Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 58

Akpãtã Yerusalem Hiɛ

Akpãtã Yerusalem Hiɛ

Yudabii lɛ kpa Yehowa jamɔ shii abɔ ni amɛyajá amagai. Yehowa bɔ mɔdɛŋ akɛ ebaaye ebua amɛ afii babaoo. Etsu gbalɔi kɛtee amɛŋɔɔ koni amɛyabɔ amɛ kɔkɔ, shi amɛbooo toi. Moŋ lɛ, amɛye gbalɔi lɛ ahe fɛo. Ani ole bɔ ni Yehowa fee ehã amɛkpa amagai lɛ jamɔ?

Nebukadnezar, ni ji Babilon maŋtsɛ lɛ, ye maji babaoo anɔ. Be klɛŋklɛŋ ni eba Yerusalem lɛ, emɔ Maŋtsɛ Yehoiakin, lumɛi lɛ, asraafoi ni he wala waa lɛ, kɛ ŋaalɔi lɛ, ni ekɛ amɛ tee Babilon. Kɛfata he lɛ, eloo shika kɛ nibii ni jara wa ni yɔɔ Yehowa sɔlemɔ shĩa lɛ fɛɛ kɛtee. Kɛkɛ ni ewó Zedekia maŋtsɛ yɛ Yuda.

Zedekia bo Nebukadnezar toi. Shi maji krokomɛi ni bɛŋkɛ Yuda lɛ, kɛ amale gbalɔi lɛ kɛɛ lɛ akɛ ekabo Babilon maŋtsɛ lɛ toi dɔŋŋ. Yeremia bɔ Zedekia kɔkɔ akɛ kɛ́ etse Babilon maŋtsɛ lɛ hiɛ atua lɛ, mɛi baagboi, ni hɔmɔ kɛ helai baaba.

Be ni Zedekia eye maŋtsɛ afii kpaanyɔ lɛ, ekpɛ eyiŋ akɛ ebaatse Babilonbii lɛ ahiɛ atua. No hewɔ lɛ, etsɛ Ejiptbii lɛ ní amɛbawa lɛ. Be ni Nebukadnezar nu enɛ lɛ, etsu esraafoi lɛ ní amɛyakpãtã Yerusalem hiɛ. Esraafoi lɛ bɔle Yerusalem he kɛkpe. Yeremia kɛɛ Zedekia akɛ: ‘Yehowa kɛɛ kɛ́ oŋmɛɛ ohe ohã Babilonbii lɛ, bo kɛ omaŋ lɛ fɛɛ yi baaná wala. Shi kɛ́ ofeee nakai lɛ, Babilonbii lɛ kɛ la baashã Yerusalem, ni amɛbaawo bo tsuŋ.’ Zedekia kɛɛ lɛ akɛ: ‘Miŋmɛŋ mihe mihãŋ Babilonbii lɛ!’

 Afi kɛ nyɔji ekpaa sɛɛ lɛ, Babilonbii lɛ kumɔ Yerusalem gbogboi lɛ ni amɛbote maŋ lɛ mli. Amɛkɛ la shã maŋ lɛ kɛ sɔlemɔ shĩa lɛ. Amɛgbe mɛi babaoo, ni amɛmɔmɔ mɛi akpei abɔ kɛtee.

Zedekia nyɛ ejo foi kɛjɛ Yerusalem. Shi Babilonbii lɛ jo foi kɛnyiɛ esɛɛ. Amɛmɔ lɛ be ni eshwɛ fioo ni ebaashɛ Yeriko, ni amɛkɛ lɛ yahã Nebukadnezar. Babilon maŋtsɛ lɛ hã agbe Zedekia bihii lɛ fɛɛ yɛ ehiɛ. Kɛkɛ ni ehã ashwila lɛ ni ewo lɛ tsuŋ. Zedekia gbo yɛ tsuŋwoohe lɛ. Shi Yehowa wo Yudabii lɛ shi akɛ: ‘Afii 70 sɛɛ lɛ, mikɛ nyɛ baaba nyɛmaŋ Yerusalem ekoŋŋ.’

Mɛni oblahii kɛ oblayei ni amɔmɔ kɛtee Babilon lɛ baafee? Ani amɛbaaya nɔ amɛye Yehowa anɔkwa?

“Yehowa Nyɔŋmɔ, Ofe lɛ, anɔkwa kɛ jalɛ ji oyiŋkpɛi lɛ.”​—Kpojiemɔ 16:7