Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 68

Elizabet Fɔ

Elizabet Fɔ

Be ni atswa Yerusalem gbogboi lɛ sɛɛ nɔ ni fe afii 400 lɛ, osɔfo ko ni atsɛɔ lɛ Zakaria lɛ kɛ eŋa Elizabet hi he ko ni bɛŋkɛ jɛmɛ. Amɛbote gbalashihilɛ mli afii pii shi amɛbɛ bi. Gbi ko lɛ, Zakaria yɛ sɔlemɔ shĩa lɛ He Krɔŋkrɔŋ lɛ eeshã tsofa-kɛ-ŋma ni bɔfo Gabriel ba eŋɔɔ. Zakaria tsui fã, shi Gabriel kɛɛ lɛ akɛ: ‘Kaashe gbeyei. Yehowa etsu mi ni mibakɛɛ bo sane kpakpa ko. Oŋa Elizabet baafɔ binuu ni abaatsɛ lɛ Yohane. Yehowa ehala Yohane kɛhã nitsumɔ krɛdɛɛ ko.’ Zakaria bi lɛ akɛ: ‘Ani manyɛ mahe nɔ ni owieɔ lɛ maye? Mi kɛ miŋa fɛɛ egbɔlɔ, no hewɔ lɛ wɔnyɛŋ wɔfɔ.’ Gabriel kɛɛ lɛ akɛ: ‘Nyɔŋmɔ ni tsu mi ni mibakɛɛ bo sane nɛɛ. Shi akɛni oheee mi oyeee hewɔ lɛ, onyɛŋ owie kɛyashi abaafɔ gbekɛ lɛ.’

Zakaria tsɛ yɛ He Krɔŋkrɔŋ lɛ fe bɔ ni akpaa gbɛ. No hewɔ lɛ be ni eje kpo lɛ, mɛi ni yɔɔ agbo lɛ naa lɛ bi lɛ nɔ hewɔ ni esɛɛ yatsɛ nakai lɛ. Shi Zakaria nyɛɛɛ awie. No hewɔ lɛ, ekɛ eniji fee okadii etsɔɔ amɛ. Enɛ hã amɛna akɛ, Nyɔŋmɔ kɛ lɛ ewie.

Sɛɛ mli lɛ, Elizabet bahiɛ hɔ, ni efɔ binuu, tamɔ bɔ ni ŋwɛibɔfo lɛ wie lɛ. Enanemɛi kɛ ewekumɛi ba ni amɛbakwɛ gbekɛ lɛ. Amɛmii shɛ amɛhe waa akɛ efɔ. Elizabet kɛɛ amɛ akɛ: ‘Abaatsɛ lɛ Yohane.’ Shi amɛkɛɛ lɛ akɛ: ‘Mɔ ko mɔ ko bɛ oweku lɛ mli ni atsɛɔ lɛ Yohane. Okɛ epapa gbɛ́i Zakaria lɛ awo lɛ.’ Shi Zakaria ŋma yɛ nɔ ko nɔ akɛ: ‘Egbɛ́i ji Yohane.’ Amrɔ nɔŋŋ ni Zakaria bɔi wiemɔ ekoŋŋ! Mɛi fɛɛ ni yɔɔ Yudea lɛ nu gbekɛ lɛ he sane, ni amɛbi amɛhe akɛ: ‘Mɛni po gbekɛ bibioo nɛɛ baatsɔ?’

Kɛkɛ ni mumɔ krɔŋkrɔŋ lɛ bayi Zakaria obɔ, ni egba akɛ: ‘Ajie Yehowa yi. Ewo Abraham shi akɛ ebaatsu Mesia lɛ ni ebahere wɔ. Yohane baatsɔ gbalɔ, ni ebaasaa gbɛ ehã Mesia lɛ.’

 Shi nɔ ko ni sa kadimɔ tee nɔ yɛ Elizabet wekunyo Maria hu shihilɛ mli. Hã wɔkwɛ nɔ ni ji yɛ yitso ni nyiɛ sɛɛ lɛ mli.

“Gbɔmɛi agbɛfaŋ lɛ anyɛŋ enɛ afee, shi Nyɔŋmɔ nyɛɔ nii fɛɛ efeɔ.”​—Mateo 19:26