbɔ lɛ kpa lɛ, Farao tsake ejwɛŋmɔ ekoŋŋ.

Kɛkɛ ni Mose kɛɛ lɛ akɛ: ‘Agbɛnɛ, baalabii baaha shikpɔŋ lɛ nɔ fɛɛ, ni amɛbaaye tsei fɛɛ ni nyɔŋmɔŋtɛi lɛ fiteee lɛ.’ Baalabii akpekpei abɔ ba shikpɔŋ lɛ nɔ, ni amɛbaye nɔ fɛɛ nɔ ni nyɔŋmɔŋtɛi lɛ fiteee lɛ. No hewɔ lɛ, Farao kɛɛ Mose akɛ: ‘Kpa Yehowa fai ni ehã baalabii lɛ aje shikpɔŋ lɛ nɔ.’ Yehowa bo lɛ toi, ni ehã baalabii lɛ shi shikpɔŋ lɛ nɔ. Shi loloolo lɛ, Farao hãaa Israelbii lɛ aya.

Yehowa kɛɛ Mose akɛ: ‘Kpã onine mli kɛya ŋwɛigbɛ.’ Be ni efee nakai lɛ, duŋ wo yɛ shikpɔŋ lɛ nɔ, bɔ ni kɛ́ oyɛ mli lɛ, onaaa onine po. Gbii etɛ sɔŋŋ ni Ejiptbii lɛ enaaa mɔ ko mɔ ko loo nɔ ko nɔ ko. He ni Israelbii lɛ yɔɔ lɛ pɛ ni duŋ wooo yɛ.

Farao kɛɛ Mose akɛ: ‘Bo kɛ owebii lɛ, nyɛyaa! Shi nyɛkɛ nyɛkooloi lɛ akayaa.’ Mose kɛɛ lɛ akɛ: ‘Esa akɛ wɔkɛ wɔkooloi lɛ aya koni wɔkɛyashã afɔle wɔhã wɔ-Nyɔŋmɔ lɛ.’ Enɛ hã Farao mli fu waa, ni ebolɔ ewo lɛ akɛ: ‘Jee mihiɛ ni oya! Kɛ́ oba mihiɛ ekoŋŋ lɛ, magbe bo.’

“Ni nyɛbaasaa nyɛna srɔto ni yɔɔ jalɔ kɛ mɔ fɔŋ teŋ, kɛ mɔ ni sɔmɔɔ Nyɔŋmɔ kɛ mɔ ni sɔmɔɔɔ lɛ lɛ teŋ.”​—Maleaki 3:18