Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 60

Maŋtsɛyeli Ko Ni Baahi Shi Kɛya Naanɔ

Maŋtsɛyeli Ko Ni Baahi Shi Kɛya Naanɔ

Gbɛkɛ ko lɛ, Maŋtsɛ Nebukadnezar la lamɔ ko ni yɔɔ naakpɛɛ. Lamɔ lɛ gba enaa aahu akɛ, enyɛɛɛ ewɔ. No hewɔ lɛ, etsɛ emɛi ni feɔ majik lɛ, ni ekɛɛ amɛ akɛ: ‘Nyɛtsɔa mi milamɔ lɛ shishi.’ Amɛkɛɛ lɛ akɛ: ‘Nii maŋtsɛ, ofainɛ gbaa wɔ lamɔ lɛ.’ Shi Nebukadnezar kɛɛ amɛ akɛ: ‘Dabi! Nyɛgbaa mi milamɔ lɛ, kɛjeee nakai lɛ, magbe nyɛ.’ Shi kome ekoŋŋ lɛ, amɛkɛɛ lɛ akɛ: ‘Ofainɛ, gbaa wɔ lamɔ lɛ, koni wɔnyɛ wɔtsɔɔ bo shishi.’ Shi ekɛɛ amɛ akɛ: ‘Nyɛmiitao nyɛlaka mi. Nyɛgbaa mi milamɔ lɛ!’ Amɛhere lɛ nɔ akɛ: ‘Mɔ ko mɔ ko bɛ ni baanyɛ afee nɔ ni obiɔ nɛɛ. Anyɛŋ afee kɔkɔɔkɔ.’

Nebukadnezar mli fu aahu akɛ, ekɛɛ agbe mɛi ni feɔ majik lɛ kɛ nilelɔi fɛɛ ni yɔɔ maŋ lɛ mli. Ni tsɔɔ akɛ, abaagbe Daniel, Shadrak, Meshak, kɛ Abednego hu. Daniel kpa maŋtsɛ lɛ fai ni ehã amɛ be fioo. Kɛkɛ ni ekɛ enanemɛi lɛ sɔle ni Yehowa aye abua amɛ. Ani Yehowa bo amɛ toi?

Hɛɛ. Yehowa jie Nebukadnezar lamɔ lɛ ehã Daniel yɛ ninaa mli, ni etsɔɔ lɛ lamɔ lɛ shishi. Enɔ jetsɛremɔ lɛ, Daniel tee maŋtsɛ lɛ tsulɔ lɛ ni yaagbe nilelɔi lɛ ŋɔɔ, ni ekɛɛ lɛ akɛ: ‘Kaagbe nilelɔi lɛ ateŋ mɔ ko mɔ ko. Manyɛ matsɔɔ maŋtsɛ lɛ lamɔ lɛ shishi.’ Tsulɔ lɛ kɛ Daniel tee Nebukadnezar ŋɔɔ. Be ni Daniel shɛ jɛmɛ lɛ, ekɛɛ maŋtsɛ lɛ akɛ: ‘Nyɔŋmɔ ejie nɔ ni baaba wɔsɛɛ lɛ etsɔɔ bo. Olamɔ lɛ nɛ: Ona amaga agbo ko. Amaga lɛ yitso lɛ, shika ni, eniji kɛ etsitsi lɛ, jwiɛtɛi ni, emusu kɛ eshuɔji lɛ, akɔɔble akɛfee, enaji lɛ, dade ni, ni enane tokotai lɛ, akɛ dade kɛ sũ ni efutu ni fee. Kɛkɛ ni tɛ ko tse kɛjɛ gɔŋ ko he ni ebatswa amaga lɛ nane tokotai lɛ. Ejwara amaga lɛ  ni egbɛlɛ lɛ ni etsɔ tamɔ mulu, kɛkɛ ni kɔɔyɔɔ loo fɛɛ kɛtee. No sɛɛ lɛ, tɛ lɛ batsɔ gɔŋ agbo, ni eha shikpɔŋ lɛ nɔ fɛɛ.’

Daniel kɛɛ maŋtsɛ lɛ akɛ: ‘Nɔ ni olamɔ lɛ tsɔɔ nɛ: Omaŋtsɛyeli lɛ ji amaga lɛ yitso ni akɛ shika fee lɛ. Maŋtsɛyeli ni baaba yɛ osɛɛ lɛ ji jwiɛtɛi lɛ. Nɔ ni baaba yɛ no sɛɛ lɛ ji akɔɔble lɛ, ni ebaaye shikpɔŋ lɛ fɛɛ nɔ. No sɛɛ lɛ, maŋtsɛyeli ko baaba ni he wa tamɔ dade. Naagbee maŋtsɛyeli ni baaba lɛ, efã ko he baawa, shi efã kroko lɛ he waŋ. Efã ni he baawa lɛ ji dade lɛ, ni efã ni he waŋ lɛ ji sũ lɛ. Tɛ lɛ ni batsɔ gɔŋ lɛ ji Nyɔŋmɔ Maŋtsɛyeli lɛ. Ebaajwara maŋtsɛyelii nɛɛ fɛɛ, shi lɛ lɛ, ebaahi shi kɛya naanɔ.’

Nebukadnezar ho egbee shi yɛ Daniel hiɛ ni ekɛ ehiɛ bu shi. Ekɛɛ lɛ akɛ: ‘O-Nyɔŋmɔ lɛ ni jie lamɔ nɛɛ etsɔɔ bo. Nyɔŋmɔ ko bɛ ni tamɔ lɛ.’ Yɛ nɔ najiaŋ ni Nebukadnezar baagbe Daniel lɛ, ewó lɛ enilelɔi lɛ fɛɛ anɔ onukpa kɛ Babilon maŋ lɛ nɔyelɔ. Ani oona bɔ ni Yehowa fee ehã Daniel sɔlemɔ lɛ hetoo?

“Amɛbua maŋtsɛmɛi lɛ anaa kɛtee he ko ni atsɛɔ jɛmɛ yɛ Hebri mli akɛ Harmagedon.”​—Kpojiemɔ 16:16