Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 19

Klɛŋklɛŋ Haomɔi Etɛ Lɛ

Klɛŋklɛŋ Haomɔi Etɛ Lɛ

Ejiptbii lɛ hã Israelbii lɛ tsu nii waa akɛ nyɔji. No hewɔ lɛ, Yehowa tsu Mose kɛ Aaron ni amɛyakɛɛ Farao akɛ: ‘Hã miwebii lɛ aya, koni amɛyajá mi yɛ ŋa lɛ nɔ.’ Shi be ni amɛyakɛɛ Farao lɛ, ekɛ henɔwomɔ kɛɛ amɛ akɛ: ‘Namɔ ji Yehowa ni esa akɛ mabo lɛ toi? Mihãaa Israelbii lɛ aya.’ Kɛkɛ ni Farao hã amɛtsu nii waa fe tsutsu lɛ po. Enɛ hewɔ lɛ, Yehowa gbala etoi. Ani ole nɔ ni Yehowa fee? Ekɛ Haomɔi Nyɔŋma lɛ ba Ejipt shikpɔŋ lɛ nɔ. Yehowa kɛɛ Mose akɛ: ‘Farao booo mi toi. Wɔ́ leebi lɛ, ebaaya Nilo Faa lɛ naa. Yaa jɛmɛ ni oyakɛɛ lɛ akɛ, akɛni ehãaa miwebii lɛ aya hewɔ lɛ, Nilo Faa lɛ baatsɔ lá.’ Mose bo Yehowa toi ni ekɛ Aaron tee Farao ŋɔɔ. Aaron kɛ etso lɛ tswa faa lɛ, ni emli nu lɛ fɛɛ tsɔ lá. No mli lɛ, Farao damɔ shi eekwɛ. Faa lɛ fɛɛ bɔi fũ jee, loi ni yɔɔ mli lɛ gboi, ni anyɛɛɛ anu emli nu lɛ dɔŋŋ. Shi loloolo lɛ, Farao hãaa Israelbii lɛ aya.

 Gbii kpawo sɛɛ lɛ, Yehowa tsu Mose kɛtee Farao ŋɔɔ ekoŋŋ ni eyakɛɛ lɛ akɛ: ‘Kɛ́ ohãaa miwebii lɛ aya lɛ, mahã kɔkɔdenei aba Ejipt shikpɔŋ lɛ nɔ fɛɛ.’ Aaron wó etso lɛ nɔ, ni kɔkɔdenei ba shikpɔŋ lɛ nɔ fɛɛ. Kɔkɔdenei lɛ ba he fɛɛ he; mɛi ashĩai amli, amɛsaatsei anɔ, kɛ amɛtsɛnsii amli fɛɛ! Farao kɛɛ Mose akɛ ekpa Yehowa fai koni haomɔ nɛɛ sɛɛ afo. Farao wo shi akɛ ebaahã Israelbii lɛ aya. No hewɔ lɛ, Yehowa hã haomɔ lɛ sɛɛ fo. Ejiptbii lɛ bua kɔkɔdenei ni egboi lɛ anaa kuikui. Shikpɔŋ lɛ nɔ fɛɛ je fũ waa. Shi fɛɛ sɛɛ lɛ, Farao hãaa Israelbii lɛ aya.

No hewɔ lɛ, Yehowa kɛɛ Mose akɛ: ‘Hã Aaron kɛ etso lɛ atswa shikpɔŋ koni mulu lɛ atsɔ tɔŋtɔŋi.’ Be ni Aaron fee nakai nɔŋŋ ni tɔŋtɔŋi ba shikpɔŋ lɛ nɔ fɛɛ. Ejiptbii lɛ ekomɛi po kɛɛ Farao akɛ: ‘Haomɔ nɛɛ jɛ Nyɔŋmɔ ŋɔɔ.’ Shi loloolo lɛ, Farao hãaa Israelbii lɛ aya.

“Mahã amɛle mihewalɛ kɛ minyɛmɔ yɛ nɛkɛ be nɛɛ mli, ni amɛbaaná amɛle akɛ migbɛ́i ji Yehowa.”​—Yeremia 16:21