Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 69

Gabriel Ba Maria Ŋɔɔ

Gabriel Ba Maria Ŋɔɔ

Elizabet yɛ wekunyo ko yɛ Nazaret yɛ Galilea, ni atsɛɔ lɛ Maria. Maria ji oblayoo, ni no mli lɛ ekɛ kapintafonyo ko ni atsɛɔ lɛ Yosef lɛ miito gbɛjianɔ ni amɛbote gbalashihilɛ mli. Be ni Elizabet hɔ lɛ ná nyɔji ekpaa lɛ, bɔfo Gabriel ba Maria ŋɔɔ. Ekɛɛ lɛ akɛ: ‘Miiŋa bo, Maria. Yehowa sumɔɔ osane waa.’ Maria enaaa nɔ hewɔ ni Gabriel wie nakai. No hewɔ lɛ Gabriel kɛɛ lɛ akɛ: ‘Obaahiɛ hɔ ni obaafɔ binuu, ni esa akɛ owo lɛ gbɛ́i akɛ Yesu. Ebaaye Maŋtsɛ, ni e-Maŋtsɛyeli lɛ sɛɛ efoŋ.’

Maria kɛɛ lɛ akɛ: ‘Mikɛ nuu náko bɔlɛ dã. No hewɔ lɛ, te mafee tɛŋŋ mafɔ lɛ?’ Gabriel kɛɛ lɛ akɛ: ‘Yehowa nyɛɔ nii fɛɛ efeɔ. Mumɔ krɔŋkrɔŋ lɛ baaba onɔ ni obaafɔ binuu. Owekunyo Elizabet hu hiɛ hɔ.’ Kɛkɛ ni Maria here nɔ akɛ: ‘Yehowa nyɔŋ yoo ji mi! Bɔ ni owie lɛ, aba mli nakai ahã mi.’

 Maria tee maŋ ko ni yɔɔ gɔji lɛ anɔ lɛ mli eyasara Elizabet. Be ni Maria ŋa Elizabet lɛ, gbekɛ lɛ ni yɔɔ Elizabet musu mli lɛ tumɔ. Mumɔ krɔŋkrɔŋ bayi Elizabet obɔ ni ekɛɛ Maria akɛ: ‘Maria, Yehowa ejɔɔ bo. Eŋɔɔ minaa akɛ mi-Nuŋtsɔ lɛ mami eba mishĩa lɛ.’ Maria kɛɛ lɛ akɛ: ‘Miijie Yehowa yi kɛ mitsui fɛɛ.’ Ehi Elizabet ŋɔɔ nyɔji etɛ, kɛkɛ ni eku esɛɛ kɛtee shĩa yɛ Nazaret.

Be ni Yosef nu akɛ Maria hiɛ hɔ lɛ, ekpɛ eyiŋ akɛ ekɛ lɛ boteŋ gbalashihilɛ mli dɔŋŋ. Shi ŋwɛibɔfo ko ba eŋɔɔ yɛ lamɔ mli ni ekɛɛ lɛ akɛ: ‘Obaanyɛ okɛ lɛ abote gbalashihilɛ mli. Efeko nɔ fɔŋ ko.’ No hewɔ lɛ, Yosef ŋɔ Maria akɛ eŋa, ni ekɛ lɛ tee shĩa.

“Yehowa feɔ nɔ fɛɛ nɔ ni esumɔɔ yɛ ŋwɛi kɛ shikpɔŋ lɛ nɔ.”​—Lala 135:6