Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 79

Yesu Fee Naakpɛɛ Nii Pii

Yesu Fee Naakpɛɛ Nii Pii

Yesu ba shikpɔŋ lɛ nɔ ní ebashiɛ Nyɔŋmɔ Maŋtsɛyeli lɛ he sane kpakpa lɛ. Yehowa hã Yesu mumɔ krɔŋkrɔŋ lɛ koni ekɛfee naakpɛɛ nii ni mɛi ana nɔ ni Yesu baafee be ni eyeɔ nɔ akɛ Maŋtsɛ lɛ. Hela ko bɛ ni Yesu nyɛɛɛ atsa. He fɛɛ he ni ebaaya lɛ, helatsɛmɛi pii baa eŋɔɔ ni etsaa amɛ fɛɛ. Egbele shwilafoi ahiŋmɛii kɛ toimulɔi atoii, ehã mɛi ni nyɛɛɛ anyiɛ lɛ nyiɛ, ni ehã mɛi ni daimonioi haoɔ amɛ lɛ ahe jɔ amɛ. Kɛ́ helatsɛmɛi lɛ ta etadei lɛ ahe pɛ po lɛ, amɛhelai lɛ fɛɛ yaa. Mɛi nyiɛ Yesu sɛɛ kɛtee he fɛɛ he ni eyaa. Be ni Yesu miitao ehi he ko ekome too po lɛ, eshwieee mɛi ni ba eŋɔɔ lɛ.

Be ko lɛ, Yesu yɛ shĩa ko mli ni mɛi komɛi kɛ nuu ko ni nyɛɛɛ anyiɛ lɛ ba jɛmɛ. Shi be ni amɛba lɛ, shĩa lɛ mli eyi aahu akɛ amɛnáaa gbɛ amɛbote mli. No hewɔ lɛ, amɛgbu fɔlɔ yɛ tsũ lɛ yiteŋ ni amɛkɛ nuu lɛ tsɔ jɛmɛ. Yesu kɛɛ nuu lɛ akɛ: ‘Tee shi ni onyiɛ.’ Nuu lɛ te shi ni ebɔi nyiɛmɔ, ni mɛi lɛ fɛɛ anaa kpɛ amɛhe.

Be kroko lɛ, Yesu miibote akrowa ko mli ni hii kpitiyelɔi nyɔŋma na lɛ. Shi akɛni nakai beiaŋ lɛ, aŋmɛɛɛ kpitiyelɔi gbɛ ni amɛbɛŋkɛ mɛi krokomɛi hewɔ lɛ, amɛdamɔ sɛɛ shɔŋŋ ni amɛbo amɛkɛɛ lɛ akɛ: ‘Yesu, ye obua wɔ!’ Yesu kɛɛ amɛ akɛ amɛya sɔlemɔ shĩa lɛ, ejaakɛ Yehowa Mla lɛ kɛɛ kɛ́ atsa kpitiyelɔi lɛ amɛya jɛmɛ. Amɛnyiɛ gbɛ amɛmiiya nɔŋŋ ni amɛkpiti lɛ fɛɛ tee. Be ni amɛteŋ mɔ kome na akɛ atsa lɛ  lɛ, eku esɛɛ ebada Yesu shi ni ejie Nyɔŋmɔ yi. Mɛi nyɔŋma lɛ ateŋ lɛ, mɔ kome nɛɛ pɛ bada Yesu shi.

Be ko lɛ, yoo ko ni hela emɔ lɛ afii 12 lɛ nyiɛ kɛtsɔ mɛi pii ateŋ kɛbaje Yesu sɛɛgbɛ ni eta etade nɔhaanɔ lɛ naamuu lɛ he. Yoo nɛɛ kɛ ehela lɛ etee hei srɔtoisrɔtoi shi anyɛɛɛ atsa lɛ. Shi be ni eta Yesu atade lɛ he lɛ, ehe wa lɛ amrɔ nɔŋŋ. Be ni eba lɛ nakai lɛ, Yesu bi akɛ: “Namɔ ta mihe lɛ?” Yoo lɛ tsui fã, shi eba ni ebagba Yesu anɔkwale lɛ fɛɛ. Yesu shɛje emii ni ekɛɛ lɛ akɛ: ‘Biyoo, yaa yɛ toiŋjɔlɛ mli.’

Nuu ko ni abuɔ waa ni atsɛɔ lɛ Yairo lɛ kpa Yesu fai akɛ: ‘Ba mishĩa lɛ! Mibiyoo fioo lɛ bɛ hewalɛ kwraa.’ Shi Yesu shɛɛɛ Yairo shĩa lɛ ni gbekɛ yoo lɛ gbo. Be ni Yesu yashɛ jɛmɛ lɛ, ena akɛ mɛi babaoo eba jɛmɛ koni amɛbaye weku lɛ ŋkɔmɔ. Yesu kɛɛ amɛ akɛ: ‘Nyɛkafoa; wɔ kɛkɛ ewɔ.’ Kɛkɛ ni emɔ gbekɛ yoo lɛ nine shi, ni ekɛɛ lɛ akɛ: “Gbekɛ, tee shi!” Amrɔ nɔŋŋ lɛ, gbekɛ yoo lɛ te shi eta shi, ni Yesu kɛɛ efɔlɔi lɛ akɛ amɛhã lɛ nɔ ko ni eye. Kwɛ bɔ ni efɔlɔi amii baashɛ amɛhe ahã!

“Nyɔŋmɔ kɛ mumɔ krɔŋkrɔŋ kɛ hewalɛ fɔ lɛ mu, ni eyakpa shikpɔŋ lɛ nɔ efee ekpakpa ni etsa mɛi fɛɛ ni Abonsam haoɔ amɛ lɛ, ejaakɛ Nyɔŋmɔ kɛ lɛ yɛ.”​—Bɔfoi 10:38