Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 96

Yesu Hala Saul

Yesu Hala Saul

Afɔ Saul yɛ Tarso, ni Romanyo ji lɛ. Ebatsɔ Farisifonyo, ni ele Yudafoi lɛ a-Mla lɛ jogbaŋŋ. Shi esumɔɔɔ Kristofoi asane kwraa. Eyaa Kristofoi hii kɛ yei fɛɛ ashĩai amli ni eyamɔmɔɔ amɛ ni ewoɔ amɛ tsuŋ. Be ni mɛi komɛi amli fu kaselɔ ko ni atsɛɔ lɛ Stefano lɛ waa ni amɛtswia lɛ tɛi kɛyashi egbo lɛ, edamɔ jɛmɛ ekwɛ amɛ.

Shi enɛ po faaa hãaa Saul. Eshwe akɛ eshi Yerusalem ni eya maji krokomɛi hu anɔ eyamɔmɔ Kristofoi lɛ. No hewɔ lɛ, eyabi osɔfonukpa lɛ gbɛ koni ahã eya Damasko ni eyamɔmɔ Kristofoi lɛ yɛ jɛmɛ. Be ni eshwɛ fioo ni Saul baashɛ Damasko lɛ, la ko ni naa wa kpɛ kɛbɔle lɛ trukaa, ni egbee shi. Enu ni gbee ko miibi lɛ akɛ: ‘Saul, mɛni hewɔ ofeɔ mi nibii gbohii nɛkɛ?’ Saul bi akɛ: ‘Bo namɔ okɛ mi wieɔ lɛ?’ Gbee lɛ hã hetoo akɛ: ‘Miji Yesu. Botemɔ Damasko maŋ lɛ mli, ni abaakɛɛ bo nɔ ni esa akɛ ofee.’ No mli lɛ, la ni kpɛ waa lɛ ehã Saul eshwila trukaa. No hewɔ lɛ, mɛi mɔ enine mli ni amɛkɛ lɛ tee maŋ lɛ mli.

No mli lɛ, Kristofonyo anɔkwafo ko yɛ Damasko ni atsɛɔ lɛ Anania. Yesu kɛɛ Anania yɛ ninaa mli akɛ: ‘Yaa gbɛjegbɛ ni atsɛɔ lɛ Trɔmɔɔ lɛ nɔ, ni oyabi nuu ko ni atsɛɔ lɛ Saul lɛ shi yɛ Yuda shĩa lɛ mli.’ Shi Anania kɛɛ akɛ: ‘Nuŋtsɔ, mile nuu nɛɛ jogbaŋŋ! Eemɔmɔ okaselɔi lɛ ni eewo amɛ tsuŋ!’ Shi Yesu kɛɛ lɛ akɛ: ‘Bo lɛ, yaa eŋɔɔ. Mihala Saul koni eyashiɛ sane kpakpa lɛ yɛ maji babaoo anɔ.’

No hewɔ lɛ, Anania tee ni eyana Saul ni ekɛɛ lɛ akɛ: ‘Minyɛmi Saul, Yesu etsu mi koni mibahã ona nii ekoŋŋ.’ Amrɔ nɔŋŋ lɛ, Saul hiŋmɛii gbele. Ekase Yesu he nii ni ebatsɔ esɛɛnyiɛlɔ. Yɛ ebaptisimɔ lɛ sɛɛ lɛ, Saul kɛ enanemɛi Kristofoi lɛ bɔi  shiɛmɔ yɛ kpeehei lɛ. Yudafoi lɛ anaa kpɛ amɛhe waa be ni amɛna ni Saul miigba mɛi Yesu he sane lɛ. Amɛbi akɛ: ‘Ani jeee nuu nɛɛ nɔŋŋ be ko ni eho lɛ emɔmɔɔ Yesu kaselɔi lɛ?’

Saul kɛ afii etɛ shiɛ yɛ Damasko. Yudafoi lɛ amli fu lɛ waa, ni amɛkpɛ amɛyiŋ akɛ amɛbaagbe lɛ. Shi nyɛmimɛi lɛ ná amɛle. No hewɔ lɛ, amɛye amɛbua Saul ni ejo foi. Amɛkɛ lɛ wo kɛntɛŋ mli, ni amɛkɛ lɛ tsɔ fɔlɔ ko ni yɔɔ maŋ lɛ gbogbo lɛ mli lɛ mli kɛyi shi.

Be ni Saul tee Yerusalem lɛ, ebɔ mɔdɛŋ akɛ ekɛ nyɛmimɛi lɛ baabɔ. Shi amɛshe lɛ gbeyei. No hewɔ lɛ, kaselɔ ko ni mli hi ni atsɛɔ lɛ Barnaba lɛ kɛ Saul tee bɔfoi lɛ aŋɔɔ ni ehã amɛnu shishi akɛ Saul etsake. Enɛ sɛɛ lɛ, Saul nyɛ ekɛ asafo ni yɔɔ Yerusalem lɛ fee ekome kɛshiɛ sane kpakpa lɛ kɛ ekãa. Sɛɛ mli lɛ, abale lɛ akɛ Paulo.

“Kristo Yesu ba je lɛ mli koni ebahere eshafeelɔi ayiwala. Miji mɛi nɛɛ ateŋ mɔ ni ehiii fe fɛɛ.”​—1 Timoteo 1:15