Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 99

Gboklɛfoi Akwɛlɔ Ko Bale Anɔkwale Lɛ

Gboklɛfoi Akwɛlɔ Ko Bale Anɔkwale Lɛ

Be ni Paulo kɛ Sila tee Filipi lɛ, amɛna gbekɛ yoo nyɔŋ ko ni daimonio yɛ emli. Daimonio lɛ ni yɔɔ gbekɛ yoo lɛ mli lɛ hewɔ lɛ, enuŋtsɔmɛi lɛ kɛɛ ebaanyɛ etsɔɔ mɛi nɔ ni baaba wɔsɛɛ, ni enɛ hã amɛná shika waa. Gbekɛ yoo nɛɛ nyiɛ Paulo kɛ Sila sɛɛ gbii pii. Daimonio lɛ hã ebolɔ akɛ: “Hii nɛɛ ji Nyɔŋmɔ, Mɔ Ni Nɔ Kwɔ Fe Fɛɛ lɛ nyɔji.” Kɛkɛ ni gbi ko lɛ, Paulo kɛɛ daimonio lɛ akɛ: ‘Miikɛɛ bo yɛ Yesu gbɛ́i mli akɛ, oje emli!’ Daimonio lɛ je gbekɛ yoo lɛ mli.

Be ni gbekɛ yoo lɛ nuŋtsɔmɛi lɛ na akɛ amɛnáŋ shika dɔŋŋ lɛ, amɛmli fu waa. Amɛmɔmɔ Paulo kɛ Sila ni amɛgbala amɛ kɛtee nɔyelɔi lɛ aŋɔɔ ni amɛkɛɛ: ‘Hii nɛɛ miiku mla lɛ mli ni amɛmiigba mɛi fɛɛ ni yɔɔ maŋ nɛɛ mli lɛ anaa!’ Nɔyelɔi lɛ fã ni ayi Paulo kɛ Sila ni awo amɛ tsuŋ. Gboklɛfoi akwɛlɔ lɛ kɛ amɛ yawo tsuŋwoohe lɛ sɛɛgbɛ tɔ̃ɔ he ni ewo duŋ fe fɛɛ lɛ, ni ekɛ amɛnaji hɔlɔ tsei komɛi ateŋ.

Paulo kɛ Sila lá kɛjie Yehowa yi, ni gboklɛfoi krokomɛi lɛ nu amɛhe. Be ni shɛ nyɔɔŋteŋ lɛ, shikpɔŋ hoso trukaa, ni ehã tsuŋwoohe lɛ hoso waa diɛŋtsɛ. Tsuŋwoohe lɛ shinai lɛ fɛɛ gbele, tsei ni akɛ gboklɛfoi lɛ anaji ehɔlɔ mli lɛ, kɛ kɔsɔŋkɔsɔi ni akɛwo amɛ lɛ fɛɛ kpɔlɔ. Gboklɛfoi akwɛlɔ lɛ sha foi kɛtee tsuŋwoohe lɛ sɛɛgbɛ tɔ̃ɔ lɛ, ni ena akɛ shinai lɛ anaa kamɔ. Efee lɛ akɛ gboklɛfoi lɛ fɛɛ ejo foi, no hewɔ lɛ, egbala klante ni kulɛ eyaagbe ehe.

Shi Paulo bo ekɛɛ lɛ akɛ: ‘Kaaye ohe awui! Wɔ fɛɛ wɔyɛ biɛ!’ Gboklɛfoi akwɛlɔ lɛ sha foi kɛbote mli ni eho egbee Paulo kɛ Sila hiɛ. Ebi amɛ akɛ: “Mɛni esa akɛ mafee koni ahere miyiwala?” Amɛkɛɛ lɛ akɛ: ‘Esa akɛ bo kɛ oshĩabii lɛ fɛɛ ahe Yesu nɔ nyɛye.’ No hewɔ lɛ, Paulo kɛ Sila tsɔɔ gboklɛfoi akwɛlɔ lɛ kɛ eshĩabii lɛ fɛɛ Yehowa wiemɔ lɛ, kɛkɛ ni amɛbaptisi amɛ fɛɛ.

“Mɛi baamɔmɔ nyɛ ni amɛbaawa nyɛ yi, amɛkɛ nyɛ baahã ni akojo nyɛ yɛ kpeehei ni awo nyɛ tsuŋ. Akɛ nyɛ baaya maŋtsɛmɛi kɛ amralofoi ahiɛ yɛ migbɛ́i lɛ hewɔ. No baahã nyɛná hegbɛ kɛye odase.”​—Luka 21:12, 13