Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 2

Nyɔŋmɔ Bɔ Klɛŋklɛŋ Nuu Kɛ Yoo Lɛ

Nyɔŋmɔ Bɔ Klɛŋklɛŋ Nuu Kɛ Yoo Lɛ

Yehowa fee abɔɔ fɛfɛo ko yɛ he ko ni atsɛɔ lɛ Eden. Tsei, fɔfɔi, kɛ kooloi pii yɛ abɔɔ lɛ mli. Kɛkɛ ni Nyɔŋmɔ kɛ sũ shɔ̃ klɛŋklɛŋ gbɔmɔ ni ji Adam lɛ, ni efili kɔɔyɔɔ ewo egugɔ mli. Ani ole nɔ ni ba? Gbɔmɔ lɛ ba wala mli! Yehowa kɛ Adam wo abɔɔ lɛ mli, ni ekɛɛ Adam ni ewo kooloi lɛ fɛɛ gbɛ́i.

Yehowa wo Adam mla ko ni he hiaa waa. Ekɛɛ lɛ akɛ: ‘Obaanyɛ oye tsei ni yɔɔ abɔɔ lɛ mli lɛ fɛɛ nɔ yibii, ja ekome ko pɛ. Kɛ́ oye nakai tso lɛ nɔ yibii lɛ eko lɛ, obaagbo.’

Sɛɛ mli lɛ, Yehowa kɛɛ: ‘Mafee hefatalɔ mahã Adam.’ Ehã Adam wɔ waa, kɛkɛ ni ejie ewui lɛ ekome ni ekɛbɔ ŋa ehã lɛ. Atsɛɔ lɛ Hawa. Adam kɛ Hawa je weku shihilɛ shishi. Te Adam nu he ehã tɛŋŋ be ni ena yoo lɛ? Emii shɛ ehe aahu akɛ ewie akɛ: ‘Yehowa kɛ miwu lɛ efee yoo fɛfɛo. Agbɛnɛ, miná mɔ ko ni tamɔ mi.’

 Yehowa kɛɛ Adam kɛ Hawa akɛ amɛfɔ ni amɛbii ayi shikpɔŋ lɛ nɔ obɔ. Kulɛ, eetao ni amɛfee ekome kɛtsu nii kɛ miishɛɛ yɛ Eden abɔɔ lɛ mli, ni amɛlɛɛ mli kɛyashi shikpɔŋ muu lɛ fɛɛ baatsɔ paradeiso fɛfɛo. Shi nibii eyaaa lɛ bɔ ni Yehowa taoɔ lɛ. Mɛni ba? Wɔbaakase enɛ he nii babaoo yɛ nikasemɔ ni nyiɛ sɛɛ lɛ mli.

“Mɔ ni bɔ amɛ yɛ shishijee lɛ, ebɔ amɛ nuu kɛ yoo.”​—Mateo 19:4