Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 12

Yakob Ná Gboshinii Lɛ

Yakob Ná Gboshinii Lɛ

Be ni Isak ye afii 40 lɛ, ekɛ Rebeka hi shi. Isak sumɔɔ eŋa lɛ waa. Sɛɛ mli lɛ, amɛfɔ bihii enyɔ; haaji ji amɛ.

Atsɛɔ onukpa tsɛ lɛ akɛ Esau, kɛ bibioo tsɛ lɛ, Yakob. Esau sumɔɔ agbonaa shwɛmɔ, ni ele gbɔbimɔ hu. Shi Yakob fɔɔ shĩa hilɛ.

Nakai beiaŋ lɛ, kɛ́ mɔ ko gbo lɛ, akɛ eshikpɔŋ kɛ eshika lɛ pii hãa ebinuu nukpa lɛ, ni atsɛɔ enɛ gboshinii. Yɛ Isak weku lɛ mli lɛ, mɔ ni náa gboshinii lɛ fata mɛi ni Yehowa kɛbaatsu nii koni shiwoi ni ekɛhã Abraham lɛ aba mli lɛ ahe. Esau kɛ enifeemɔ tsɔɔ akɛ Yehowa shiwoi lɛ ahe ehiaaa lɛ, shi Yakob kɛ shiwoi nɛɛ shwɛɛɛ kwraa.

Gbi ko lɛ, Esau kɛ gbi muu fɛɛ yagbɔbi kooloi. Be ni eba lɛ, etɔ lɛ. No mli lɛ, Yakob miihoo niyenii ko ni ŋɔɔ waa. Esau nu niyenii lɛ ŋma lɛ, ni ekɛɛ Yakob akɛ: ‘Hɔmɔ miiye mi waa! Hã mi oflɔ tsuru nɛɛ eko maye!’ Yakob kɛɛ lɛ akɛ: ‘Mahã bo, shi klɛŋklɛŋ lɛ, wo mi shi akɛ okɛ ogboshinii lɛ baahã mi.’ Esau kɛɛ lɛ akɛ: ‘Migboshinii lɛ he ehiaaa mi! Obaanyɛ okɔ. Miitao niyenii maye.’ Kɛ́ okwɛ lɛ, ani jwɛŋmɔ yɛ nɔ ni Esau fee lɛ mli? Dabi, jwɛŋmɔ bɛ mli kwraa. Esau kɛ egboshinii ni jara wa waa lɛ yatsake niyenii tsɛnsi kome.

 Be ni Isak gbɔ waa lɛ, be bashɛ ni ebaajɔɔ ebinuu nukpa lɛ. Shi Rebeka ye ebua ebinuu fioo Yakob, koni lɛ moŋ ená jɔɔmɔ lɛ. Be ni Esau na nakai lɛ, emli fu waa, ni ekpɛ eyiŋ akɛ ebaagbe enyɛmi nuu lɛ. Akɛni Isak kɛ Rebeka miitao ni amɛbu Yakob he hewɔ lɛ, amɛkɛɛ lɛ akɛ: ‘Joo foi kɛya omami nyɛmi nuu Laban ŋɔɔ, kɛyashi Esau tsui baaba shi.’ Yakob bo efɔlɔi lɛ toi, ni ejo foi.

“Mɛɛ nɔ kpakpa gbɔmɔ baaná kɛ́ enine shɛ jeŋ muu lɛ fɛɛ nɔ ni ewala je edɛŋ? Anɔkwa, mɛni gbɔmɔ kɛbaahã yɛ ewala najiaŋ?”​—Marko 8:36, 37