Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 92

Yesu Jie Ehe Kpo Etsɔɔ Wolɛi Lɛ

Yesu Jie Ehe Kpo Etsɔɔ Wolɛi Lɛ

Be ni Yesu jie ehe kpo etsɔɔ bɔfoi lɛ sɛɛ lɛ, Petro kpɛ eyiŋ akɛ eeya wuo yɛ Galilea Ŋshɔ lɛ mli. Toma, Yakobo, Yohane, kɛ kaselɔi lɛ ekomɛi kɛ lɛ tee. Shi nyɔɔŋ muu lɛ fɛɛ lɛ, amɛgbeee loo.

Be ni je miihe atsɛre lɛ, amɛna nuu ko damɔ ŋshɔ lɛ naa. Nuu lɛ bo ebi amɛ akɛ: ‘Ani nyɛgbe loo lɛ eko?’ Amɛkɛɛ lɛ akɛ: “Dabi!” Nuu lɛ kɛɛ amɛ akɛ: “Nyɛfɔ̃a yaa lɛ yɛ lɛlɛ lɛ ninejurɔgbɛ.” Be ni amɛfee nakai lɛ, amɛgbe loi babaoo aahu akɛ, amɛnyɛɛɛ amɛgbala yaa lɛ kɛba lɛlɛ lɛ mli. Amrɔ nɔŋŋ lɛ, Yohane na akɛ Yesu ni, ni ekɛɛ akɛ: “Nuŋtsɔ lɛ ni!” Oya nɔŋŋ ni Petro tu ewo nu lɛ mli ni esere kɛtee ŋshɔ lɛ naa. Kaselɔi krokomɛi lɛ ta lɛlɛ lɛ mli kɛba.

Be ni amɛshɛ ŋshɔ lɛ naa lɛ, amɛna ni ashɛre la ni blodo kɛ loo jwere nɔ. Yesu kɛɛ amɛ akɛ amɛkɛ loo lɛ eko aba ni ekɛfata he. Kɛkɛ ni ekɛɛ amɛ akɛ: ‘Nyɛbaa nyɛbayea nii.’

 Be ni amɛye nii lɛ amɛgbe naa lɛ, Yesu bi Petro akɛ: ‘Ani osumɔɔ mi fe wuoyaa?’ Petro kɛɛ lɛ akɛ: ‘Hɛɛ Nuŋtsɔ, ole akɛ misumɔɔ bo.’ Yesu kɛɛ lɛ akɛ: ‘Belɛ, lɛɛ migwantɛŋbii lɛ.’ Yesu saa ebi lɛ akɛ: ‘Petro, ani osumɔɔ mi?’ Petro kɛɛ lɛ akɛ: ‘Nuŋtsɔ, ole akɛ misumɔɔ bo.’ Yesu kɛɛ lɛ akɛ: “Kwɛmɔ migwantɛŋi bibii lɛ tamɔ tookwɛlɔ feɔ lɛ.” Yesu bi lɛ sane kome too lɛ nɔŋŋ nɔ ni ji shii etɛ nɔ. Edɔ Petro waa, ni ekɛɛ lɛ akɛ: ‘Nuŋtsɔ, ole nɔ fɛɛ nɔ. Ole akɛ misumɔɔ bo.’ Yesu kɛɛ lɛ akɛ: “Lɛɛ migwantɛŋi bibii lɛ.” Kɛkɛ ni ekɛfata he akɛ: “Yaa nɔ onyiɛ misɛɛ.”

“[Yesu] kɛɛ amɛ akɛ: ‘Nyɛbanyiɛa misɛɛ, ni mafee nyɛ wolɛi ni hɛɔ gbɔmɛi.’ Amɛshi amɛyai lɛ amrɔ nɔŋŋ, ni amɛnyiɛ esɛɛ.”​—Mateo 4:19, 20