Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 102

Kpojiemɔ Ni Akɛhã Yohane Lɛ

Kpojiemɔ Ni Akɛhã Yohane Lɛ

Be ni awo bɔfo Yohane tsuŋ yɛ Patmo ŋshɔkpɔ lɛ nɔ lɛ, Yesu jie nibii ni baaba wɔsɛɛ lɛ ahe ninai 16 etsɔɔ lɛ. Ninai nɛɛ tsɔɔ bɔ ni Yehowa baafee etse egbɛ́i lɛ he, ehã e-Maŋtsɛyeli lɛ aba, ni ehã afee esuɔmɔnaa nii yɛ shikpɔŋ lɛ nɔ tamɔ bɔ ni afeɔ yɛ ŋwɛi lɛ.

Yɛ ninai lɛ ekome mli lɛ, Yohane na Yehowa ni eta enunyam maŋtsɛ sɛi lɛ nɔ yɛ ŋwɛi, ni onukpai 24 ebɔle ehe kɛkpe. Onukpai 24 nɛɛ wo atadei yɛji, ni amɛbumɔ maŋtsɛ faii ni akɛ shika tsuru fee. Sarawai gbala ni anu gbɛɛmɔi kɛjɛ maŋtsɛ sɛi lɛ mli tamɔ nɔ ŋwɛi miishi. Onukpai 24 lɛ koto Yehowa ni amɛjá lɛ. Yɛ ninaa kroko mli lɛ, Yohane na asafoku kpele ko ni amɛmiijá Yehowa. Amɛjɛ jeŋmaŋ fɛɛ jeŋmaŋ kɛ gbɔmɛi srɔtoi fɛɛ kɛ wiemɔ fɛɛ wiemɔ mli. Gwantɛŋbi lɛ, ni ji Yesu, kwɛɔ amɛ tamɔ bɔ ni tookwɛlɔ feɔ lɛ, ni etsɔɔ amɛ gbɛ kɛyaa wala nu lɛ he. Sɛɛ mli yɛ ninaa kroko mli lɛ, Yohane na Yesu ni ebɔi nɔyeli yɛ ŋwɛi, ni onukpai 24 lɛ fata ehe. Enɛ sɛɛ lɛ, ena Yesu ni ekɛ drako lɛ, ni ji  Satan, kɛ edaimonioi lɛ miiwu. Yesu shwie amɛ kɛje ŋwɛi kɛba shikpɔŋ lɛ nɔ.

No sɛɛ lɛ, Yohane na ninaa fɛfɛo ko. Ena Gwantɛŋbi lɛ kɛ mɛi 144,000 lɛ damɔ Zion Gɔŋ lɛ nɔ. Agbɛnɛ hu, ena ŋwɛibɔfo ko miifiliki kɛmiibɔle shikpɔŋ lɛ, ni eekɛɛ mɛi akɛ amɛshe Nyɔŋmɔ gbeyei ni amɛkɛ anunyam ahã lɛ.

Yɛ ninaa ni nyiɛ enɛ sɛɛ lɛ mli lɛ, ena ni aawu Harmagedon ta lɛ. Yesu kɛ mɛi ni fata ehe lɛ ye Satan jeŋ fɔŋ lɛ nɔ kunim yɛ ta lɛ mli. Yɛ naagbee ninaa lɛ mli lɛ, Yohane na ni mɛi ni yɔɔ ŋwɛi kɛ mɛi ni yɔɔ shikpɔŋ nɔ lɛ fɛɛ efee ekome. Akpãtã Satan kɛ ewebii lɛ fɛɛ ahiɛ. Mɛi fɛɛ ni yɔɔ ŋwɛi kɛ shikpɔŋ nɔ lɛ miiwo Yehowa gbɛ́i krɔŋkrɔŋ lɛ hiɛ nyam, ni amɛmiijá ekome too.

“Mikɛ nyɛɛ baaŋmɛ bo kɛ yoo lɛ teŋ, kɛ oseshi kɛ eseshi teŋ. Ebaajwara oyitso, ni bo hu obaatswa enanetsitsi nɔ.”​—1 Mose 3:15