Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 80

Yesu Hala Bɔfoi Nyɔŋma Kɛ Enyɔ

Yesu Hala Bɔfoi Nyɔŋma Kɛ Enyɔ

Yesu kɛ aaafee afi kome kɛ fã eshiɛ. Amrɔ nɛɛ eeba ebakpɛ eyiŋ yɛ sane ko ni he hiaa waa he. Namɛi baafata ehe be fɛɛ be yɛ shiɛmɔ nitsumɔ lɛ mli? Namɛi ebaatsɔse koni amɛnyiɛ hiɛ yɛ Kristofoi asafo lɛ mli? Dani Yesu baakpɛ eyiŋ yɛ saji nɛɛ ahe lɛ, ebi Yehowa ni eye ebua lɛ. Ekome etee gɔŋ ko nɔ he ni mɔ ko mɔ ko gbaŋ enaa yɛ, ni eyasɔle nyɔɔŋ lɛ mli fɛɛ. Be ni je tsɛre lɛ, Yesu tsɛ ekaselɔi lɛ ekomɛi ni ehala amɛteŋ mɛi 12 akɛ ebɔfoi. Ani okaiɔ amɛgbɛ́i? Amɛgbɛ́i ji Petro, Andrea, Yakobo, Yohane, Filipo, Bartolomeo, Mateo, Toma, Yakobo ni ji Alfeo binuu lɛ, Tadeo, Simon, kɛ Yuda Iskariot.

Andrea, Petro, Filipo, Yakobo

Mɛi Nyɔŋma Kɛ Enyɔ lɛ fata Yesu he kɛfã gbɛ. Etsɔɔ amɛ nii jogbaŋŋ, ni etsu amɛ ni amɛyashiɛ. Yehowa hã amɛ hewalɛ ni amɛkɛfamɔ daimonioi ni amɛkɛtsa mɛi ni bɛ hewalɛ.

Yohane, Mateo, Bartolomeo, Toma

Yesu tsɛ Mɛi Nyɔŋma Kɛ Enyɔ lɛ enanemɛi, ni ehe amɛ eye waa. Farisifoi lɛ kɛɛ bɔfoi lɛ eyako skul ni gbɔmɛi komɛi kɛkɛ ji amɛ. Shi Yesu tsɔɔ bɔfoi lɛ nii jogbaŋŋ koni amɛnyɛ amɛtsu  nitsumɔ ni ekɛwo amɛdɛŋ lɛ. Amɛhi Yesu masɛi yɛ bei ni he hiaa fe fɛɛ yɛ eshihilɛ mli lɛ amli, tamɔ be ni eshwɛ fioo ni ebaagbo lɛ, kɛ be ni atee lɛ shi lɛ. Mɛi Nyɔŋma Kɛ Enyɔ lɛ ateŋ mɛi babaoo jɛ Galilea, ni jɛmɛ nɔŋŋ Yesu hu jɛ. Amɛteŋ mɛi komɛi yɛ ŋamɛi.

Yakobo ni ji Alfeo binuu lɛ, Yuda Iskariot, Tadeo, Simon

Bɔfoi lɛ tɔ̃ ejaakɛ amɛyeee emuu. Akɛ nɔkwɛmɔnɔ lɛ, bei komɛi lɛ, amɛwieɔ ni amɛsusuuu he, amɛkpɛɔ yiŋ gbohii, ni amɛtooo amɛtsui shi. Amɛbé yɛ mɔ ni he hiaa fe fɛɛ yɛ amɛteŋ lɛ he po. Fɛɛ sɛɛ lɛ, amɛji gbɔmɛi kpakpai, ni amɛsumɔɔ Yehowa. Be ni Yesu tee ŋwɛi lɛ, amɛji mɛi ni akɛto Kristofoi asafo lɛ shishi.

“Miitsɛ nyɛ nanemɛi, ejaakɛ nibii fɛɛ ni minu yɛ mi-Tsɛ naa lɛ, mihã nyɛle.”​—Yohane 15:15