Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 3

Adam Kɛ Hawa Booo Nyɔŋmɔ Toi

Adam Kɛ Hawa Booo Nyɔŋmɔ Toi

Be ko be ni Adam bɛ Hawa masɛi lɛ, onufu ko kɛ Hawa bawie. Ebi lɛ akɛ: ‘Ani eji anɔkwale akɛ Nyɔŋmɔ kɛɛ nyɛkaye tsei lɛ eko eko nɔ yibii?’ Hawa here nɔ akɛ: ‘Wɔbaanyɛ wɔye tsei lɛ eko fɛɛ eko nɔ yibii, ja ekome pɛ. Kɛ́ wɔye nakai tso lɛ nɔ yibii lɛ eko lɛ, wɔbaagboi.’ Onufu lɛ kɛɛ lɛ akɛ: ‘Nyɛgboiŋ. Moŋ lɛ, nyɛbaatsɔmɔ tamɔ Nyɔŋmɔ.’ Ani nɔ ni onufu lɛ wie lɛ ji anɔkwale? Dabi, amale ni. Shi Hawa he eye. Hawa tee nɔ ekwɛ tso lɛ nɔ yibii lɛ aahu ni eba etsine. No hewɔ lɛ, etse eko ni eye ni ehã Adam hu eko. Adam le waa akɛ kɛ́ amɛgbo Yehowa nɔ toi lɛ, amɛbaagboi. Shi fɛɛ sɛɛ lɛ, lɛ hu eye.

Sɛɛ mli lɛ, Yehowa kɛ Adam kɛ Hawa wie nakai gbi lɛ nɔŋŋ. Ebi amɛ nɔ hewɔ ni amɛbooo lɛ toi lɛ. Hawa kɛɛ onufu lɛ ni fee, ni Adam hu kɛɛ Hawa ni fee. Yehowa shwie Adam kɛ Hawa kɛje abɔɔ lɛ mli yɛ amɛtoigbele lɛ hewɔ. No sɛɛ lɛ, ekɛ ŋwɛibɔfoi kɛ klante ni la yɔɔ he wo he ni atsɔɔ kɛboteɔ abɔɔ lɛ mli lɛ, bɔ ni afee ni amɛkaku amɛsɛɛ kɛbote mli.

Yehowa wie akɛ ebaagbala mɔ ni laka Hawa lɛ hu toi. Jeee onufu lɛ diɛŋtsɛ kɛ Hawa wie lɛ. Yehowa ebɔɔɔ onufui ni amɛwie. Ŋwɛibɔfo fɔŋ ko ji mɔ ni hã onufu lɛ wie lɛ. Efee nakai koni ekɛlaka Hawa. Atsɛɔ nakai ŋwɛibɔfo lɛ Satan Abonsam. Wɔsɛɛ lɛ, Yehowa baakpãtã Satan hiɛ. Kɛ́ efee nakai lɛ, Satan nyɛŋ elaka mɛi ni amɛfee nibii fɔji dɔŋŋ.

“Abonsam lɛ . . . gbɔmɔgbelɔ ji lɛ kɛjɛ shishijee lɛ, ni edamɔɔɔ shi shiŋŋ yɛ anɔkwale lɛ mli, ejaakɛ anɔkwale bɛ emli.”​—Yohane 8:44, shishigbɛ niŋmaa