Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 57

Yehowa Tsu Yeremia Ni Eyashiɛ

Yehowa Tsu Yeremia Ni Eyashiɛ

Yehowa hala Yeremia akɛ gbalɔ kɛhã Yudabii lɛ. Ekɛɛ lɛ akɛ eyashiɛ etsɔɔ amɛ ni ebɔ amɛ kɔkɔ ni amɛkpa nibii gbohii ni amɛfeɔ lɛ. Shi Yeremia kɛɛ Yehowa akɛ: ‘Yehowa, gbekɛ ji mi. Minaa tseee.’ Yehowa kɛɛ lɛ akɛ: ‘Kaashe gbeyei. Matsɔɔ bo nɔ ni owie. Mawa bo.’

Yehowa kɛɛ Yeremia akɛ ebua maŋ lɛ mli onukpai lɛ anaa, ni ejwa gbɛ́ ko yɛ amɛhiɛ, ni ekɛɛ amɛ akɛ: ‘Nɛkɛ abaajwa Yerusalem.’ Be ni Yeremia yakɛɛ maŋ lɛ mli onukpai lɛ nɔ ni Yehowa kɛɛ lɛ, amɛmli fu lɛ waa. Osɔfo ko ni atsɛɔ lɛ Pashur lɛ yi Yeremia, ni ekɛ Yeremia niji kɛ enaji hɔlɔ tsei komɛi ateŋ. Yeremia nyɛɛɛ atsi ehe aahu kɛyashi je tsɛre. Be ni je tsɛre lɛ, Pashur jie Yeremia. Yeremia nijiaŋ je wui. Ewie akɛ: ‘Minyɛŋ matsu nitsumɔ nɛɛ dɔŋŋ. Makpa shiɛmɔ.’ Shi ani ekpa lɛɛlɛŋ? Dabi. Be ni esusu sane lɛ he ekoŋŋ lɛ, ewie akɛ: ‘Yehowa wiemɔ lɛ tamɔ la yɛ mimli. Minyɛŋ makpa shiɛmɔ.’ Yeremia tee nɔ ebɔ mɛi lɛ kɔkɔ.

Afii komɛi asɛɛ lɛ, maŋtsɛ hee ko baye Yuda nɔ. Osɔfoi lɛ kɛ amale gbalɔi lɛ sumɔɔɔ sane ni Yeremia shiɛɔ lɛ kwraa. No hewɔ lɛ, amɛkɛɛ maŋ lɛ mli onukpai lɛ akɛ: ‘Esa akɛ agbe nuu nɛɛ.’ Shi Yeremia kɛɛ amɛ akɛ: ‘Kɛ́ nyɛgbe mi lɛ, nyɛgbe mɔ ko ni efeko efɔŋ ko. Saji ni miwieɔ lɛ, Yehowa wiemɔi ni, jeee mi diɛŋtsɛ minɔ.’ Be ni maŋ onukpai lɛ nu enɛ lɛ, amɛwie akɛ: ‘Esaaa akɛ agbeɔ nuu nɛɛ.’

 Yeremia tee nɔ eshiɛ, ni enɛ wo maŋ onukpai lɛ amli la waa. Amɛtee amɛyakɛɛ maŋtsɛ lɛ akɛ amɛbaagbe Yeremia. Maŋtsɛ lɛ kɛɛ amɛ akɛ amɛbaanyɛ amɛfee Yeremia nɔ fɛɛ nɔ ni amɛsumɔɔ. No hewɔ lɛ, amɛyashɛ Yeremia amɛfɔ̃ nubu ko ni mli kwɔ ni mli eyi kɛ ŋmɔtɔ mli, koni egbo. Yeremia bɔi shiumɔ yɛ ŋmɔtɔ lɛ mli.

Shi onukpa ko ni yɔɔ maŋtsɛ lɛ shĩa lɛ ni atsɛɔ lɛ Ebed-melek lɛ kɛɛ maŋtsɛ lɛ akɛ: ‘Maŋ onukpai lɛ eshɛ Yeremia amɛfɔ̃ nubu ko mli! Kɛ́ wɔshi lɛ yɛ jɛmɛ lɛ, ebaagbo.’ Maŋtsɛ lɛ kɛɛ Ebed-melek akɛ, etsɛ hii 30 efata ehe ni amɛyajie Yeremia yɛ nubu lɛ mli. Esa akɛ wɔkase Yeremia ni wɔya nɔ wɔshiɛ ekɔɔɔ he eko nɔ ni baaba, aloo jeee nakai?

“Mɛi fɛɛ baanyɛ nyɛ yɛ migbɛ́i lɛ hewɔ, shi mɔ ni baafi shi kɛbaaya naagbee lɛ, lɛ eyiwala abaahere.”​—Mateo 10:22