Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 67

Yerusalem Gbogboi Lɛ

Yerusalem Gbogboi Lɛ

Yɛ Ezra beiaŋ lɛ, no mli lɛ Israelnyo ko yɛ Persia maŋ ni ji Shushan lɛ mli. Atsɛɔ lɛ Nehemia, ni Maŋtsɛ Artashasta tsulɔ ji lɛ. Be ko lɛ, Nehemia nyɛmi nuu jɛ Yuda eba, ni ebabɔ lɛ amaniɛ fɔŋ ko. Ekɛɛ lɛ akɛ: ‘Mɛi ni eku amɛsɛɛ kɛtee Yerusalem lɛ bɛ shweshweeshwe. Kɛjɛ be ni Babilonbii lɛ kumɔ maŋ lɛ gbogboi lɛ ni amɛfite agbó lɛ, asaako.’ Sane lɛ gba Nehemia naa waa. Ekpɛ eyiŋ akɛ ebaaya Yerusalem ni eyaye ebua amɛ. No hewɔ lɛ, esɔle koni maŋtsɛ lɛ aŋmɛ lɛ gbɛ ni eya.

Sɛɛ mli lɛ, maŋtsɛ lɛ na akɛ Nehemia hiɛ efee mɔbɔmɔbɔ. No hewɔ lɛ, ebi lɛ akɛ: ‘Minako ni ohiɛ efee mɔbɔmɔbɔ nɛkɛ dã. Mɛni eba?’ Nehemia kɛɛ lɛ akɛ: ‘Mɛni hewɔ esaaa akɛ mihiɛ feɔ mɔbɔmɔbɔ? Mimaŋ Yerusalem efite kwraa.’ Maŋtsɛ lɛ bi lɛ akɛ: ‘Mɛni obaasumɔ ni mafee mahã bo?’ Amrɔ nɔŋŋ lɛ, Nehemia sɔle yɛ eyitsoŋ. Kɛkɛ ni ehere nɔ akɛ: ‘Ofainɛ, hã maya Yerusalem ni mayatswa gbogboi lɛ.’ Yerusalem jekɛ, shi Maŋtsɛ Artashasta ŋmɛ Nehemia gbɛ ni eya, ni eto gbɛjianɔ koni Nehemia ayashɛ shweshweeshwe. Kɛfata he lɛ, efee Nehemia Yuda amralo, ni ehã lɛ tsei koni ekɛfee maŋ lɛ agbó lɛ.

Be ni Nehemia yashɛ Yerusalem lɛ, etee eyakwɛ bɔ ni gbogboi lɛ efee. Kɛkɛ ni ebua osɔfoi lɛ kɛ nɔyelɔi lɛ anaa, ni ekɛɛ amɛ akɛ: ‘Shihilɛ mli ni wɔyɔɔ lɛ ehiii kwraa. Esa akɛ wɔfee he nɔ ko.’ Mɛi lɛ kpɛlɛ nɔ, ni amɛbɔi gbogboi lɛ tswaa.

Shi Israelbii lɛ ahenyɛlɔi lɛ ateŋ mɛi komɛi ŋmɔ amɛ, ni amɛkɛɛ amɛ akɛ: ‘Osɔ po baanyɛ akumɔ gbogboi ni nyɛtswaa lɛ.’ Nitsulɔi lɛ efooo amɛdaaŋ. Amɛtee nɔ amɛtswa gbogbo lɛ, ni amɛhã ekwɔ ni elɛɛ.

Henyɛlɔi lɛ fee amɛjwɛŋmɔ akɛ amɛbaajɛ hei srɔtoi amɛbatutua Yerusalem trukaa. Be ni Yudafoi lɛ nu nɔ ni henyɛlɔi lɛ ekpɛ amɛyiŋ akɛ amɛbaafee lɛ, amɛshe gbeyei waa. Shi Nehemia kɛɛ amɛ akɛ: ‘Nyɛkashea  gbeyei. Yehowa kɛ wɔ yɛ.’ Ehã bulɔi bu nitsulɔi lɛ ahe, no hewɔ lɛ, henyɛlɔi lɛ nyɛɛɛ atutua amɛ.

Amɛtswa gbogboi lɛ ni amɛfee agbó lɛ amɛgbe naa yɛ gbii 52 pɛ mli. Nehemia hã Levibii lɛ fɛɛ ba Yerusalem koni amɛbaye gbi jurɔ kɛtsɔɔ akɛ agbe nitsumɔ lɛ naa. Eja amɛ ewo kui enyɔ mli koni amɛlá, ni ehã amɛkwɔ gbogboi lɛ kɛtsɔ atrakpoi ni yɔɔ Nuhiŋmɛi Agbó lɛ naa lɛ nɔ. Ezra fata kuu kome he ni amɛkɛ amɛhiɛ tsɔɔ nɛkɛ gbɛ, ni Nehemia hu kɛ kuu kroko lɛ tsɔ afã kroko lɛ. Amɛnyiɛ gbogbo lɛ nɔ kɛbɔle maŋ lɛ he ni amɛyakpe yɛ sɔlemɔ shĩa lɛ. Amɛkpã tɛtɛrɛmantɛrɛi, amɛtswa tsɛŋtsɛŋi kɛ kpãa saŋkui, ni amɛlá amɛhã Yehowa. Maŋbii lɛ fɛɛ, hii, yei, kɛ gbekɛbii fɛɛ, shã afɔlei amɛhã Yehowa ni amɛná miishɛɛ waa. Mɛi ni yɔɔ shɔŋŋshɔŋŋ po nu amɛhe.

“Tawuu nii ko bɛ ni asɔ̃ ashi bo ni baanyɛ nɔ ko afee.”​—Yesaia 54:17