Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 91

Atee Yesu Shi

Atee Yesu Shi

Be ni Yesu gbo lɛ, nuu niiatsɛ ko ni atsɛɔ lɛ Yosef lɛ yabi Pilato ni ehã eyajie Yesu gbonyo lɛ kɛje tso lɛ nɔ. Yosef kɛ mama yɛŋ fɛfɛo ko ha gbonyo lɛ he fɛɛ, ewo lɛ tsofa, ni ekɛ lɛ yaŋmɛ gbonyobu hee ko mli. Kɛkɛ ni ehã akɛ tɛ agbo ko tsĩ bu lɛ naa. Osɔfoi ni abuɔ amɛ waa lɛ kɛɛ Pilato akɛ: ‘Wɔmiishe gbeyei akɛ Yesu kaselɔi lɛ baaba amɛbawó egbonyo lɛ kɛya ni amɛkɛɛ akɛ eba wala mli ekoŋŋ.’ No hewɔ lɛ, Pilato kɛɛ amɛ akɛ: ‘Nyɛyasɔoa tɛ lɛ kɛkpɛtɛa gbonyobu lɛ naa, ni nyɛbua he.’

Gbii etɛ sɛɛ lɛ, yei komɛi tee gbonyobu lɛ naa leebi maŋkpa. Shi be ni amɛshɛ jɛmɛ lɛ, amɛna akɛ akoklo tɛ lɛ kɛje gbonyobu lɛ naa. Amɛna ŋwɛibɔfo ko yɛ bu lɛ mli, ni ekɛɛ amɛ akɛ: ‘Nyɛkashea gbeyei. Atee Yesu shi. Nyɛyaa nyɛyakɛa ekaselɔi lɛ akɛ amɛkɛ lɛ akpe yɛ Galilea.’

Maria Magdalena sha foi kɛtee Petro kɛ Yohane ŋɔɔ. Ekɛɛ amɛ akɛ: ‘Mɔ ko ebawó Yesu gbonyo lɛ!’ Petro kɛ Yohane jo foi kɛtee gbonyobu lɛ naa. Shi be ni amɛtee lɛ, amɛnaaa mɔ ko mɔ ko yɛ jɛmɛ. No hewɔ lɛ, amɛku amɛsɛɛ amɛtee shĩa.

Maria ku esɛɛ kɛtee gbonyobu lɛ naa. Be ni etee lɛ, ena ŋwɛibɔfoi enyɔ yɛ gbonyobu lɛ mli ni ekɛɛ amɛ akɛ: ‘Mileee he ni amɛkɛ mi-Nuŋtsɔ lɛ etee.’ Kɛkɛ ni ena nuu ko. Esusu akɛ nuu nɛɛ ji mɔ ni saa abɔɔ lɛ mli lɛ, no hewɔ lɛ, ekɛɛ lɛ akɛ: ‘Onukpa, ofainɛ kɛɛmɔ mi he ni okɛ lɛ eyaŋmɛ.’ Shi be ni nuu lɛ kɛɛ, “Maria!” lɛ, ena akɛ Yesu ni. Ebo akɛ: “Tsɔɔlɔ!,” ni efua lɛ. Yesu kɛɛ lɛ akɛ: ‘Yaa ni oyakɛɛ minyɛmimɛi lɛ akɛ ona mi.’ Amrɔ nɔŋŋ lɛ, Maria jo foi kɛtee kaselɔi lɛ aŋɔɔ, ni eyakɛɛ amɛ akɛ ena Yesu.

Sɛɛ mli yɛ nakai gbi lɛ nɔ nɔŋŋ lɛ, kaselɔi enyɔ nyiɛ kɛjɛ Yerusalem ni amɛmiiya Emao. Yɛ gbɛ lɛ nɔ lɛ, nuu ko bafata amɛhe, ni ebi amɛ nɔ ni he ni amɛwieɔ. Amɛkɛɛ lɛ akɛ: ‘Ani onuko? Ŋmɛnɛ ji gbii etɛ lɛ, osɔfoi ni abuɔ amɛ waa lɛ gbe Yesu. Shi ŋmɛnɛ lɛ, yei komɛi kɛɛ eba wala mli!’ Nuu lɛ bi amɛ akɛ:  ‘Ani nyɛheee gbalɔi lɛ nyɛyeee? Gbalɔi lɛ kɛɛ Kristo lɛ baagbo ni abaatee lɛ shi.’ Etee nɔ egbala Ŋmalɛ lɛ mli etsɔɔ amɛ. Be ni amɛshɛ Emao lɛ, kaselɔi lɛ kɛɛ nuu lɛ akɛ ebahi amɛmasɛi nakai gbɛkɛ lɛ. Be ni amɛyeɔ gbɛkɛ niyenii lɛ, nuu lɛ sɔle eshwie blodo lɛ nɔ, ni no hã amɛna akɛ Yesu ni. Kɛkɛ ni elaaje.

Kaselɔi enyɔ lɛ ku amɛsɛɛ oyayaayai kɛtee he ni bɔfoi lɛ ebua amɛhe naa yɛ, yɛ Yerusalem lɛ, ni amɛgba amɛ nɔ ni ba lɛ. Amɛyɛ shĩa lɛ mli nɔŋŋ ni Yesu bapue yɛ amɛ fɛɛ amɛhiɛ. Shishijee mli lɛ, bɔfoi lɛ heee amɛyeee akɛ Yesu ni. Shi Yesu kɛɛ amɛ akɛ: ‘Nyɛkwɛa miniji; nyɛtaa mihe. Aŋma akɛ abaatee Kristo lɛ shi kɛjɛ gbohii ateŋ.’

“Miji gbɛ lɛ kɛ anɔkwale lɛ kɛ wala lɛ. Mɔ ko mɔ ko baaa Tsɛ lɛ ŋɔɔ akɛ ja etsɔ minɔ.”​—Yohane 14:6