Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 94

Kaselɔi Lɛ Ná Mumɔ Krɔŋkrɔŋ Lɛ

Kaselɔi Lɛ Ná Mumɔ Krɔŋkrɔŋ Lɛ

Be ni Yesu eku esɛɛ kɛtee ŋwɛi lɛ sɛɛ gbii nyɔŋma lɛ, mumɔ krɔŋkrɔŋ lɛ ba kaselɔi lɛ anɔ. Nakai gbi lɛ, mɛi ejɛ hei srɔtoi babaoo amɛba Yerusalem koni amɛbaye afi 33 Ŋ.B. Pentekoste gbi jurɔ lɛ. Yesu kaselɔi aaafee 120 kpe yɛ shĩa ko ŋwɛi asa lɛ nɔ. Trukaa lɛ, nɔ ko ni yɔɔ naakpɛɛ ba. Nɔ ko tamɔ la bamamɔ kaselɔi lɛ ateŋ mɔ fɛɛ mɔ yiteŋ, ni amɛ fɛɛ amɛbɔi wiemɔi srɔtoisrɔtoi wiemɔ. Anu gbɛɛmɔ ko ni tamɔ kɔɔyɔɔ ni miitswa waa yɛ shĩa lɛ mli fɛɛ.

Gbɔi ni ejɛ maji krokomɛi anɔ amɛba Yerusalem lɛ nu gbɛɛmɔ lɛ. Amɛjo foi kɛtee shĩa lɛ koni amɛyakwɛ nɔ ni yaa nɔ. Amɛnaa kpɛ amɛhe akɛ kaselɔi lɛ miiwie wiemɔi srɔtoisrɔtoi. Amɛkɛɛ akɛ: ‘Mɛi nɛɛ jɛ Galilea. No hewɔ lɛ, te fee tɛŋŋ ni amɛnyɛɔ amɛwieɔ wɔwiemɔi lɛ?’

Kɛkɛ ni Petro kɛ bɔfoi krokomɛi lɛ te shi amɛdamɔ shi yɛ mɛi ni ebabua shi lɛ ahiɛ. Petro gba amɛ bɔ ni fee ni agbe Yesu, ni  ekɛɛ amɛ akɛ Yehowa etee Yesu shi kɛjɛ gbohii ateŋ. Ewie akɛ: ‘Amrɔ nɛɛ, Yesu yɛ Nyɔŋmɔ ninejurɔ nɔ yɛ ŋwɛi, ni efɔse mumɔ krɔŋkrɔŋ lɛ ni awo he shi lɛ eshwie wɔnɔ. Enɛ hewɔ nyɛna ni nyɛnu naakpɛɛ nii nɛɛ.’

Petro wiemɔ lɛ ta mɛi lɛ atsuiŋ waa, ni amɛbi akɛ: “Mɛni esa akɛ wɔfee?” Ekɛɛ amɛ akɛ: ‘Nyɛtsakea nyɛtsui ni nyɛhãa abaptisia nyɛ yɛ Yesu gbɛ́i mli. Kɛ́ nyɛfee nakai lɛ, nyɛ hu nyɛbaaná nikeenii ni ji mumɔ krɔŋkrɔŋ lɛ.’ Nakai gbi lɛ, abaptisi mɛi aaafee 3,000. Kɛjɛ no nɔ kɛyaa lɛ, kaselɔi lɛ ayi bɔi famɔ yɛ Yerusalem oyayaayai. Mumɔ krɔŋkrɔŋ lɛ ye ebua bɔfoi lɛ ni amɛto asafoi pii koni amɛnyɛ amɛtsɔɔ kaselɔi lɛ nibii fɛɛ ni Yesu efã amɛ lɛ.

“Kɛ́ okɛ onaabu jaje otsɔɔ akɛ, Yesu ji Nuŋtsɔ, ni ohe oye yɛ otsui mli akɛ Nyɔŋmɔ tee lɛ shi kɛjɛ gbohii ateŋ lɛ, abaahere oyiwala.”​—Romabii 10:9